Qʼiʼntoq chʼixmi 40 abʼqʼi kyuʼn aj Israel toj tzqij txʼotxʼ. Otoq che kubʼ txqan tnam nim kyoklen kyuʼn. Atz otoq che kubʼ ten toj chqʼajlaj te tnam Moab, te tjawitz qʼij te aʼ Jordán, ex chʼixtoq kyokx toj Txʼotxʼ Tziyen maj. Aju aj kawil te Moab, Balac tbʼi, tzaj xobʼ tuʼnju kubʼ t-ximen qa kʼeleltoq qʼiʼn txʼotxʼ kyuʼn aj Israel. Tuʼntzunju, xi tqʼamaʼn te jun xjal Balaam tbʼi tuʼn t-xiʼ toj tnam Moab tuʼn t-xi tqanin nya bʼaʼn kyibʼaj aj Israel.

Pero xi tqʼamaʼn Jehová jlu te Balaam: «Miʼn txiʼya qanil nya bʼaʼn kyibʼaj aj Israel». Tuʼntzunju, mintiʼ taj Balaam tuʼn t-xiʼ toj tnam Moab. Xi txkoʼn juntl maj tuʼn Balac ex xi tqʼamaʼn te qa kxel tqʼoʼn alkyexku tajbʼil, ax ikx mintiʼ xiʼ Balaam. Xitzun tqʼamaʼn Dios te: «Jaku txiʼya, pero oʼkx kxel tqʼamaʼna aju kxel nqʼamaʼne teya».

Jax Balaam tibʼaj tbur tuʼn t-xiʼ toj Moab, atz kubʼni. Otoq txi tqʼamaʼn Jehová te tuʼn miʼn txiʼ qanil nya bʼaʼn kyibʼaj aj Israel, pero tajbʼiltoq tuʼn t-xiʼ qanil nya bʼaʼn kyibʼaj. Kubʼtzun tyekʼin tibʼ t-anjel Jehová oxe maj toj bʼe. Mintiʼtoq in nok tkeʼyin Balaam anjel, atzunte tbur qʼanchaʼl toj twitz. Toj tnejel maj, etz tin tibʼ bur toj bʼe ex okx tqʼon tibʼ toj awal. Toj tkabʼ maj, okx t-xon tibʼ ttxuʼ bur twitz xaq ex bʼiʼx kyaj petzʼj tqan Balaam tuʼn twitz xaq. Ex toj toxin maj, kubʼ t-xon tibʼ ttxuʼ bur toj bʼe. Toj tkyaqil maj lu, ok tpeqʼen Balaam tbur tukʼil jun tzeʼ.

Tej tikʼ jlu, jaw yolin bur tuʼn Jehová. Xi tqanin bur jlu te Balaam: «¿Tiquʼn in chin nok tpeqʼena?». Xi ttzaqʼweʼn Balaam te: «Tuʼnju in chin nok tqʼoʼna ik tzeʼn jun xjal mintiʼ tnabʼil. Noqwit at jun spad toj nqʼabʼe, jakulo kubʼ nbʼyoʼna». Xi tqʼamaʼn bur te: «Ma bʼet nim ambʼil aqine in chin iqen teya. ¿Ope nbʼinchaye jlu tiʼja ojtxe?».

Xitzun tqʼoʼn Jehová ambʼil te Balaam tuʼn tok tqʼoʼn twitz tiʼj anjel. Xi tqʼamaʼn anjel jlu te: «Xi tqʼamaʼn Jehová teya tuʼn miʼn txiʼya qanil nya bʼaʼn kyibʼaj aj Israel». Xi ttzaqʼweʼn Balaam: «Ma chin el tzpete.  Chin ajel meltzʼaje njaye». Pero xi ttzaqʼweʼn anjel te: «Jaku txiʼya toj Moab, pero oʼkx kxel tqʼamaʼna aju tzul tqʼamaʼn Dios teya».

¿Elpe tnikʼ Balaam tiʼj xnaqʼtzbʼil? Mintiʼ, tuʼnju yajxitl ok tilil tuʼn tuʼn t-xi tqanin nya bʼaʼn kyibʼaj aj Israel oxe maj. Pero kyoj qeju oxe maj, bʼant tuʼn Jehová tuʼn tel tqʼamaʼn jun kʼiwlabʼil te t-xel jun nya bʼaʼn. Yajxitl, e ok lipen aj Israel tiʼj tnam Moab, ex kyim Balaam. ¿Nyape mas bʼaʼn noqwit xi tnimen Balaam tyol Jehová tnejel?