Ok kybʼiʼn xjal toj junjuntl tnam te Canaán aju otoq tzikʼ tiʼj tnam Jericó. Aʼyeju aj kawil kye tnam lu bʼaj kyximen tuʼn tok kymojbʼan kyibʼ tuʼn kyqʼojin kyiʼj aj Israel. Noqtzun tuʼnj, aʼye xjal te Gabaón ul jun tiʼ toj kyximbʼetz. Ok kyqʼoʼn ttxʼaqin kyxbʼalun ex i eʼx tukʼil Josué ex xi kyqʼamaʼn jlu te: «Tzajni qoʼye toj jun tnam najchaq. O qbʼiye tqanil tiʼj Jehová ex tiʼj alkye tten onin kyiʼje toj Egipto ex toj Moab. Qa ma tzaj kytziyene qeye tuʼn miʼn kyqʼojene qiʼje, ok qo okele te kymajene».

Bʼaʼn ela jlu toj twitz Josué ex xi ttziyen kye qa mlaytoq che qʼojen kyiʼj. Noqtzun tuʼnj, tej tikʼ oxe qʼij, ok tbʼiʼn Josué qa nyatoq najchaq tzajni qe aj Gabaón, quʼn atz te Canaán qe. Tuʼntzunju, xi tqʼamaʼn Josué kye: «¿Tiquʼn xqo kubʼ kysbʼuʼne?». Ex tzaj kytzaqʼweʼn: «Tuʼnju in qo xobʼtoqe. Ojtzqiʼn quʼne qa in nonin Jehová kyiʼje aju Kydiose. Kynajsame, miʼn qo kubʼ kybʼyoʼne». Japun twiʼ tyol Josué ex mintiʼ ok tbʼinchaʼn jun nya bʼaʼn kyiʼj.

Tej tikʼ chʼintl ambʼil, i eʼx jweʼ aj kawil kye junjun tnam te Canaán ex qe kysoldad qʼojel kyiʼj aj Gabaón. Xiʼ Josué ex qe  tsoldad onil kyiʼj aj Gabaón ex e bʼet jun qonikʼen tuʼn kypon. Toj juntl qʼij, xi tzyet qʼoj naʼmxtoq tkubʼ spikʼe. I ex oq qe kysoldad aj Canaán kyoj nimku tembʼil, noqtzun tuʼnj, tzaj tchitun Jehová saqbʼaqen kyibʼaj ik tzeʼn nimaq abʼj. Tuʼntzunju xi tqanin Josué te Jehová tuʼn tkyaj weʼ qʼij. Bʼajxtoq kyaj weʼ qʼij jun maj ik tzeʼn jlu. ¿Tiquʼn xi tqanin Josué jlu? Tuʼnju qʼuqlixixtoq tkʼuʼj tiʼj Jehová. Kyjuʼtzun ax kyaj weʼ qʼij. Toj qʼij aju, mintiʼ kubʼ yupj qʼij tzmaxi tej tkubʼ kyiʼj aj kawil ex qe kysoldad kyuʼn aj Israel.