Aju tnejel pal Elí attoq kabʼe tkʼwaʼl: Aju Hofní ex Finehás. Pal qe ex in che aqʼunantoq toj ja xbʼalun. Noqtzun tuʼnj, mintiʼtoq in nokx kybʼiʼn qe tkawbʼil Jehová ex, nyatoq bʼaʼn kymod kyukʼil xjal. Ajtoq t-xi kyiʼn aj Israel oyaj te Jehová, in kyajtoq kyiʼn Hofní ex Finehás tbʼanel chibʼj te kye. Bʼiʼntoq tuʼn Elí qa nyatoq bʼaʼn kymod tkʼwaʼl, noqtzun tuʼnj, mintiʼxtoq in chex tkawin. ¿Atpetzulo jun tiʼ kbʼanteltoq tuʼn Jehová?

Mas kʼwaʼltoq Samuel kywitz Hofní ex Finehás, noqtzun tuʼnj, mintiʼtoq in kubʼ tbʼinchaʼn nya bʼaʼn ik tzeʼn kye. Tuʼntzun jlu, in tzalajtoq Jehová tiʼj. Jun qonikʼen, tej in jtantoq Samuel xi tbʼiʼn jun tqʼajqʼajel wibʼaj in txokentoq tiʼj. Jaw weʼ, ex xiʼ naj jatumel taʼ Elí ex tqʼama: «Lu qine lu». Noqtzun tuʼnj, xi ttzaqʼweʼn Elí te: «Mintiʼ weʼ in chin txoken tiʼja. Ku txiʼya juntl maj jtal». Xiʼ Samuel jtal juntl maj. Noqtzun tuʼnj, ax jlu bʼaj toj juntl maj. Tej t-xi tbʼiʼn Samuel aju tqʼajqʼajel wibʼaj toj toxin maj, el tnikʼ Elí tiʼj qa atoq Jehová in txoken tiʼj Samuel. Xi tqʼamaʼn Elí te qa ma tbʼi juntl maj tqʼajqʼajel wibʼaj, iltoq tiʼj tuʼn t-xi ttzaqʼweʼn jlu: «Yoline, Jehová. Lu tmajena nbʼin tiʼja».

Xiʼ Samuel juntl maj jtal ex tbʼi tqʼajqʼajel wibʼaj: «Samuel, Samuel». Xi ttzaqʼweʼn: «Yolina Jehová. Lu tmajena in bʼin tiʼja». Xi tqʼamaʼn Jehová te: «Qʼamanxa te Elí qa kbʼel tkastiw wuʼne kyukʼex toj tja.  Ojtzqiʼn tuʼn qa nya bʼaʼn in kubʼ kybʼinchaʼn tkʼwaʼl toj ja xbʼalun aju in najbʼen weye, noqtzun tuʼnj, mintiʼx in chex tkawin». Toj juntl qʼij, okx tjaqoʼn Samuel ttziʼ ja xbʼalun, ik tzeʼnx in bʼant tuʼn. In tzaj xobʼtoq Samuel tuʼn t-xi tqʼamaʼn te tnejel pal aju tqanil otoq tzaj tqʼamaʼn Jehová te. Noqtzun tuʼnj, xi txkoʼn Samuel tuʼn Elí ex xi tqanin te: «Nkʼwaʼl, ¿tiʼ saj tqʼamaʼn Jehová teya?». Xitzun tqʼamaʼn Samuel tkyaqil te.

Chʼiy Samuel, ex kukx ok Jehová te tamiw. Ojtzqiʼntoq kyuʼn kykyaqil aj Israel qa otoq jaw tjyoʼn Jehová Samuel tuʼn tok te tsanjel ex te jwes.