Tej otoqxi kubʼ tbʼyoʼn David Goliat, ok tqʼoʼn aj kawil Saúl David te nejenel kyxol soldad. Kambʼan David kyiʼj nim qʼoj ex ok ojtzqiʼn twitz kyuʼn nim xjal. Aj tmeltzʼaj tkyaqil maj toj jun qʼoj, in che etztoq xuʼj kanolte in che bʼixin ex in che bʼitzin. In kyqʼamaʼntoq jlu: «Jun mil xinaq ma kubʼ tbʼyoʼn Saúl, atzunte David laj mil ma kubʼ tbʼyoʼn». Tuʼn jlu, tzaj tqʼoj Saúl tiʼj David ex tajtoq tuʼn tkubʼ tbʼyoʼn.

Tbʼaneltoq chimbʼan David tiʼj arpa. Jun qʼij, akux in chimbʼan David te aj kawil Saúl, xi t-xoʼn tlans tiʼj David. Noqtzun tuʼnj, kubʼ tin tibʼ David ex mintiʼ kʼixbʼi tuʼn lans. Atz pon lans twitz ja. Tej tbʼaj jlu, nim maj ok tilil tuʼn Saúl tuʼn tkubʼ tbʼyoʼn. Aju bʼant tuʼn David, el oq ex xi tewin tibʼ toj tzqij txʼotxʼ.

Oktzun lepeʼ Saúl tiʼj David kyukʼix 3,000 tsoldad. Mintiʼ ojtzqiʼn tuʼn Saúl qa atztoq in che ewin kyibʼ David kyukʼil t-xjalil toj jul jatumel okx. Chebʼe xi kyqʼamaʼn t-xjalil David te: «Atzun ambʼil lu tuʼn tkubʼ  tbʼyoʼna Saúl». Xi laqʼeʼ David tiʼj Saúl ex el tjoʼn, moqa el tqesin, jun piẍ ttxaʼn t-xbʼalun ex mintiʼ tnaʼ. Yajxitl kubʼ tnaʼn David bʼis tuʼnju mintiʼ ok tqʼoʼn toklen aj kawil otoq jaw tskʼoʼn Jehová. Tuʼntzunju, mintiʼ xi tqʼoʼn ambʼil kye t-xjalil tuʼn kyok tzoqpaj tiʼj Saúl. Tejtzun tetz Saúl toj jul, tzaj yolin David te tukʼil tqʼajqʼajel twiʼ ex tqʼama: «Jakutoq kubʼ nbʼyoʼna, pero mintiʼ ma bʼant wuʼne». ¿In kubʼpe t-ximana qa ktel tbʼanel tmod Saúl tukʼil David?

Miʼn. Kukx ok lepeʼ Saúl tiʼj. Tuʼntzunju, toj jun qonikʼen okx David toj ewaj tukʼil tsobrin Abisái jatumel attoq Saúl. Axpe ikx, otoq tzikʼ jtan Abner aju nejenel kyxol tsoldad Saúl. Xitzun tqʼamaʼn Abisái te David: «Ma pon ambʼil tuʼn tkubʼ Saúl quʼn. Qʼontza ambʼil weye tuʼn tkubʼ nbʼyoʼne». Atzunte David xi ttzaqʼweʼn: «Tuʼnxte Qman knajel [...]. Kyjaʼtzun oʼkx qʼintza tlans tkubʼ ttxlaj twiʼ, tukʼix xar tkubʼil aʼ, ex qoʼ».

Yajxitl, jax David twiʼ jun witz aju nqakutoq taʼ jatumel at. Atztzun ok tqʼoʼn David twitz tiʼj Saúl ex qe t-xjalil. Jawtzun ẍchʼin David: «Aya Abner, ¿tiquʼn mintiʼ in nok tkwentina aj kawil? ¿Jatumel taʼ t-xar ex tlans?». El tnikʼ Saúl tiʼj tqʼajqʼajel twiʼ David ex xi tqʼamaʼn te: «Mawtlo chin kubʼ tbʼyoʼna, pero mintiʼ ma bʼant tuʼna. In nel nnikʼe tiʼj qa aya kʼokel te juntl aj kawil toj tnam Israel». Ajtzun meltzʼaj Saúl toj ja te kawbʼil. Noqtzun tuʼnj, kʼujlaʼntoq David kyuʼn junjun toj tja Saúl.