Xi tzyet tuʼn tkawin Josías toj Judá tej qʼiʼntoq wajxaq abʼqʼi tuʼn. Toj ambʼil aju, in najbʼentoq kyaqʼun chman kyuʼn xjal ex in che kʼulintoq kywitz tilbʼilal. Tej qʼiʼntoq 16 abʼqʼi tuʼn Josías, tajtoq tuʼn tel tnikʼ tiʼj alkye tten tuʼn tajbʼen toj tumelxix te Jehová. Tej qʼiʼntoq 20 abʼqʼi tuʼn, xi tzyet tuʼn kykubʼ t-xiten tilbʼilal ex aju patbʼil oyaj toj tkyaqil tnam. Ex tej qʼiʼntoq 26 abʼqʼi tuʼn, tzaj tjyoʼn tkyaqilju attoq tajbʼen tuʼn tbʼaj bʼinchet chʼintl tja Jehová.

Aju tnejel pal, Hilquías, jatz kanet aju tuʼjil Tley Dios tuʼn toj tja Jehová. Alo uʼj lu otoq kubʼ ttzʼibʼin Moisés. Xi tiʼn Safán, aju aj tzʼibʼil te aj kawil, aju uʼj bʼalqʼiʼn tten te Josías ex xi tuʼjin te tukʼil tqʼajqʼajel twiʼ. Ok ten Josías bʼil tiʼj ex el tnikʼ tiʼj qa mintiʼ otoq che bʼin aj Judá te Jehová toj nimku ambʼil. Xitzun tqʼamaʼn aj kawil Josías te Hilquías jlu: «Ma tzajxix tqʼoj Jehová qiʼj. Yolina tukʼil tuʼntzun ttzaj tqʼamaʼn qe tiʼ kbʼantel quʼn». Tzaj tqʼoʼn Jehová tqanil lu te Huldá, aju tsanjel: «Ma chin kyaj tzaqpiʼne kyuʼn aj Judá. Kbʼel nqʼoʼne kykastiw, noqtzun tuʼnj, miʼn bʼant jlu wuʼne akux in kawin Josías, tuʼnju in kubʼ tin tibʼ».

Tej tok tbʼiʼn aj kawil Josías aju tqanil lu, xiʼ toj tja Dios ex ok tchmoʼn qe aj Judá. Ex jaw tuʼjin tukʼil tqʼajqʼajel twiʼ aju Tley Jehová kywitz. Xi ttziyen Josías ex qe aj Judá tuʼn kybʼin te Dios tuʼn tkyaqil kykʼuʼj.

Otoq tzikʼ nim ambʼil mintiʼtoq in kubʼ kyikʼsaʼn aj Judá aju Xjan Qʼij. Noqtzun tuʼnj, jaw tuʼjin Josías toj Ley qa iltoq tiʼj tuʼn tkubʼ ikʼset  tkyaqil abʼqʼi, tuʼntzun jlu xi tqʼamaʼn kye: «Ok kbʼel qikʼsaʼn aju Xjan Qʼij te Jehová». Yajxitl, xi tqʼamaʼn Josías tuʼn ttzaj kyiʼn ex tuʼn tbʼaj kybʼinchaʼn nimku oyaj ex tuʼn tten jun kʼloj aj bʼitzil tuʼn kybʼitzen toj tja Dios. E oktzun ten ikʼsalte Xjan Qʼij, yajxitl aju ninqʼij in nok kyiʼj Pan mintiʼ tsamel, moqa mintiʼ ttxʼamil, aju ten wuq qʼij. Naʼmxtoq tkubʼ kyikʼsaʼn jun Xjan Qʼij ik tzeʼn jlu atxix tej tanqʼin Samuel. Ax tok kʼujlaʼntoq Tley Jehová tuʼn Josías. ¿Yajtzun teya? ¿Taja tuʼn tel mas tnikʼa tiʼj Jehová?