Aju tnam Asiria attoq tipumal kyibʼaj txqantl tnam ex otoq kubʼ kyiʼj 10 kʼloj kyyajil aj Israel tuʼn. Atzun jaʼlo ax ikx tajtoq aj kawil te Asiria, aju Senaquerib tbʼi, tuʼn tkubʼ tiʼj aju kawbʼil kye kabʼe kʼloj kyyajil aj Judá tuʼn. Iktzun tten xi tzyet tuʼn tkubʼ tiʼj teyele te junjun tnam Judá tuʼn. Noqtzun tuʼnj, mas tajbʼiltoq tuʼn tkubʼ tiʼj tnam Jerusalén tuʼn. Mintiʼtoq ojtzqiʼn tuʼn Senaquerib qa a Jehová in xqʼuqintoq tiʼj tnam.

Xi tchjoʼn Ezequías, aju aj kawil te Judá, nim pwaq te Senaquerib tuʼn miʼn tok tzoqpaj tiʼj tnam Jerusalén. Xi tkʼamoʼn Senaquerib pwaq, noqtzun tuʼnj, tzajx tsamaʼn qe tsoldad nim kyipumal tuʼn kyok lipen tiʼj Jerusalén. In che tzaj xobʼtoq xjal tuʼnju chebʼe chebʼe in che pon laqʼeʼ aj Asiria. Tuʼntzunju xi tqʼamaʼn Ezequías kye: «Miʼn che xobʼe. At kyipumal qe aj Asiria, noqtzun tuʼnj, ok tzul tqʼoʼn Jehová mas qipumal kywitz».

Xi tsamaʼn Senaquerib rabsaqué qʼol jun tqanil tuʼn t-xmayin kyiʼj xjal te Jerusalén. Kyaj weʼ rabsaqué tiʼjxi tnam ex jaw ẍchʼin: «Mlay bʼant tuʼn tonin Jehová kyiʼje. Miʼn txi kyqʼoʼne ambʼil tuʼn kykubʼ sbʼuʼne tuʼn Ezequías. Mix aʼl jun dios jaku kolin kyiʼje tuʼn miʼn kykubʼe quʼne».

Xitzun tqanin Ezequías te Jehová tiʼ tuʼn tbʼant tuʼn, ex tzaj ttzaqʼweʼn Jehová: «Miʼn tzaj xobʼa tiʼjju ma tzaj tqʼamaʼn rabsaqué teya. Mlay kubʼ tiʼj Jerusalén tuʼn Senaquerib». Yajxitl, ul tsamaʼn Senaquerib junjun uʼj te Ezequías, aju in kyqʼamaʼn: «Kyqʼontze kyibʼe toj qqʼabʼe. Mlay che klete tuʼn Jehová». Oktzun ten Ezequías naʼl Dios: «Najsama Jehová, qo tkloma, tuʼntzun tel kynikʼ kykyaqil xjal qa oʼkx aya jun Dios axix tok». Ex tzaj ttzaqʼweʼn Jehová te: «Mlay tzʼokx aj kawil te Asiria toj Jerusalén. Aʼyine chin xqʼuqil tiʼj ntname».

Qʼuqlitoq tkʼuʼj Senaquerib tiʼj qa chʼixtoq tkubʼ tiʼj Jerusalén tuʼn. Noqtzun tuʼnj, toj jun qonikʼen tzaj tsamaʼn Jehová jun anjel toj tembʼil jatumel ateʼtoq aj  Asiria, aju attoq tiʼjxi tnam. ¡Kubʼ tbʼyoʼn anjel 185,000 soldad! E kyim qe tsoldad Senaquerib aʼyeju nim kyipumal, ex mintiʼtoq juntl tiʼ jaku bʼant tuʼn tuʼnju otoq kubʼ tiʼj ex aj meltzʼaj tja. Iktzun tten ok t-xqʼuqin Jehová Ezequías ex aju tnam Jerusalén, ik tzeʼn otoq tzaj ttziyen. Noqwit ten teya toj Jerusalén, ¿tenpe teya qʼuqbʼil tkʼuʼj tiʼj Jehová?