Toj jun tnam te Asiria aju Nínive tbʼi, nimtoq nya bʼaʼn in kubʼ kybʼinchaʼn xjal. Xi tsamaʼn Jehová Jonás, aju tsanjel, toj tnam Nínive tuʼn t-xi tqʼamaʼn kye xjal qa iltoq tiʼj tuʼn tkubʼ kychʼixpun kyibʼ. Noqtzun tuʼnj, mintiʼ xiʼ toj Nínive, atz xiʼ oq Jonás toj juntl plaj ex jax toj jun bark aju kyjaʼtoq t-xiʼ toj Tarsis.

Tej in bʼettoq bark tibʼaj aʼ, tzaj nimxix kyqʼiqʼ jbʼal, ex e tzaj xobʼxix yukil bark. E ok ten naʼl dios kye kydios ex kubʼ kyximen jlu: «¿Tiquʼn ma tzaj jlu qiʼj?». Xi tqʼamaʼn Jonás jlu kye: «Aʼyine at tpaj tiʼj jlu. Ma chin el oqe tuʼn miʼn tbʼant wuʼne aju ma tzaj tqʼamaʼn Jehová weye. Chin kyxoʼnkuxe toj aʼ tuʼntzun tweʼ kyqʼiqʼ jbʼal». Nya kyajtoq yukil bark tuʼn tkux kyxoʼn Jonás toj aʼ, noqtzun tuʼnj, kukx xi tqʼamaʼn kye tuʼn tkux kyxoʼn. Tuʼntzunju kux kyxoʼn toj aʼ, ex weʼ kyqʼiqʼ jbʼal.

Kubʼ t-ximen Jonás qa oktoq kkyimel. Tej tkux mulqʼaj toj aʼ, ok ten naʼl Dios te Jehová. Kyjuʼtzun tzaj tsamaʼn Jehová jun matij pescad tuʼn t-xi bʼelqʼuʼn Jonás tuʼn, noqtzun tuʼnj, mintiʼ kubʼ tbʼyoʼn. Ok ten Jonás naʼl Dios te Jehová tej attoq toj tkʼuʼj pescad: «Kxel ntziyene qa kukx chin bʼile teya». Toj oxe qʼij kukx anqʼin Jonás tuʼn Jehová toj tkʼuʼj pescad ex yajxitl bʼant tuʼn Jehová tuʼn tjatz xawen, moqa tuʼn tjatz wuqʼe, Jonás tuʼn pescad toj tzqij txʼotxʼ.

Klet Jonás tuʼn Jehová, noqtzun tuʼnj, ¿in tzajpetzulo tyekʼin jlu qa mintiʼtoqtl tuʼn t-xiʼ toj Nínive? Mintiʼ. Xi samaʼn juntl maj tuʼn Jehová,  ex toj ambʼil aju, xiʼ Jonás. Tej tpon, xi tqʼamaʼn jlu kye nya bʼaʼn xjal: «Toj 40 qʼij ok kbʼel t-xiten Jehová aju tnam lu». Noqtzun tuʼnj, ikʼ jun tiʼ aju mintiʼtoq in nyon tiʼj. Xi kybʼiʼn xjal te Nínive aju tyol ex kubʼ kychʼixpun kyibʼ. Xi tqʼamaʼn aj kawil te Nínive jlu kye t-xjalil: «Che kubʼsane twitz Dios ex tzʼajtz tiʼj kyanmiye, tuʼn jlu jakulo miʼn qo kubʼ tnajsaʼn». Tej tzaj tqʼoʼn Jehová twitz tiʼj qa otoq tzʼajtz tiʼj kyanmi xjal lu, mintiʼtl e kubʼ tnajsaʼn.

Tzaj tqʼoj Jonás tuʼnju mintiʼ kubʼ t-xiten Jehová tnam. Ximana tiʼj jlu: ten tpasens Jehová tiʼj Jonás ex tzaj qʼaqʼin tkʼuʼj tiʼj. Noqtzun tuʼnj, mintiʼ tzaj qʼaqʼin tkʼuʼj Jonás kyiʼj xjal te Nínive. Aju bʼant tuʼn, kubʼ qeʼ tiʼjxi tnam tjaqʼ t-xlekumal jun tzeʼ ex in qʼojle. Yajxitl kubʼ tzqij aju tzeʼ lu, ex mas tzajtl tqʼoj Jonás. Tuʼntzunju xi tqʼamaʼn Jehová jlu te: «Mas nim toklen tzeʼ lu toj twitza kywitz qe aj Nínive. Ma tzaj qʼaqʼen nkʼuʼje kyiʼj ex tuʼn jlu ma che klet». ¿Tiʼ tajtoq Dios tuʼn t-xi t-xnaqʼtzaʼn te Jonás? Qa mas nimtoq kyoklen xjal te Nínive toj twitz, twitz alkyexku tzeʼ.