Nim maj ok lipen aj kawil Ben-Hadad te tnam Siria kyiʼj aj Israel. Noqtzun tuʼnj, kukxtoq in xi tqʼamaʼn tsanjel Dios Eliseo tqanil te aj kawil kye aj Israel tuʼn ttzaqpaj. Tuʼntzunju bʼaj t-ximen Ben-Hadad tuʼn ttzyet Eliseo tuʼn. Ok tbʼiʼn qa atztoq taʼ toj tnam te Dotán ex i ex tsamaʼn qe tsoldad tuʼn ttzyet kyuʼn.

E pon aj Siria toj tnam te Dotán toj qonikʼen. Toj juntl qʼij, etz aju onil te Eliseo ex xi tkeʼyin otoq tzʼok kytxolin kyibʼ nimxix soldad tiʼj tnam. Tzajxix xobʼ ex jaw ẍchʼin: «Eliseo, ¿tiʼ kbʼantel quʼn?». Xi ttzaqʼweʼn Eliseo: «Mas nim soldad at qukʼil twitzju at kyukʼil». Toj ambʼil aju, bʼant tuʼn Jehová tuʼn tok tkeʼyin aju onilte Eliseo qa nojnitoq kywi witz tok tiʼjele tnam kyuʼn chej ex kʼuxbʼil te qʼojbʼil in kʼant qʼaqʼ kyiʼj.

Tej kyajtoq soldad te Siria tuʼn ttzyet Eliseo kyuʼn, ok ten Eliseo naʼl Dios: «Bʼinchama xtalbʼil, Tat Jehová, tuʼn kykyaj qe xjal lu moẍ». Noq minabʼen, mintiʼtl el kynikʼ soldad jatumel ateʼtoq maske kukxtoq in che keʼyin. Xitzun tqʼamaʼn Eliseo kye: «Nya tnam jlu in che jyone tiʼj. Che lepetze wiʼje, ok che xel wiʼne jatumel taʼ xinaq in che jyone tiʼj». E ok  lepeʼ tiʼj Eliseo tejxi kypon toj Samaria. Atztoq najle aj kawil kye aj Israel.

Eltzun kynikʼ aj Siria tiʼj jatumel ateʼtoq, noqtzun tuʼnj, ya ateʼtoq toj juntl lugar. Xi tqanin aj kawil kye aj Israel jlu te Eliseo: «¿Che bʼel nbʼyoʼne?». Otoq tzʼok tilel kyuʼn aj Asiria tuʼn tok kybʼinchaʼn nya bʼaʼn tiʼj Eliseo, ¿kʼajbʼelpe ambʼil lu tuʼn tuʼn taj tqʼoʼn t-xel nya bʼaʼn kyiʼj? Miʼn. Xi ttzaqʼweʼn te aj kawil: «Miʼn che kubʼ tbʼyoʼna. Qʼonxa kywa ex qʼonxa ambʼil kye tuʼn kyaj». Tuʼntzunju, kubʼ tbʼinchaʼn aj kawil nimxix wabʼj kye ex yajxitl xi tqʼoʼn ambʼil kye tuʼn kymeltzʼaj kyja.