Tzaj kʼiwlaʼn Salomón tuʼn Jehová tej t-xi tqʼoʼn nim tnabʼil ex tej t-xi tqʼoʼn tbʼanel oklenj te tuʼn tjaw tbʼinchaʼn jun tja. Noqtzun tuʼnj, chebʼe chebʼe el tpan tibʼ Salomón tiʼj Jehová. Qa at teya tkʼwaʼl, qʼamanxa kye qa el tpan tibʼ Salomón tiʼj Jehová tuʼn kypaj xjal in che ajbʼentoq kye dios nya ax tok. Kubʼ paʼn kawbʼil, ex e ten aj kawil nya bʼaʼn aʼyeju el kypaʼn qe xjal tiʼjju axix tok kʼulbʼil ex tuʼn kykʼulin kywitz tilbʼilal. Kyoj ambʼil aju, i el ikʼun ex e kubʼ bʼyoʼn nim kyxol qeju tsanjel Dios kukx in che ajbʼentoq te. Aqeju xjal otoq tzʼel kypan kyibʼ tiʼj kʼulbʼil axix tok toj kawbʼil te jawni, mas e xiʼ toj il tuʼn tpaj reina Jezabel. Kwest e ok ambʼil aju toj kyanqʼibʼil aj Israel. Maske ikju, ateʼ nim aj Israel kukx e ajbʼen te Jehová ik tzeʼn aj kawil Jehosafat ex aj sanjel Elías.