E ten nim aj kawil nya bʼaʼn kyibʼaj lajaj kʼloj kyyajil aj Israel. Noqtzun tuʼnj, a Acab ok te mas nya bʼaʼn. Kubʼ mojeʼ tukʼil jun nya bʼaʼn xuʼj Jezabel tbʼi, aju in kʼulintoq twitz dios Baal. Ok tilil tuʼn Acab ex Jezabel tuʼn kykʼulin nim xjal twitz Baal. Ax ikx kubʼ kybʼyoʼn nim tsanjel Jehová. ¿Tiʼ bʼant tuʼn Jehová? Xi tsamaʼn aj sanjel Elías tuʼntzun t-xi tqʼoʼn jun tqanil te Acab.

Xi tqʼamaʼn Elías te Acab qa tuʼnju nya bʼaʼn aj kawil, mlaytoq tzaj jbʼal toj tnam Israel. Kyoj mas te oxe abʼqʼi, mintiʼ tzaj chʼiy jun awal ex tzaj nim waʼyij kyiʼj xjal. Yajxitl, xi tsamaʼn Jehová Elías yolil juntl maj tukʼil Acab. Xi tqʼamaʼn Acab jlu te Elías: «Oʼkx nya bʼaʼn in tzaj tiʼna. Aya ma tzaj qʼinte mya bʼaʼn kyibʼaj xjal». Xi ttzaqʼweʼn Elías jlu te: «Nya tuʼn npaje mintiʼ in tzaj jbʼal. Mintiʼ in tzaj jbʼal tuʼnju in kʼulina twitz Baal. Qbʼinchanku jun tiʼ tuʼntzun tel nikʼbʼaj tiʼj. Bʼaʼn tuʼn tok tchmoʼna kykyaqil xjal ex qe aj tsanjel Baal twi witz Carmelo».

Oktzun kychmon kyibʼ xjal twi witz ex xi tqʼamaʼn Elías jlu kye: «Il tiʼj tuʼn tkubʼ kyximane. Qa a Jehová aju Dios axix tok, che lepeʼke tiʼj. Qatzun a Baal aju dios axix tok, che lepeʼke tiʼj. Kbʼantel jun tiʼ quʼn: aʼyeju 450 tsanjel Baal kbʼajel kybʼinchaʼn jun oyaj ex tzul kyxkoʼn kydios. Ax ikx weye, kbʼajel nbʼinchaʼne jun oyaj ex tzul ntxkoʼne Jehová. Aju Dios tzul samante qʼaqʼ tibʼaj oyaj, atzunju Dios axix tok». Bʼaʼn ela jlu toj kywitz xjal.

Bʼajtzun kybʼinchaʼn tsanjel Baal jun oyaj, ex e ok ten txkolte kydios enter qʼij tej kyqʼama jlu: «Aya Baal, qo ttzaqʼweʼntza». Ex tuʼnju mintiʼ tzaj ttzaqʼweʼn Baal kye, ok ten Elías xmayil tiʼj tej tqʼama: «Kytxkontze tuʼn tkyaqil kyipumale. Qape in jtan ex il tiʼj tuʼn t-xi jun kʼasil te». Tej ya chʼixtoq ttzaj qlolj, kukx e ok ten tsanjel Baal txkolte ex mintiʼ jun tzaj tzaqʼwente kye.

Kubʼtzun tqʼoʼn Elías toyaj tibʼaj jun altar ex kubʼ tqoʼn nim aʼ tibʼaj. Oktzun ten naʼl Dios kyjalu: «Aya Jehová, bʼaʼn tuʼn tel kynikʼ xjal tiʼja qa aya Dios axix tok». Jun rat naj tzaj ttzaqʼweʼn Jehová Elías ex tzaj tsamaʼn qʼaqʼ toj kyaʼj tuʼn tkubʼ patj oyaj. E jawtzun ẍchʼin xjal: «A Jehová aju Dios axix tok». Tqʼamatzun Elías jlu: «Kytzyuntze qe tsanjel Baal,  ex mi jun tuʼn ttzaqpaj». Toj qʼij aju, e kubʼ bʼyoʼn qeju 450 tsanjel Baal.

Yajxitl, kubʼ ten chʼin muj tibʼaj mar ex xi tqʼamaʼn Elías te Acab: «Tzul jun nintz jbʼal. Bʼinchama tten tkare ex txiʼya tjaya». Nojtzun twitz kyaʼj tuʼn qʼeq muj, tzaj nim kyqʼiqʼ ex tzaj nim jbʼal. Iktzun tten tzyet tuʼn kychʼiy awal. Jun rat naj xiʼ Acab tja toj tkar. Atzunte Jehová onin tiʼj Elías tuʼn tkarelin mas jun rat twitz kar. ¿Otoqpe kubʼ bʼaj tkyaqil nya bʼaʼn e tzaj tiʼj Elías? Qo xnaqʼtzal tiʼj toj juntl xnaqʼtzbʼil.