Toj ambʼil tej tkʼulin Salomón te Jehová, e ten aj Israel toj tzalajbʼil. Noqtzun tuʼnj, kubʼ mojeʼ Salomón kyukʼil nim xuʼj te junjuntl tnam ex in che kʼulintoq kywitz tilbʼilal. Chebʼe chebʼe kubʼ tchʼixpuʼn Salomón t-ximbʼetz, ax ikx te ok ten kʼulil kywitz tilbʼilal. Tzaj tqʼoj Jehová tuʼn jlu ex xi tqʼamaʼn te: «Kʼelel wiʼne kawbʼil kye tiyjila, moqa tyajila, ex kbʼel npaʼne te kabʼe. Aju kʼloj mas matij kxel nqʼoʼne te jun tmajena, atzunju kʼloj mas chʼin kxel nqʼoʼne te jun toj tjaya».

Bʼant juntl tiʼ tuʼn Jehová tuʼntzun tel kynikʼ kykyaqil tiʼjju otoq tqʼama. Otoq t-xiʼ jun tmajen Salomón toj jun tbʼe, aju Jeroboán tbʼi, ex kanet aj sanjel Ahíya tuʼn toj tbʼe. El tiʼn Ahíya ttxoʼw ex kubʼ tlaqin toj kabʼlaj piẍ, ex xi tqʼamaʼn jlu te Jeroboán: «Kʼelel tiʼn Jehová kawbʼil te tiyjil Salomón ex kbʼel tpaʼn te kabʼe kʼloj. Qʼinxa lajaj piẍ, tuʼnju aya kʼokel te aj kawil tibʼaj lajaj kʼloj xjal». Tej tok tbʼiʼn aj kawil Salomón tiʼjju otoq bʼaj, ok tilil tuʼn tuʼn tkubʼ tbʼyoʼn Jeroboán. Tuʼntzunju xi oq Jeroboán toj tnam Egipto. Tej tbʼet ambʼil kyim Salomón ex tzyet tkawin tkʼwaʼl, aju Rehoboam tbʼi. Kubʼtzun t-ximen Jeroboán qa otoq tzikʼ nya bʼaʼn ex meltzʼaj toj tnam Israel.

 Yajxitl kyqʼama qe tij xjal te Rehoboam: «Qa ma ten tbʼanel tmoda kyukʼil xjal, kukx che nimel teya». Noqtzun tuʼnj, ateʼtoq junjun tamiw Rehoboam kuʼxun ex xi kyqʼamaʼn jlu te: «Il tiʼj tuʼn tok t-obligarina qe xjal tuʼntzun kyaqʼunan mas». Xi tbʼiʼn Rehoboam kyyol qeju tamiw ex ok te nya bʼaʼn. Tuʼntzunju, ya mintiʼ e nimen xjal te ex ok qʼoʼn Jeroboán te aj kawil tuʼntzun tkawin tibʼaj lajaj kʼloj xjal. Aju lajaj kʼloj xjal, ok qʼoʼn kybʼi te tkawbʼil aj Israel. Atzunju kabʼe kʼloj xjal, ok qʼoʼn tbʼi te tkawbʼil aj Judá, ex kukx e nimen te Rehoboam. Iktzun tten kubʼ paʼn qeju kabʼlaj kʼloj kyiyjil aj Israel.

Atzun taʼ tnam Jerusalén tjaqʼ tkawbʼil Rehoboam. Nyatoq taj Jeroboán tuʼn kyxiʼ xjal kʼulul te Jehová atztzun. ¿Ojtzqiʼn tuʼna tiquʼn? Tuʼnju tzaj xobʼ Jeroboán tuʼn tel ikʼen kyuʼn xjal ex tuʼn kynimen te Rehoboam. Tuʼntzunju, kubʼ tbʼinchaʼn kabʼe tilbʼilal wakẍ qʼan pwaq kytxʼotxʼil ex tqʼama jlu kye xjal: «Najchaq taʼ tnam Jerusalén. Mas bʼaʼn qa ax ma che kyaj tene kʼulul kywitz tilbʼilal wakẍ». Xi kybʼiʼn xjal te ex ikʼ tnaʼl Jehová kyuʼn juntl maj.