1, 2. a) ¿Tiquʼn jaku txi tqʼamaʼna qa jun tbʼanelxix oyaj aju naʼj Dios? b) ¿Tiquʼn nim toklen tuʼn tel qnikʼ tiʼjju in tzaj t-xnaqʼtzaʼn Xjan Uʼj tiʼj naʼj Dios?

AJ TOK qmojbʼaʼn Txʼotxʼ tukʼil tkyaqilju at twitz kyaʼj, tal chʼin in nok Txʼotxʼ. Ik in che ela xjal toj twitz Jehová ik tzeʼn jun txut, moqa jun txʼat aʼ (Salmo 115:15; Isaías 40:15). Mas tal chʼin qoʼ aj tok qmojbʼan qibʼ tukʼil tkyaqilju at twitz kyaʼj, noqtzun tuʼnj, in tzaj tqʼamaʼn Tyol Dios jlu: «Niqayin taʼ Qman kyiʼj qeju in che kubʼsan twitz, aqeju axix tok kyuʼn. In xi tqʼoʼn aju in kyqanin qeju in che niman te, ex ok t-xi kyqanin onbʼil te in che tzaj tbʼiʼn ex in che klet tuʼn» (Salmo 145:18, 19). At jun tbʼanelxix qoklen. A Jehová Bʼinchal tkyaqil, ex taj tuʼn tok te qamiw ex tuʼn ttzaj tbʼiʼn qnaʼj Dios. Aju naʼj Dios jun tbʼanelxix oyaj o tzaj tqʼoʼn Jehová teyele te junjun qe.

² Oʼkx qo tzajel tbʼiʼn Jehová qa ma qo naʼn Dios ik tzeʼn in tzaj tqʼamaʼn qe. ¿Tzeʼn jaku bʼant jlu quʼn? Qo xnaqʼtzan tiʼj tiʼ in tzaj t-xnaqʼtzaʼn Xjan Uʼj tiʼj naʼj Dios.

3. ¿Tiquʼn nim toklen tuʼn tnaʼna Dios te Jehová?

³ Taj Jehová tuʼn tnaʼna Dios te, tuʼn tyolina tukʼil. ¿Tiquʼn jaku txi qqʼamaʼn qa ikju? Ximana tiʼj tbʼanel txokbʼil in tzaj tqʼoʼn Dios teya toj Filipenses 4:6, 7 (uʼjinktza). In ximen aju Bʼinchal tkyaqil tiʼja ex taj tuʼn t-xi tqʼamaʼna te tkyaqilju tkuʼx toj tanmiya ex tkyaqilju nya bʼaʼn in tzaj tiʼja.

4. ¿Tzeʼn jaku tzʼonin tiʼj qamiwbʼil tukʼil Jehová qa kukx xqo naʼn Dios, ex tiquʼn?

 ⁴ In nonin naʼj Dios qiʼj tuʼn tchʼiy qamiwbʼil tukʼil Jehová. Qa kukx in che yolin kabʼe xjal kyamiw kyibʼ tiʼjju in kubʼ kyximen, tiʼjju in kynaʼn ex tiʼjju in bʼaj kykʼuʼj tiʼj, mas in chʼiy kyamiwbʼil. Chʼixme axju in bʼant tuʼn Jehová, in tzaj tqʼamaʼn teya toj Xjan Uʼj aju in kubʼ t-ximen, aju in tnaʼn ex in tzaj tqʼamaʼn tiʼ kbʼantel tuʼn toj ambʼil tzul. Ax ikx teya jaku txi tqʼamaʼna te Jehová toj naʼj Dios tkyaqilju tkuʼx toj tanmiya. Qa ma naʼna Dios tkyaqil qʼij, mas kchʼiyil kyamiwbʼile tukʼil (Santiago 4:8).

5. ¿Tzeʼn in nel qnikʼ tiʼj qa mintiʼ in che tzaj tbʼiʼn Jehová kykyaqil naʼj Dios?

⁵ ¿In tzajpe tbʼiʼn Jehová kykyaqil naʼj Dios? Mintiʼ. Toj tqʼijlalil Isaías, xi tqʼamaʼn Jehová jlu kye aj Israel: «Ok tjaw kyqʼoʼn kyqʼabʼe twitz kyaʼj tuʼn kynaʼne Dios, mlay che tzaj nbʼiʼne, porke nojni kyiʼj kyqʼabʼe tuʼn chikʼ»  (Isaías 1:15). Qa mintiʼ sok qxqʼuqin qibʼ, jakulo kubʼ qbʼinchaʼn jun tiʼ aju jaku tzaj tiʼn nya bʼaʼn tiʼj qamiwbʼil tukʼil Jehová. Qa ma bʼaj jlu, mlay tzaj tbʼiʼn qnaʼj Dios.

6. a) ¿Tiquʼn ilxix tiʼj tuʼn tten qʼuqbʼil qkʼuʼj? b) ¿Alkye tten in kubʼ qyekʼin qa at qʼuqbʼil qkʼuʼj?

⁶ Qa qaj tuʼn ttzaj tbʼiʼn Jehová qe qnaʼj Dios, il tiʼj tuʼn tten qʼuqbʼil qkʼuʼj tiʼj (Marcos 11:24). In tzaj tchikʼbʼaʼn apóstol Pablo jlu: «Qa mintiʼ qokslabʼl mlayx tzalaj Dios qiʼj, porke qa taj xjal tuʼn tpon laqʼeʼ ttxlaj Dios, ilxix tiʼj tuʼn tokslan qa at Dios, ex qa a Dios in tzaj qʼonte jun oyaj kye qeju in che jyon tiʼj» (Hebreos 11:6). Noqtzun tuʼnj, nya oʼkx tuʼn t-xi qqʼamaʼn qa at qokslabʼil, moqa qʼuqbʼil qkʼuʼj. Il tiʼj tuʼn tkubʼ qyekʼin aj qbʼin te Jehová toj tkyaqil ambʼil (kjawil uʼjit Santiago 2:26).

7. a) ¿Tiquʼn il tiʼj tuʼn tkubʼ qin qibʼ aj qnaʼn Dios te Jehová ex tuʼn tkubʼ qyekʼin qa nim toklen toj qwitz? b) ¿Alkye tten in kubʼ qyekʼin qa in xi qqʼamaʼn aju axix tok aj qnaʼn Dios?

⁷ Aj qnaʼn Dios te Jehová, il tiʼj tuʼn tkubʼ qin qibʼ ex tuʼn tkubʼ qyekʼin qa nim toklen toj qwitz. ¿Tiquʼn? Noqpe qo ximen tiʼj qa ma qo yolin tukʼil jun aj kawil, oklo kbʼel qyekʼin qa nim toklen toj qwitz. Mas kbʼel qin qibʼ ex kbʼel qyekʼin qa nim toklen Jehová toj qwitz aj qyolin tukʼil, tuʼnju nimxix te tipumal (Génesis 17:1; Salmo 138:6). Ax ikx il tiʼj tuʼn t-xi qqʼamaʼn aju axix tok te, aju tkuʼx toj qanmi, ex nya tuʼn t-xi qqʼamaʼn nim maj ax qyol (Mateo 6:7, 8).

8. ¿Tiʼ kbʼantel quʼn qa ma txi qqanin jun tiʼ toj qnaʼj Dios?

⁸ Aj t-xi qqanin jun tiʼ toj qnaʼj Dios, il tiʼj tuʼn tok tilil quʼn tuʼn tkubʼ qbʼinchaʼn aju in xi qqanin te Jehová. Jun techel, qa ma txi qqanin te tuʼn qtzaj tonin tuʼn tkanet aju at tajbʼen qe, noqtzun tuʼnj, nya bʼaʼn qa nya qaj tuʼn qaqʼunan ex tuʼn qayon tuʼn ttzaj tqʼoʼn Jehová tkyaqil qe. Qa jaku bʼant qaqʼunan, qo aqʼunan tiʼj alkyexku  aqʼuntl qa jaku bʼant quʼn (Mateo 6:11; 2 Tesalonicenses 3:10). Ex qa ma txi qqanin te Jehová tuʼn qtzaj tonin tuʼn tkyaj qtzaqpiʼn jun nya bʼaʼn, qpaʼmil qibʼ tiʼj alkyexku tiʼ jaku qoʼx tiʼn juntl maj tiʼj nya bʼaʼn (Colosenses 3:5). Atzun jaʼlo, qo xnaqʼtzan tiʼj junjun kyxjel xjal at tiʼj naʼj Dios.

9. a) ¿Alqe qo naʼl Dios? b) ¿Tiʼ in tzaj t-xnaqʼtzaʼn Juan 14:6 tiʼj naʼj Dios?

⁹ ¿Alqe qo naʼl Dios? Kyaj t-xnaqʼtzaʼn Jesús kye t-xnaqʼtzbʼen tuʼn kynaʼn Dios kyjalu: «A Qman ata tuj kyaʼj» (Mateo 6:9). A jlu in tzaj tyekʼin qa oʼkx te Jehová qo naʼl Dios. Ax ikx tqʼama Jesús jlu: «Aqine ju bʼe, aqine ju yol axix tok, ex aqine qʼol chwinqlal; mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). A jlu in tzaj tyekʼin qe qa il tiʼj tuʼn t-xi qqanin tkyaqil toj tbʼi Jesús. ¿Tiʼ t-xilen jlu? Qa qaj tuʼn kytzaj tbʼiʼn Jehová qnaʼj Dios, il tiʼj tuʼn tkubʼ qyekʼin qa nim toklen toj qwitz aju tbʼanelxix oklenj o txi tqʼoʼn Jehová te Jesús. Ik tzeʼn o tzʼel qnikʼ tiʼj, ul Jesús tzalu twitz Txʼotxʼ tuʼn qklet tuʼn tiʼj il ex kyimen (Juan 3:16; Romanos 5:12). Ax ikx o tzʼok tqʼoʼn Jehová te Tnejel Pal ex te Jwes (Juan 5:22; Hebreos 6:20).

10. ¿Atpe jun tten tuʼn qkubʼ ten naʼl Dios? Chikʼbʼantza.

¹⁰ ¿Atpe jun tten tuʼn qkubʼ ten naʼl Dios? Mintiʼ in tzaj tqʼamaʼn Jehová qa il tiʼj tuʼn qkubʼ ẍmejeʼ, tuʼn qkubʼ qeʼ moqa tuʼn qkubʼ weʼ aj qnaʼn Dios. In tzaj tqʼamaʼn Tyol Dios qa jaku qo naʼn Dios noq alkyexku qten pero kbʼantel quʼn toj tumel (1 Crónicas 17:16; Nehemías 8:6; Daniel 6:10; Marcos 11:25, TNM). Aju mas nim toklen toj twitz Jehová aju tuʼn tten jun tbʼanel qximbʼetz aj  qyolin tukʼil, ex nya aju alkye tten in qo kubʼ ten naʼl Dios. Jaku qo naʼn Dios tukʼil tqʼajqʼajel qwiʼ moqa noq toj qanmi, jaxku tumel ex toj alkyexku ambʼil, qa te qʼij moqa te qonikʼen. Aj qnaʼn Dios jaku tzʼok qeʼ qkʼuʼj tiʼj qa in bʼin Jehová qiʼj maske mintiʼ jun xjal in bʼin qiʼj (Nehemías 2:1-6).

11. ¿Alkyeqe tiʼchaq jaku qo naʼn Dios kyiʼj?

¹¹ ¿Alkyeqe tiʼchaq jaku qo naʼn Dios kyiʼj? Tiʼj alkyexku tiʼ bʼaʼn in nela toj twitz Jehová. In tzaj tqʼamaʼn Tyol Dios jlu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14). ¿Jakupe qo naʼn Dios tiʼj junjun tiʼchaq at toklen qukʼil? Jaku. Aju aj qyolin tukʼil Jehová ik tten ik tzeʼn aj qyolin tukʼil jun tbʼanel qamiw. Jaku txi qqʼamaʼn te tkyaqilju in kubʼ qximen ex tkyaqilju in qnaʼn (Salmo 62:8). Ax ikx jaku txi qqanin xewbʼaj xjan te tuʼn qtzaj tonin tuʼn tkubʼ qbʼinchaʼn aju bʼaʼn (Lucas 11:13). Ex tbʼanel qa ma txi qqanin qnabʼil te tuʼn tjaw qjyoʼn aju mas tbʼanel ex tuʼn qex kywitz nya bʼaʼn (Santiago 1:5). Il tiʼj tuʼn t-xi qqanin nim maj te tuʼn tkubʼ tnajsaʼn qil (Efesios 1:3, 7). Ax ikx il tiʼj tuʼn qnaʼn Dios kyiʼj txqantl, ik tzeʼn qe toj qja ex qeju qerman (Hechos 12:5; Colosenses 4:12).

12. ¿Alkye mas nim toklen toj qnaʼj Dios?

¹² ¿Alkye mas nim toklen toj qnaʼj Dios? A Jehová ex aju tajbʼil. Il tiʼj tuʼn t-xi qqʼoʼn chjonte te Jehová tuʼn tkyaqil qanmi tiʼj tkyaqilju o bʼant tuʼn qiʼj (1 Crónicas 29:10-13). Tej kyxi t-xnaqʼtzaʼn Jesús qe xjal e ok lepeʼ tiʼj, xi tyekʼin kye alkye at mas toklen toj naʼj Dios (kjawil uʼjit Mateo 6:9-13). Tqʼama qa tnejel kxel qqanin tuʼn tok tbʼi Dios te xjan moqa te saq. Ax ikx xi tyekʼin Jesús qa il tiʼj tuʼn t-xi qqanin tuʼn tul Tkawbʼil Dios ex tuʼn tbʼant tajbʼil twitz tkyaqil Txʼotxʼ. Tqʼama qa oʼkx qa ma  chex qqanin jlu tnejel, jakutzun txi qqanin aju qe qajbʼil. Aj tkubʼ qqʼoʼn Jehová ex aju tajbʼil tnejel toj qnaʼj Dios, in kubʼ qyekʼin alkye mas nim toklen toj qwitz.

13. ¿Jniʼ ambʼil qo naʼl Dios?

¹³ ¿Jniʼ ambʼil qo naʼl Dios? Mintiʼ in tzaj tqʼamaʼn Tyol Dios. Noq alqiʼj in qo naʼn Dios at maj chʼin kyqan ex at maj nim kyqan. Jun techel, aj qwaʼn jaku tzʼok qqʼoʼn jun naʼj Dios chʼin tqan, noqtzun tuʼnj, mas  nim tqan qa kxel qqʼoʼn chjonte te Jehová moqa kxel qqʼamaʼn aju nya bʼaʼn in tzaj qiʼj (1 Samuel 1:12, 15). Nya qaj tuʼn qnaʼn Dios nim ambʼil noq tuʼn qok keʼyin kyuʼn txqantl, ik tzeʼn in bʼanttoq kyuʼn junjun xjal toj tqʼijlalil Jesús (Lucas 20:46, 47). Nya nim kyoklen naʼj Dios lu toj twitz Jehová. Taj tuʼn t-xi qqʼamaʼn te aju tkuʼx toj qanmi.

14. a) ¿Jteʼ maj qo naʼl Dios? b) ¿Tiʼ in tzaj t-xnaqʼtzaʼn jlu qe tiʼj Jehová?

¹⁴ ¿Jteʼ maj qo naʼl Dios? Taj Jehová tuʼn kukx qyolin tukʼil. In tzaj tqʼamaʼn Tyol jlu: «Che naʼne Dios», ex «miʼn che qʼajene tuʼn kynaʼne Dios» (Mateo 26:41; Romanos 12:12; 1 Tesalonicenses 5:17). Kukx taj Jehová tuʼn qtzaj tbʼiʼn. Tkyaqil qʼij jaku txi qqʼoʼn chjonte te tiʼj tkʼujlabʼil ex tiʼj t-xtalbʼil. Ax ikx jaku txi qqanin te  tuʼn ttzaj tyekʼin qbʼe ex tuʼn ttzaj tqʼoʼn qipun ex qʼuqbʼil qkʼuʼj. Qa nim toklen naʼj Dios toj qwitz, ok qo yolil tukʼil Jehová toj tkyaqil ambʼil.

15. ¿Tiquʼn il tiʼj tuʼn t-xi qqʼamaʼn «ikxwitju» aj qbʼaj naʼn Dios?

¹⁵ ¿Tiquʼn il tiʼj tuʼn t-xi qqʼamaʼn «ikxwitju» moqa amén aj qbʼaj naʼn Dios? Aju yol «ikxwitju» in tzaj tyekʼin qa qaj tuʼn tbʼant aju in xi qqanin. Aj t-xi qqʼamaʼn, in kubʼ qyekʼin qa ax tok aju ma txi qqʼamaʼn toj qnaʼj Dios (Salmo 41:13). Ax ikx in tzaj t-xnaqʼtzaʼn Tyol Dios qa tbʼanel tuʼn t-xi qqʼamaʼn «ikxwitju» aj tok qʼoʼn jun naʼj Dios kyxol txqantl, qa tukʼil tqʼajqʼajel qwiʼ moqa noq toj qanmi. Tukʼil jlu in kubʼ qyekʼin qa bʼaʼn ma tzʼela toj qwitz aju ma txi qanet (1 Crónicas 16:36; Apocalipsis 5:14).

16. ¿In tzajpe ttzaqʼweʼn Jehová qnaʼj Dios? Chikʼbʼantza.

¹⁶ ¿Axpe tok in tzaj ttzaqʼweʼn Jehová qnaʼj Dios? Ax tok. In tzaj tqʼamaʼn Xjan Uʼj qa in tzaj tbʼiʼn Jehová qnaʼj Dios ex qa ktzajel ttzaqʼweʼn (Salmo 65:2; Isaías 30:19). In tzaj tbʼiʼn Jehová kynaʼj Dios nimxix xjal aju axix tok kyuʼn ex in che tzaj ttzaqʼweʼn toj nimku tten.

17. ¿Alkye tten in che ajbʼen anjel tuʼn Jehová ex qe tmajen tuʼn ttzaj ttzaqʼweʼn qnaʼj Dios?

¹⁷ In che ajbʼen anjel tuʼn Jehová ex qe tmajen tuʼn kytzaj ttzaqʼweʼn qnaʼj Dios (Hebreos 1:13, 14). Nim xjal o txi kyqanin onbʼil toj naʼj Dios tuʼn tel kynikʼ tiʼj Xjan Uʼj, ex yajxitl e pon testigos de Jehová visitaril kye. A jlu in tzaj tyekʼin qa in che kubʼ nej anjel tuʼn t-xi pakbʼet «tqanil kolbʼil» twitz tkyaqil Txʼotxʼ (kjawil uʼjit Apocalipsis 14:6). Ax ikx, nim qe o qo naʼn Dios te Jehová tuʼnju attoq jun nya bʼaʼn moqa tuʼnju qajtoq jun tiʼ, ex o qo tzaj tonin jun erman (Proverbios 12:25; Santiago 2:16).

18. ¿Alkye tten in najbʼen xewbʼaj xjan tuʼn Jehová ex Tyol tuʼn kytzaj ttzaqʼweʼn qnaʼj Dios?

 ¹⁸ Ax ikx in najbʼen xewbʼaj xjan tuʼn Jehová tuʼn kytzaj ttzaqʼweʼn qnaʼj Dios. Aj t-xi qqanin onbʼil te tuʼn qex twitz jun nya bʼaʼn, jakulo tzʼajbʼen xewbʼaj xjan tuʼn tuʼn ttzaj tyekʼin qbʼe ex tuʼn ttzaj tqʼuqbʼaʼn qkʼuʼj (2 Corintios 4:7). Nya oʼkxju, ax ikx in najbʼen Xjan Uʼj tuʼn Jehová tuʼn kytzaj ttzaqʼweʼn qnaʼj Dios ex tuʼn qtzaj tonin tuʼn tjaw qjyoʼn aju mas tbʼanel. Aj tkubʼ quʼjin Tyol Dios jakulo che kanet junjun taqikʼ quʼn aʼyeju jaku che onin qiʼj. Ax ikx jaku tzʼajbʼen jun qerman tuʼn Jehová aj ttzaj tqʼoʼn jun tyol toj chmabʼil aju jaku tzʼonin qiʼj. Ex jaku tzʼajbʼen jun ansyan tuʼn tuʼn ttzaj tyekʼin jun tbʼanel qnabʼil toj Tyol Dios (Gálatas 6:1).

19. ¿Tiquʼn jaku kubʼ qximen qa mintiʼ in che tzaj ttzaqʼweʼn Jehová qnaʼj Dios?

¹⁹ Qa o kubʼ t-ximana jun maj tiquʼn mintiʼ o tzaj ttzaqʼweʼn Jehová jun tiʼ xi tqanina te, naʼntza qa ojtzqiʼn tuʼn toj alkye ambʼil ex alkye tten tzul ttzaqʼweʼn jlu. Ojtzqiʼnxix tuʼn Jehová aju at tajbʼen qe. Pero at maj il tiʼj tuʼn kukx txi qqanin toj jun ambʼil tuʼntzun tkubʼ qyekʼin qa nim toklen toj qwitz aju in xi qqanin te ex qa qʼuqli qkʼuʼj tiʼj (Lucas 11:5-10). At maj in qo tzaj ttzaqʼweʼn Jehová toj jun tten aju mintiʼ ximen quʼn. Jun techel, jakulo qo naʼn Dios aj ttzaj jun nya bʼaʼn qiʼj, noqtzun tuʼnj, in kubʼ t-ximen Jehová tuʼn miʼn tel tiʼn, noq oʼkx in tzaj tqʼoʼn qipun tuʼn tikʼx quʼn (kjawil uʼjit Isaías 40:2).

20. ¿Tiquʼn kukx tuʼn qnaʼn Dios?

²⁰ Jaku txi qqʼamaʼn qa aju naʼj Dios jun tbʼanelxix oyaj o tzaj tqʼoʼn Jehová qe. Qʼuqli qkʼuʼj qa in qo tzaj tbʼiʼn (Salmo 145:18). Ex qa kukx xqo naʼn Dios te tuʼn tkyaqil qkʼuʼj, mas kchʼiyel qamiwbʼil tukʼil.