XNAQʼTZBʼIL 8
¿Tiʼ aju Tkawbʼil Dios?
1. ¿Alkye tbʼanel naʼj Dios qo yolil tiʼj toj xnaqʼtzbʼil lu?
NIM millón xjal ojtzqiʼn kyuʼn aju naʼj Dios kyaj t-xnaqʼtzaʼn Jesús. Ajbʼen naʼj Dios lu tuʼn tuʼn t-xi t-xnaqʼtzaʼn qe xjal e ok lepeʼ tiʼj tuʼn kynaʼn Dios. ¿Tiʼ xi tqanin Jesús toj naʼj Dios lu? ¿Tiquʼn nim toklen tuʼn tel qnikʼ tiʼj tiʼ t-xilen?
2. ¿Alkye oxe tiʼ nim toklen kyaj t-xnaqʼtzaʼn Jesús tuʼn t-xi qqanin toj naʼj Dios?
2 Tqʼama Jesús jlu: «Che naʼne Dios kyjaʼ: A Qman ata tuj kyaʼj, tenwt tchiylal tbʼiya qeye. E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (kjawil uʼjit Mateo 6:9-13). ¿Tiquʼn kyaj t-xnaqʼtzaʼn Jesús tuʼn t-xi qqanin qeju oxe tiʼchaq lu? (Qʼonka twitza tiʼj tqanil 20).
3. Chikʼbʼantza tiʼ qo xnaqʼtzal tiʼj toj xnaqʼtzbʼil lu.
3 O tzʼel qnikʼ tiʼj qa Jehová tbʼi Dios. Ax ikx o tzʼel qnikʼ tiʼj alkye t-xim Dios at kye xjal ex tiʼj Txʼotxʼ. Noqtzun tuʼnj, ¿alqiʼj in yolintoq Jesús tej tqʼama: «E ttzaj ju tkawbʼila»? Toj xnaqʼtzbʼil lu kʼelel qnikʼ tiʼj tiʼ aju Tkawbʼil Dios, tiʼ kbʼantel tuʼn ex alkye tten kʼokel tbʼi Jehová te saq tuʼn.
¿TIʼ AJU TKAWBʼIL DIOS?
4. ¿Tiʼ aju Tkawbʼil Dios ex alkye kʼokel te aj Kawil?
4 Aju Tkawbʼil Dios atz in yolin tiʼj jun kawbʼil o kubʼ tqʼoʼn Jehová toj kyaʼj. O jaw tjyoʼn Dios Jesús tuʼn tok te aj Kawil toj Tkawbʼil. In tzaj tqʼamaʼn Tyol Dios qa a Jesús «Rey kyibʼaj kykyaqil qe rey, ex atzun Kyajaw kykyaqil qeju at kyoklen» (Apocalipsis 19:16). Jaku bʼant nimku tbʼanel tiʼchaq tuʼn Jesús qiʼj twitz alkyexku juntl aj kawil twitz Txʼotxʼ. Qa ma tzʼok kymojbʼan kyibʼ kykyaqil aj kawil, mas at tipumal Jesús kywitz.
5. ¿Jatumel kkawil Tkawbʼil Dios, ex alqibʼaj kkawil?
5 Aj meltzʼaj Jesús toj kyaʼj tej tikʼ 40 qʼij tjawlen anqʼin. Tej tbʼet ambʼil, xi tqʼoʼn Jehová toklen te aj Kawil toj Tkawbʼil (Hechos 2:33). Tzmax toj kyaʼj kkawil Tkawbʼil Dios kyibʼaj xjal twitz Txʼotxʼ (Apocalipsis 11:15). Tuʼntzunju in tzaj tqʼamaʼn Tyol Dios qa atz taʼ «tkawbʼil [Jehová] tuj kyaʼj» (2 Timoteo 4:18).
6, 7. ¿Tiquʼn a Jesús mas tbʼanel aj kawil?
6 In tzaj tqʼamaʼn Tyol Dios qa a Jesús mas tbʼanel aj kawil twitz alkyexku juntl aj kawil, tuʼnju «mlay kyimtl» (Romanos 6:9). Kykyaqil qe aj kawil te twitz txʼotxʼ in che kyim, atzunte Jesús mlayx kyim. Tuʼntzunju, aʼyeju tbʼanel tiʼchaq che bʼantel tuʼn ok che tel te jumajx.
7 Ax ikx in tzaj tqʼamaʼn Tyol Dios qa toj tumel kkawil Jesús ex qa tzul qʼaqʼen tkʼuʼj kyiʼj xjal. Kyaj qʼamaʼn jlu tiʼj: «Kukx ktel T-xew Qman tukʼil tiyjil David ex kxel tqʼoʼn tojtzqibʼl tuʼn tel tnikʼ tiʼj tkyaqil; kxel tqʼoʼn tnabʼl ex tipumal, kʼelel tnikʼ tiʼj tajbʼil Qman ex knimal te». Ax ikx in tzaj tqʼamaʼntl: «Mlay che ok xjal tuj xjel tuʼn noq tuʼnju ok tkeʼyinte alkye kyten xjal, ex mlay bʼant kyiʼj xjal noq tuʼnju in tbʼiʼn. Tuj tumelxix kxel tbʼinchaʼn kyiʼj qe xjal mintiʼ kyipun» (Isaías 11:2-4). ¿Taj teya tuʼn tkawin jun aj kawil ik tzeʼn jlu?
8. ¿Tiquʼn in xi qqʼamaʼn qa nya tjunalx Jesús kkawil?
8 In tzaj tqʼamaʼn Xjan Uʼj qa o che jaw tjyoʼn Dios junjun xjal tuʼn kykawin tukʼil Jesús toj kyaʼj. Jun techel, xi tqʼamaʼn apóstol Pablo jlu te Timoteo: «Qa ma tzikʼx quʼn, ax ikx qo kawil junx tukʼil» (2 Timoteo 2:12). ¿Jteʼ xjal che kawil tukʼil Jesús?
9. a) ¿Jteʼ xjal che kawil tukʼil Jesús? b) ¿Toj alkye ambʼil tzaj tzyet tuʼn kyjaw tjyoʼn Jehová qeju 144,000?
9 Ik tzeʼn el qnikʼ tiʼj toj xnaqʼtzbʼil 7, ok tkeʼyin Juan toj jun witzikʼ qa in kawin Jesús ex qeju 144,000. ¿Alkye qeju 144,000 lu? Ax Juan in tzaj tzaqʼwente jlu qe: «Atzun qe jlu in che ok lpeʼ tiʼj Tal Ẍneʼl noq jaʼx jatum in xiʼ. Atzun qe jlu e kolpet kyxol xjal tuʼn kyok te jun oyaj te Dios ex teju Tal Ẍneʼl, ik tzaʼn tnejel twitz awal in xi qʼot te Dios» (kjawil uʼjit Apocalipsis 14:1, 4). A Jesús aju Tal Ẍneʼl. Atzun qeju 144,000 atz in yolin kyiʼj okslal kukx in che ajbʼen te Dios ex o che jaw jyoʼn tuʼn kykawin «kyibʼaj xjal twitz txʼotxʼ» junx tukʼil Jesús. Aj in che kyim, in tzaj qʼoʼn kychwinqlal toj kyaʼj (Apocalipsis 5:10). Tzaj tzyet tuʼn kyjaw tjyoʼn Jehová qeju 144,000 toj tnejel syent abʼqʼi.
10. ¿Tiquʼn jun yekʼbʼil tiʼj tkʼujlabʼil Jehová tuʼnju o jaw tjyoʼn Jesús ex qeju 144,000 tuʼn kykawin kyibʼaj xjal?
10 Tuʼnju at-xix tkʼuʼj Jehová qiʼj, o che jaw tjyoʼn junjun xjal tuʼn kykawin tukʼil Jesús. Ax ikx te Jesús kʼokel te jun tbʼanel aj kawil tuʼnju ok te xjal ex ikʼx nim nya bʼaʼn tuʼn. Tqʼama apóstol Pablo qa ojtzqiʼn tuʼn Jesús aju in qnaʼn ex jaku tzʼel tnikʼ qiʼj qa «mintiʼ qipun», tuʼnju ax ikx te «ok [...] tuj joybʼil tiʼj ik tzaʼn qe» (Hebreos 4:15; 5:8). Ax ikx qeju 144,000 in nel kynikʼ qiʼj tuʼnju ax ikx kye aj il qe ex in tzaj kyyabʼ. Tuʼntzunju jaku tzʼok qeʼ qkʼuʼj tiʼj qa kʼelel tnikʼ Jesús ex qeju 144,000 tiʼjju in qnaʼn ex tiʼjju nya bʼaʼn in tzaj qiʼj.
¿TIʼ KBʼANTEL TUʼN TKAWBʼIL DIOS?
11. ¿Tiquʼn kyaj t-xnaqʼtzaʼn Jesús tuʼn t-xi qqanin tuʼn tbʼant tajbʼil Jehová toj kyaʼj?
11 Xi tqanin Jesús toj naʼj Dios tuʼn tbʼant tajbʼil Jehová twitz Txʼotxʼ ex toj kyaʼj. ¿Tiquʼn xi tqanin tuʼn tbʼant tajbʼil Dios toj kyaʼj? El qnikʼ tiʼj toj xnaqʼtzbʼil 3 qa el tpan tibʼ Satanás tiʼj Dios. Xi tqʼoʼn Jehová ambʼil te Satanás ex qeju nya bʼaʼn anjel tuʼn kykyaj ten jun ambʼil toj kyaʼj. Tuʼntzunju nya kykyaqil qeju in che anqʼintoq toj kyaʼj in bʼanttoq tajbʼil Jehová kyuʼn. Toj xnaqʼtzbʼil 10 kʼelel mas qnikʼ tiʼj Satanás ex qe nya bʼaʼn anjel.
12. ¿Alkye kabʼe tiʼ nim kyoklen in tzaj qʼamaʼn toj Apocalipsis 12:10?
12 Kyaj tqʼamaʼn Tyol Dios qa oktoq kqʼojel Jesús tukʼil Satanás aj t-xi qʼoʼn toklen tuʼn tkawin toj Tkawbʼil Dios (kjawil uʼjit Apocalipsis 12:7-10). Atzun toj Apocalipsis 12:10 in tzaj qʼamaʼn kabʼe tiʼ nim kyoklen. Tnejel, qa in xi tzyet tuʼn tkawin Jesús. Ex tkabʼ, in kutz xoʼn Satanás twitz Txʼotxʼ. Ik tzeʼn qo xnaqʼtzal tiʼj, o che ikʼ qeju kabʼe tiʼchaq lu.
13. ¿Tiʼ bʼaj toj kyaʼj tej tetz xoʼn Satanás?
13 Nimxix e jaw tzalaj qe tbʼanel anjel tej tetz xoʼn Satanás ex qe nya bʼaʼn anjel toj kyaʼj. In tzaj tqʼamaʼn Tyol Dios jlu: «Tzalajxa kyaʼj, ex che tzalajxe aqeye najl qeye tuj kyaʼj» (Apocalipsis 12:12). Toj ambʼil jaʼlo at mujbʼabʼil toj kyaʼj tuʼnju kykyaqil qeju ateʼ toj kyaʼj in bʼant tajbʼil Dios kyuʼn.
O tzaj nim nya bʼaʼn kyiʼj xjal atxix tej tetz xoʼn Satanás ex qe nya bʼaʼn anjel toj kyaʼj. Noqtzun tuʼnj, ya chʼix tbʼaj kʼixkʼoj lu.
14. ¿Tiʼ in bʼaj twitz Txʼotxʼ atxix tej tetz xoʼn Satanás toj kyaʼj?
14 Atzun tzalu twitz Txʼotxʼ, junxitl qanqʼibʼil at. At nim yajbʼil tuʼnju o kutz xoʼn «tajaw il» ex at «nim tqʼoj, porke bʼaʼn tuʼn mya nim qʼij tuʼn ttentl» (Apocalipsis 12:12). O tzaj nim tqʼoj Satanás tuʼnju o tzʼetz xoʼn toj kyaʼj ex tuʼnju ojtzqiʼn tuʼn qa chʼix tkubʼ najsaʼn. Tuʼntzun jlu, in kubʼ tbʼinchaʼn alkyexku tiʼ tuʼn ttzaj kʼixkʼoj ex yajbʼil kyiʼj kykyaqil xjal.
15. ¿Alkye t-xim Dios at tiʼj Txʼotxʼ?
15 Noqtzun tuʼnj, naʼmx tchʼexpaj t-ximbʼetz Dios tiʼj Txʼotxʼ. Kukx taj tuʼn tok te jun tbʼanel najbʼil, tuʼn kyok xjal te tzʼaqli ex tuʼn kyanqʼin te jumajx (Salmo 37:29). ¿Tzeʼn kbʼantel tkyaqil jlu tuʼn Tkawbʼil Dios?
16, 17. ¿Tiʼ in tzaj t-xnaqʼtzaʼn qe aju kyaj qʼamaʼn toj Daniel 2:44?
16 Kyaj qʼamaʼn jlu toj Daniel 2:44: «Tuj kyqʼijlalil qe rey lu, ate Dios aju at tuj kyaʼj kbʼel tqʼoʼn jun kawbʼil mlay naj ex mlay kubʼ tiʼj tuʼn juntl nasyon, noq oʼkx che bʼel bʼaj kykyaqil mastl kawbʼil tuʼn, atzunte kukx ktel te jumajx». ¿Tiʼ in tzaj t-xnaqʼtzaʼn aju yol kyaj qʼamaʼn tiʼj Tkawbʼil Dios?
17 Tnejel, in tzaj t-xnaqʼtzaʼn qa aju Tkawbʼil Dios oktoq kxel tzyet tuʼn tkawin «tuj kyqʼijlalil qe rey». A jlu in tzaj tyekʼin qa ateʼx aj kawil tzalu twitz Txʼotxʼ aj t-xi tzyet tuʼn tkawin Tkawbʼil Dios. Tkabʼ, in tzaj t-xnaqʼtzaʼn qe qa aju Tkawbʼil Dios ktel te jumajx ex qa mlay tzʼok juntl te t-xel. Ex toxin, qa aʼyeju aj kawil twitz Txʼotxʼ ok che qʼojel tiʼj Tkawbʼil Dios. Pero kbʼel kyiʼj tuʼn Tkawbʼil Dios ex oʼkx Tkawbʼil Dios kkawil tibʼaj Txʼotxʼ. Aj tjapun twiʼ yol lu, ok kkawil aju mas tbʼanel aj kawil kyibʼaj xjal.
18. ¿Tiʼ tbʼi qʼoj kʼokel tuʼn Tkawbʼil Dios kyukʼil aj kawil?
18 ¿Tiʼ kbʼajel toj ambʼil jatumel chʼixtoq tok qʼoj kyuʼn aj kawil tukʼil Tkawbʼil Dios? Che sbʼul qe nya bʼaʼn anjel kyiʼj qe «rey tuj tkyaqil twitz txʼotxʼ tuʼn kyok kychmoʼn, tuʼntzun kyqʼojin tiʼj Dios tuj jun qʼij maʼ toklen, aju Dios at tipumal tuʼn tbʼant tkyaqil tuʼn». Aju qʼoj lu in nok tbʼi te Armagedón, atz jatumel che qʼojel qe aj kawil tiʼj Tkawbʼil Dios (Apocalipsis 16:14, 16; qʼonka twitza tiʼj tqanil 10).
19, 20. ¿Tiquʼn il tiʼj tuʼn tkawin Tkawbʼil Dios?
19 ¿Tiquʼn il tiʼj tuʼn tkawin Tkawbʼil Dios? At oxe tiquʼn. Tnejel, tuʼnju aj il qoʼ, in qo yabʼti ex in qo kyim. Atzun tjaqʼ Tkawbʼil Dios qo anqʼil te jumajx. Axpe ikx tqʼama Jesús jlu: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:16).
20 Tkabʼ, tuʼnju in qo anqʼin kyxol nim nya bʼaʼn xjal. Nim qe xjal in che yolin nya ax tok yol, in che sbʼun ex in che kubʼ koẍeʼ tukʼil alkyexku, ex mlay tzʼel qiʼn ambʼil kye tuʼn tbʼant kyuʼn. Atzunte Jehová jaku tzʼel tiʼn ambʼil kye. Qa mintiʼ xkubʼ kychʼixpun kyibʼ, ok che kbʼel tnajsaʼn toj Armagedón (kjawil uʼjit Salmo 37:10). Ex toxin tiquʼn qaj tuʼn tkawin Tkawbʼil Dios, tuʼnju nya bʼaʼn qe aj kawil, eleqʼqe, ex mlay kyaj tkyaqil nya bʼaʼn kyuʼn toj ttxolil. Ax ikx nya kyaj tuʼn kyonin kyiʼj xjal tuʼn kybʼin te Dios. Ax tok aju in tzaj tqʼamaʼn Tyol Dios qa «aju tipumal xjal at tuʼn tbʼinchante mya bʼaʼn tiʼj juntl» (Eclesiastés 8:9).
21. ¿Tzeʼn kbʼantel tajbʼil Dios tuʼn Tkawbʼil tzalu twitz Txʼotxʼ?
21 Aj tbʼaj Armagedón, kjapunel bʼaj twiʼ aju tajbʼil Dios tuʼn Tkawbʼil tzalu twitz Txʼotxʼ. Jun techel, kbʼelex jupuʼn Tajaw il ex qe nya bʼaʼn t-anjel (Apocalipsis 20:1-3). Aj tbʼet ambʼil, mi jun xjal kyabʼtel ex kkyimel. Tuʼnju kyim Jesús, kykyaqil xjal ok che anqʼil te jumajx toj Tbʼanel Najbʼil (Apocalipsis 22:1-3; qʼonka twitza tiʼj tqanil 21). Ax ikx kʼokel tbʼi Dios te xjan moqa te saq tuʼn Tkawbʼil Dios. ¿Tiʼ t-xilen jlu? Qa kykyaqil xjal kʼokel kyqʼoʼn toklen tbʼi Dios aj tkawin Tkawbʼil.
¿TOJ ALKYE AMBʼIL XI TZYET TUʼN TKAWIN JESÚS?
22. ¿Tiquʼn jaku txi qqʼamaʼn qa mintiʼ xi tzyet tuʼn tkawin Jesús tej tten tzalu twitz Txʼotxʼ nix tej tjapun toj kyaʼj?
22 Tej tten Jesús twitz Txʼotxʼ, xi t-xnaqʼtzaʼn kye qeju e ok lepeʼ tiʼj tuʼn t-xi kyqanin jlu toj kynaʼj Dios: «E ttzaj ju tkawbʼila». A jlu in tzaj tyekʼin qa naʼmxtoq tul Tkawbʼil Dios. Tnejel iltoq tiʼj tuʼn tkubʼ tqʼoʼn Jehová Tkawbʼil ex tuʼn t-xi tqʼoʼn toklen Jesús te aj Kawil. ¿Okpe qʼoʼn naj toklen tej tjapun toj kyaʼj? Mintiʼ. Iltoq tiʼj tuʼn tayon Jesús. Tej otoqxi jaw anqʼin Jesús, tzaj tchikʼbʼaʼnxix apóstol Pedro ex Pablo aju ximbʼetz lu. Kyqʼama qa aju yol kyaj qʼamaʼn toj Salmo 110:1 in japuntoq twiʼ tiʼj Jesús. Toj yol lu, otoq tzaj tqʼamaʼn Jehová jlu: «Qekuya tuj nbʼanqʼabʼe akutzun in kubʼ kyiʼj aj qʼoj tiʼja wuʼne» (Hechos 2:32-35; Hebreos 10:12, 13). A jlu in tzaj tyekʼin qa oktoq kbʼel tayoʼn Jesús ajxi t-xi tqʼoʼn Jehová toklen.
Kbʼantel tajbʼil Dios tuʼn Tkawbʼil tzalu twitz Txʼotxʼ
23. a) ¿Toj alkye ambʼil xi tzyet tuʼn tkawin Jesús toj Tkawbʼil Dios? b) ¿Tiʼ kʼelel qnikʼ tiʼj toj juntl xnaqʼtzbʼil?
23 ¿Toj alkye ambʼil xi tzyet tuʼn tkawin Jesús? Toj 1914. Naʼmxtoq tpon ambʼil lu, el kynikʼ jun kʼloj axix tok okslal qa nimtoq toklen abʼqʼi 1914 tuʼnju attoq toklen kyukʼil qe yol e kyaj qʼamaʼn toj Tyol Dios. Aju o tzikʼ twitz txʼotxʼ atxix toj 1914 in tzaj tyekʼin qa ax tok aju kyqʼama okslal lu. Toj abʼqʼi lu xi tzyet tuʼn tkawin Jesús (Salmo 110:2; qʼonka twitza tiʼj tqanil 22). Tej tikʼ chʼintl ambʼil, kutz xoʼn Satanás twitz Txʼotxʼ, ex jaʼlo «mya nim qʼij tuʼn ttentl» (Apocalipsis 12:12). Toj juntl xnaqʼtzbʼil kʼelel qnikʼ kyiʼj junjuntl yekʼbʼil qa in qo anqʼin kyoj nya nimtl qʼij lu. Ax ikx kʼelel qnikʼ tiʼj qa chʼix tbʼant tajbʼil Jehová tuʼn Tkawbʼil tzalu twitz Txʼotxʼ.
Bʼalo ax ikx tgana jlu
¿Toj alkye ambʼil tzaj tzyet tuʼn tkawin Tkawbʼil Dios? (Tnejel plaj)
Qa ojtzqiʼn tzaqʼwebʼil tuʼna, ¿jakupe txi tchikʼbʼaʼna te juntl tukʼil Tyol Dios?
