1. ¿Alkye xjel jaku ximana tiʼj aj tbʼaj t-xnaqʼtzaʼna uʼj lu?

TOJ uʼj lu, ma tzʼel tnikʼa tiʼj nimku axix tok xnaqʼtzbʼil tkuʼx toj Tyol Dios, kyxol jlu at aju ttziybʼil Dios tuʼn qanqʼin te jumajx, tiʼ in bʼaj qiʼj aj qkyim ex qa che jawil anqʼin kyimni (Eclesiastés 9:5; Juan 5:28, 29; Apocalipsis 21:3, 4). Olo txi tzyet tuʼn tbʼeta kyoj kychmabʼil testigos de Jehová ex qʼuqli tkʼuʼja kyiʼj qa aʼye axix tok okslabʼil (Juan 13:35). Ax ikx, olo txi tzyet tuʼn tten jun tbʼanel tamiwbʼila tukʼil Jehová ex o kubʼ t-ximana  tuʼn tajbʼena te. Tuʼntzunju jakulo kubʼ t-xjelina jlu: «¿Tiʼ mastl jaku bʼant wuʼne tuʼn wajbʼene te Dios?».

2. ¿Tiquʼn tajtoq jun xjal te Etiopía tuʼn tbautizarin?

² Atzun xjel lu ximen jun xjal te Etiopía tiʼj aju anqʼin toj tnejel syent abʼqʼi. Tej otoqxi jaw anqʼin Jesús, jun kyxol t-xnaqʼtzbʼen aju Felipe tbʼi, pakbʼan te xjal lu ex xi tyekʼin te qa a Jesús Mesías. Tbʼanelxix ela toj twitz xjal aju otoq tzʼel tnikʼ tiʼj ex tuʼntzunju tqʼama: «Lu jun aʼ lu; ¿myapelo bʼaʼn tuʼn nbʼyane [moqa tuʼn nbautizarine]?» (Hechos 8:26-36).

3. a) ¿Tiʼ xi tqʼamaʼn Jesús kye t-xnaqʼtzbʼen tuʼn tbʼant kyuʼn? b) ¿Alkye tten tuʼn tbautizarin jun xjal?

³ In tzaj tqʼamaʼn Tyol Dios qa taja tuʼn tajbʼena te Jehová, il tiʼj tuʼn tbautizarina moqa tuʼn tjaw aʼ twiʼya. Xi tqʼamaʼn Jesús jlu kye t-xnaqʼtzbʼen: «Kymanxe kye xjal tuʼn kyok te nxnaqʼtzbʼene kyuj kykyaqil nasyon, ex tuʼn kybʼyan kyuʼne» (Mateo 28:19). Ax Jesús kyaj qʼonte techel kywitz tej tbautizarin. Nya oʼkx jax qoʼn chʼin aʼ toj twiʼ, sino kux bʼaj tkyaqil t-xmilal toj aʼ (Mateo 3:16). Ax ikx aj tbautizarin jun okslal toj ambʼil jaʼlo, il tiʼj tuʼn tkuʼx bʼaj t-xmilal toj aʼ.

4. ¿Tiʼ in kubʼ tyekʼin jun xjal aj tbautizarin?

⁴ Aj tbautizarin jun xjal in kubʼ tyekʼin kywitz txqantl qa ax tok taj tuʼn tok te tamiw Dios ex tuʼn tajbʼen te (Salmo 40:7, 8). Tuʼntzunju jakulo kubʼ t-xjelina jlu: «¿Tiʼ il tiʼj tuʼn tbʼant wuʼne tuʼn nbautizarine?».

5. a) ¿Tiʼ il tiʼj tuʼn tbʼant tuʼna naʼmxtoq tbautizarina? b) ¿Tiquʼn nim toklen tuʼn t-xiʼya kyoj chmabʼil?

⁵ Naʼmxtoq tbautizarina, il tiʼj tuʼn tok tojtzqiʼna Jehová ex Jesús. Ya o txi tzyet jlu tuʼna tuʼnju in xnaqʼtzana tiʼj Tyol Dios (kjawil uʼjit Juan 17:3). Noqtzun tuʼnj,  nya oʼkx jlu tuʼn tbʼant tuʼna. In tzaj tqʼamaʼn Xjan Uʼj qa il tiʼj tuʼn tok tojtzqiʼna «tkyaqilju tajbʼil» Dios (Colosenses 1:9). Che onil kychmabʼil testigos de Jehová tiʼja tuʼn tchʼiy tamiwbʼila tukʼil Jehová. A jlu in tzaj tyekʼin qa nim toklen tuʼn kukx tbʼeta kyoj chmabʼil (Hebreos 10:24, 25).

6. ¿Jniʼ tojtzqibʼila il tiʼj tuʼn tten tiʼj Tyol Dios tuʼntzun tbautizarina?

⁶ Miʼn kubʼ t-ximana qa in nayon Jehová tuʼn tel tnikʼa tiʼj tkyaqil xnaqʼtzbʼil tkuʼx toj Tyol tuʼn tbautizarina. Mintiʼ bʼant jlu tuʼn tukʼilju xjal te Etiopía tej tbautizarin (Hechos 8:30, 31). At nimku tiʼchaq kukx kʼelel tnikʼa tiʼj Jehová (Eclesiastés 3:11). Pero tuʼn tbautizarina, il tiʼj tuʼn tok tojtzqiʼna ex tuʼn tten qʼuqbʼil tkʼuʼja kyiʼj xnaqʼtzbʼil nim kyoklen ateʼkux toj Xjan Uʼj (Hebreos 5:12).

7. ¿Tzeʼn o tzʼonin tiʼja aju o tzʼel tnikʼa tiʼj toj Tyol Dios?

⁷ In tzaj tchikʼbʼaʼn Xjan Uʼj qa «mlayx tzalaj Dios qiʼj» qa «mintiʼ qokslabʼl» (Hebreos 11:6). Kyjuʼtzun il tiʼj tuʼn tten qʼuqbʼil tkʼuʼja tuʼn tbautizarina. Ax ikx in tzaj tqʼamaʼn Tyol Dios qa at junjun xjal te tnam Corinto xi kybʼiʼn aju xi kyqʼamaʼn t-xnaqʼtzbʼen Jesús kye ex «xi kyokslaʼn ex e bʼyan» (Hechos 18:8). Chʼixme ax jlu in bʼaj tiʼja, tuʼnju in xnaqʼtzana tiʼj Tyol Dios o tzʼonin tiʼja tuʼn tten qʼuqbʼil tkʼuʼja tiʼjju o tzaj ttziyen Dios ex tiʼjju tej t-xi tqʼon tibʼ Jesús tuʼn tkyim tuʼntzun qklet tiʼj il ex kyimen (Josué 23:14; Hechos 4:12; 2 Timoteo 3:16, 17).

8. ¿Tiʼ kʼonil tiʼja tuʼn tyolina tiʼjju in nel tnikʼa tiʼj?

⁸ Kukx kchʼiyel qʼuqbʼil tkʼuʼja aj tel mas tnikʼa tiʼjju in tzaj t-xnaqʼtzaʼn Tyol Dios ex aj tel tnikʼa tiʼj tzeʼn in nonin tiʼja. A jlu kʼonil tiʼja tuʼn tten tajbʼila tuʼn tyolina  tiʼjju in nel tnikʼa tiʼj (Jeremías 20:9; 2 Corintios 4:13). ¿Alqukʼil jaku yolina?

9, 10. a) ¿Alqukʼil jaku pakbʼana tiʼjju o tzʼel tnikʼa tiʼj? b) ¿Tiʼ kbʼantel tuʼna qa taja tuʼn texa pakbʼal kyukʼil testigos de Jehová?

⁹ Jakulo yolina tiʼjju in nel tnikʼa tiʼj kyukʼil toj tjaya, kyukʼil tamiwa, kyukʼil xjal in che anqʼin ttxlaj tjaya, kyukʼil tukʼila toj tja xnaqʼtzbʼil moqa toj aqʼuntl. Tbʼanelxix qa ma bʼant jlu tuʼna. Noqtzun tuʼnj, bʼinchama toj tumel ex tukʼil tbʼanel tmoda. Aj tbʼet ambʼil, jaku tzʼexa pakbʼal kyukʼil testigos de Jehová. Qa ma bʼant ttena, jaku yolina tukʼil erman in qʼon xnaqʼtzbʼil teya ex jaku txi tqʼamaʼna te qa taja tuʼn texa pakbʼal kyukʼil txqantl. Qa ma tzʼel tnikʼ erman tiʼj qa in nanqʼina ik tzeʼn in tzaj tqʼamaʼn Tyol Dios ex qa ma bʼant ttena, kykabʼile kʼokel kychmon kyibʼe tuʼn kyyoline kyukʼil kabʼe ansyan.

¹⁰ Toj chmabʼil lu, che yolil ansyan tukʼila tuʼn tel kynikʼ tiʼj qa in nel tnikʼa ex qa qʼuqli tkʼuʼja kyiʼj axix tok xnaqʼtzbʼil toj Tyol Dios, ex qa in kubʼ tanqʼina. Ax ikx kyaj tuʼn tel kynikʼ tiʼj qa ax tok taja tuʼn toka te testigo de Jehová. Bʼaʼn tuʼn ttzaj tnaʼna qa in che xqʼuqin ansyan kyiʼj kykyaqil qeju in che pon toj Ja te Chmabʼil, ax ikx tiʼja. Tuʼntzunju miʼn tzaj xobʼa tuʼn tyolina kyukʼil (Hechos 20:28; 1 Pedro 5:2, 3). Aj kybʼaj yoline, kxel kyqʼamaʼn ansyan teya qa jaku tzʼexa pakbʼal kyukʼil testigos de Jehová.

11. ¿Tiquʼn il tiʼj tuʼn tbʼant junjun chʼixpubʼil tuʼna naʼmxtoq texa pakbʼal?

¹¹ Jakulo tzaj kyqʼamaʼn ansyan teya qa il tiʼj tuʼn tbʼant junjun chʼixpubʼil tuʼna naʼmxtoq texa pakbʼal. ¿Tiquʼn il tiʼj? Tuʼnju aj qpakbʼan, in qo yolin tiʼj Dios. Tuʼntzunju il tiʼj tuʼn tjaw qnimsaʼn tukʼilju in bʼant  quʼn toj qanqʼibʼil (1 Corintios 6:9, 10; Gálatas 5:19-21).

12. ¿Tiquʼn qkyaqilx il tiʼj tuʼn tajtz tiʼj qanmi?

¹² Atx juntl tiʼ il tiʼj tuʼn tbʼant tuʼna naʼmxtoq tbautizarina. Tqʼama apóstol Pedro jlu: «Tajtztzun tiʼj kyanmiye, ex kyajtz meltzʼaje tukʼil Dios tuʼn tkubʼ najset kyile» (Hechos 3:19). ¿Tiʼ t-xilen aju tuʼn tajtz tiʼj qanmi? Atz in yolin jlu tiʼj tuʼn ttzajxix qbʼis tuʼnju nya bʼaʼn o bʼant quʼn. Jun techel, qa o yaẍina moqa o kubʼ tbʼinchaʼna junjun il tukʼil t-xmilala, il tiʼj tuʼn tajtz tiʼj tanmiya. ¿Yajtzun qa o tzʼok tilil tuʼna tuʼn t-xi tbʼinchaʼna tkyaqil toj tumel? Ax ikx il tiʼj tuʼn tajtz tiʼj tanmiya, tuʼnju qkyaqilx aj il qoʼ ex qaj tuʼn tkubʼ tnajsaʼn Dios qil (Romanos 3:23; 5:12).

13. ¿Tiʼ t-xilen aju tuʼn tajtz meltzʼaja?

¹³ ¿Oʼkxpe tuʼn ttzaj qbʼis tiʼjju otoq bʼant quʼn? Miʼn. Ax ikx tqʼamaʼn apóstol Pedro jlu: «Kyajtz meltzʼaje tukʼil Dios». A jlu in tzaj tyekʼin qa il tiʼj tuʼn tkyaj ttzaqpiʼna tkyaqilju nya bʼaʼn otoq bʼant tuʼna ex tuʼn t-xi tzyet tuʼn tkubʼ tbʼinchaʼna aju bʼaʼn. Ximana tiʼj jlu: ma txiʼya tnejel maj toj jun tnam. Aj tikʼ chʼin ambʼil, in nel tnikʼa tiʼj qa junxitl bʼe otoq txi tiʼna. ¿Tiʼ jaku bʼant tuʼna? Maslo chebʼe kxela, jaku weʼya ex jaku meltzʼaja tuʼntzun t-xiʼya toj tbʼeyil tnam jatumel taja tuʼn tpona. Chʼixme axju in bʼaj aj tok tena xnaqʼtzal tiʼj Tyol Dios, ok kʼelel tnikʼa tiʼj qa atx junjun tiʼ il tiʼj tuʼn tbʼaj tchʼixpuʼna toj tanqʼibʼila. Tuʼntzunju tzʼok tilil tuʼna tuʼn tajtz meltzʼaja, toj juntl yol, tuʼn tbʼaj tchʼixpuʼna junjun tiʼ toj tanqʼibʼila ex tuʼn t-xi tzyet tuʼn tkubʼ tbʼinchaʼna aju bʼaʼn.

14. ¿Tiʼ kbʼantel tuʼn jun xjal tuʼn t-xi tqʼamaʼn te Jehová qa taj tuʼn tajbʼen te?

¹⁴ Juntl tiʼ nim toklen tuʼn tbʼant tuʼna naʼmxtoq tbautizarina, aju tuʼn t-xi tqʼamaʼna te Dios qa taja tuʼn tajbʼena te. Qa taj jun xjal tuʼn tbʼant jlu tuʼn, in xi tqʼamaʼn toj jun naʼj Dios te Jehová qa taj tuʼn tkʼulin oʼkx te ex qa aju tajbʼil kʼokel te mas nim toklen toj tanqʼibʼil (Deuteronomio 6:15).

15, 16. ¿Tiʼ in nonin tiʼj jun xjal tuʼn t-xi tqʼamaʼn te Dios qa taj tuʼn tajbʼen te?

¹⁵ Aj t-xi qqʼamaʼn te Jehová qa oʼkx qo ajbʼel te, ik tten jlu ik tzeʼn aj t-xi ttziyen jun qʼa te jun txin aju kʼujlaʼn tuʼn qa taj tuʼn tten tukʼil toj tkyaqil tanqʼibʼil. Ximana kyiʼj qa tzma in nok kyojtzqin kyibʼ tuʼn kykubʼ mojeʼ. Aj tok tqʼoʼn twitz kuʼxun kyiʼj tbʼanel tmod txin, in nok tkʼujlaʼn ex taj tuʼn tkubʼ mojeʼ tukʼil. Nya jun saqchbʼil jlu, noqtzun tuʼnj, taj xjal lu tuʼn tok t-xqʼuqin xuʼj tuʼnju kʼujlaʼn tuʼn.

¹⁶ Aj tel mas tnikʼa tiʼj Jehová, ktel mas tkʼujlabʼila tiʼj ex kbʼantel alkyexku tiʼ tuʼna tuʼn tajbʼena te. A jlu kʼonil tiʼja tuʼn t-xi tqʼamaʼna te qa taja tuʼn tajbʼena te. Xi tqʼamaʼn Jesús jlu kye t-xnaqʼtzbʼen: «Qa at jun xjal taj tuʼn tok lpeʼ wiʼje, xkʼayink tibʼ teju tex tajbʼil» (Marcos 8:34). Aju tuʼn tkubʼ qxkʼayin qibʼ, a t-xilen tuʼn qbʼin te Jehová toj tkyaqil. Axpe ikx, mas kʼokel tqʼoʼna toklen tajbʼil Jehová twitzju teya tajbʼil ex twitzju in kubʼ t-ximana (kjawil uʼjit 1 Pedro 4:2).

17. ¿Tiquʼn mintiʼ in xi kyqʼamaʼn junjun xjal te Jehová qa kyaj tuʼn kyajbʼen te?

¹⁷ At junjun xjal mintiʼ in xi kyqʼamaʼn te Jehová qa  kyaj tuʼn kyajbʼen te tuʼnju in che tzaj xobʼ qa mlay japun twiʼ kyyol. Nyalo kyaj tuʼn ttzaj tbʼis kyuʼn. Moqa jaku kubʼ kyximen qa mlay tzaj tqanin Jehová tajlal kye tiʼjju in bʼant kyuʼn qa mintiʼ ma txi kytziyen tuʼn kyajbʼen te.

18. ¿Tiʼ jaku tzʼonin tiʼja tuʼn miʼn ttzaj xobʼa tuʼn tajbʼena te Jehová?

¹⁸ Jaku tzʼonin tkʼujlabʼila at tiʼj Jehová tuʼn miʼn ttzaj xobʼa. Ax ikx jaku tzʼonin tiʼja tuʼn tok tililxix tuʼna tuʼn tjapun twi tyola o txi ttziyena te (Eclesiastés 5:4; Colosenses 1:10). Ex nyaxix kwest kʼelel toj twitza tuʼn tbʼant tajbʼil Jehová tuʼna. Tqʼama apóstol Juan jlu: «Qa kʼujlaʼn Dios quʼn, che japunel qe tmandamyent quʼn; ex qe tmandamyent mya kyuw qe» moqa nya kwest tuʼn kyjapun (1 Juan 5:3).

19. ¿Tiquʼn mintiʼ tuʼn ttzaj xobʼa tuʼn t-xi tqʼamaʼna te Jehová qa taja tuʼn tajbʼena te?

¹⁹ Mintiʼ tuʼn qok te tzʼaqli tuʼn t-xi qqʼamaʼn te Jehová qa qaj tuʼn qajbʼen te. Mintiʼ in tzaj tqanin Jehová aju mlayx bʼant quʼn (Salmo 103:14). Ax ikx kʼonil tiʼja tuʼn tkubʼ tbʼinchaʼna aju bʼaʼn (Isaías 41:10). Ik tzeʼn in tzaj tqʼamaʼn Xjan Uʼj: «A Qman kxel ẍaqlun teya tuj bʼe jiqun tiʼj». Tuʼntzunju, qeʼk tkʼuʼja tiʼj Jehová tuʼn tkyaqil tanmiya (Proverbios 3:5, 6).

20. ¿Tiʼ juntl tiʼ kbʼantel tuʼna aj tbʼaj tqʼamaʼna te Jehová qa taja tuʼn tajbʼena te?

²⁰ Tzeʼn teya toj twitz, ¿mape bʼant ttena tuʼn t-xi tqʼamaʼna te Jehová qa taja tuʼn tajbʼena te? Qa ikju, aj tbʼaj tqʼamaʼna te Jehová tuʼn tajbʼena te, jakutzun bʼant tuʼn tbautizarina.

21, 22. ¿Tzeʼn jaku kubʼ tyekʼina qa at qʼuqbʼil tkʼuʼja?

²¹ Qʼamanxa te qʼol kyaqʼun kʼloj ansyan atz jatumel  in nok tchmon tibʼa qa o txi tqʼamaʼna te Jehová tuʼn tajbʼena te ex qa taja tuʼn tbautizarina. Ok kxel tqʼamaʼn kye junjuntl ansyan tuʼn tkubʼ kyxnaqʼtzaʼn tukʼila qeju xnaqʼtzbʼil nim kyoklen toj Tyol Dios. Aj tel kynikʼ tiʼj qa ma bʼant ttena, tzul kyqʼamaʼn teya tuʼn tbautizarina aj tok juntl nimaq chmabʼil kye testigos de Jehová. Ok kʼeletz qʼoʼn jun chikʼbʼabʼil toj nimaq chmabʼil jatumel tzul chikʼbʼaʼn tiʼ t-xilen  jlu. Aju ermano kʼeletz qʼonte chikʼbʼabʼil tzul tqanin kabʼe xjel nya kwest kye kykyaqil qeju che bautizaril. Aj t-xi ttzaqʼweʼna qe xjel lu, kbʼel tyekʼina qʼuqbʼil tkʼuʼja kywitz txqantl (Romanos 10:10).

²² Aj kybʼaj qanin xjel lu, oktzun kbautizarila. Ok kbʼelex bʼaj tkyaqil t-xmilala toj aʼ. Tuʼn jlu kbʼel tyekʼina  kywitz kykyaqil qa o txi tqʼamaʼna te Jehová tuʼn tajbʼena te ex qa tojx ambʼil aju, in noka te testigo de Jehová.

23. ¿Tiʼ t-xilen aju tuʼn qbautizarin «tuj tbʼi Dios Mambʼaj, ex tuj [tbʼi] Kʼwaʼlbʼaj, ex tuj tbʼi Xewbʼaj Xjan»?

²³ Tqʼama Jesús qa tuʼn kybautizarin qe t-xnaqʼtzbʼen «tuj tbʼi Dios Mambʼaj, ex tuj [tbʼi] Kʼwaʼlbʼaj, ex tuj tbʼi Xewbʼaj Xjan» (kjawil uʼjit Mateo 28:19). ¿Tiʼ kyxilen yol lu? Atz in yolin jlu tiʼj qa in nel qnikʼ tiʼj toklen Jehová ex tiʼj toklen Jesús o tzaj qʼoʼn tuʼn tjapun twiʼ t-xim Dios, ex tiʼj alkye tten in najbʼen xewbʼaj xjan tuʼn Jehová tuʼn tbʼant tajbʼil (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) ¿Tiʼ in kubʼ techlaʼn aju tuʼn qbautizarin? b) ¿Tiʼ qo xnaqʼtzal tiʼj toj juntl xnaqʼtzbʼil?

²⁴ At jun tiʼ nim toklen in kubʼ techlaʼn aju aj qbautizarin. Aj tkux bʼaj t-xmilala toj aʼ, in «kyima» tiʼj ojtxe tbʼinchbʼena, toj juntl yol, in kyaj ttzaqpiʼna. Ex aj tjatza toj aʼ, in xi tzyet jun akʼaj tanqʼibʼila tuʼn tajbʼena te Jehová. Tuʼn jlu in kubʼ tyekʼina qa ma tzʼoka te tmajen Dios. Bʼaʼn tuʼn ttzaj tnaʼna qa te Jehová ma txi tqʼamaʼna tuʼn tajbʼena te ex nya te jun xjal, nix te jun kʼloj xjal moqa te jun aqʼuntl.

²⁵ Aju ma txi tqʼamaʼna te Jehová kʼonil tiʼja tuʼn tchʼiy tamiwbʼila tukʼil (Salmo 25:14). Pero nya tuʼnju ma bautizarin jun xjal ya ma klet, tuʼnju tqʼama Jesús jlu: «Alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mateo 24:13). Kyjuʼtzun, aj qbautizarin oʼkx in xi tzyet tuʼn qajbʼen te Dios. Qa ikju, ¿tiʼ kbʼantel tuʼna tuʼn kukx toka te tamiw Jehová? Ok tzul tzaqʼweʼn xjel lu toj bʼajsbʼil xnaqʼtzbʼil tkuʼx toj uʼj lu.