1, 2. ¿Alkye junjun xjal e ok te tamiw Jehová?

¿ALKYE teya jaku jaw tjyoʼn tuʼn tok te tamiwa? Jakulo jaw tjyoʼna jun xjal in tzalaja aj ttena tukʼil, ateʼ tbʼanel tmod ex tbʼanel in nela toj twitza.

² O che jaw tjyoʼn Jehová junjun xjal tuʼn kyok te tamiw. Jun techel, ok Abrahán te tamiw Jehová (Isaías 41:8; Santiago 2:23). Ax ikx ok aj kawil David te tamiw Dios. Tbʼaneltoq in nela David toj twitz Jehová (Hechos 13:22). Ax ikx kʼujlaʼntoq Daniel tuʼn Jehová, toj juntl yol, nimtoq toklen toj twitz (Daniel 9:23).

3. ¿Tiquʼn ok Abrahán, David ex Daniel te tamiw Jehová?

³ ¿Tiquʼn ok Abrahán, David ex Daniel te tamiw Jehová? Xi tqʼamaʼn Jehová jlu te Abrahán: «Tuʼnju ma txi tnimana nyole» (Génesis 22:18). In nok Jehová te kyamiw qeju xjal in kubʼ kyin kyibʼ ex in che bʼin te. Axpe ikx jaku tzʼok Jehová te tamiw jun tnam. Tqʼama jlu tiʼj tnam Israel: «Tuʼn tbʼant kyniman weye tuʼntzun woke te Kydios, atzun kye tuʼn kyok te jun tnam etzan wuʼne» (Jeremías 7:23). Ax ikx teya, il tiʼj tuʼn t-xi tbʼiʼna aju in tzaj tqʼamaʼn Jehová qa ax tok taja tuʼn toka te tamiw.

4, 5. ¿Tzeʼn in che tzaj tonin Jehová qe tamiw?

⁴ In tzaj tqʼamaʼn Xjan Uʼj qa in jyoʼn Jehová junjun tten tuʼn t-xi «tqʼoʼn kyipun qeju axix tok nnoʼk qeʼ kykʼuʼj tiʼj» (2 Crónicas 16:9). In tzaj ttziyen Jehová toj Salmo  32:8 qa kxel tqʼoʼn kynabʼil ex tbʼanel xnaqʼtzbʼil kye tamiw.

⁵ At jun qajqʼoj nim tipumal ex nya taj tuʼn qok te tamiw Dios. Noqtzun tuʼnj, taj Jehová tuʼn tonin qiʼj (kjawil uʼjit Salmo 55:22). Tuʼnju o tzʼok qamiwin qibʼ tukʼil, in qo ajbʼen te tuʼn tkyaqil qanmi ex kukx in qo ajbʼen te noq tiʼxku in tzaj qiʼj. Ax ikx at qʼuqbʼil qkʼuʼj ik tzeʼn te David. Kubʼ ttzʼibʼin jlu tiʼj Jehová: «Tuʼnju at ntxlaje tuj nbʼanqʼabʼe, mlay chin yukche» (Salmo 16:8; 63:8). ¿Tiʼ in bʼant tuʼn Satanás tuʼn miʼn qok te tamiw Jehová?

6. ¿Tiʼ in tzaj tqʼamaʼn Satanás kyiʼj xjal?

⁶ Toj xnaqʼtzbʼil 11 el qnikʼ tiʼj qa yolin Satanás nya bʼaʼn tiʼj Jehová ex tqʼama qa mintiʼ xi tqʼoʼn ambʼil te Adán ex Eva tuʼn tbʼaj kyximen alkye bʼaʼn ex alkye nya bʼaʼn. In tzaj tyekʼin uʼj te Job qa ax ikx yolin Satanás nya bʼaʼn kyiʼj xjal kyaj tuʼn kyok te tamiw Dios. In tzaj tqʼamaʼn Satanás qa in che ajbʼen xjal te Dios noq tuʼnju in tzaj tqʼoʼn tbʼanel tiʼchaq kye ex nya tuʼnju kʼujlaʼn Dios kyuʼn. Ax ikx in tzaj tqʼamaʼn qa jaku tzʼel tpaʼn alkyexku xjal tiʼj Jehová. Qo xnaqʼtzan tiʼj techel kyaj tqʼoʼn Job ex tzeʼn onin Jehová tiʼj.

7, 8. a) ¿Tiʼ kubʼ t-ximen Jehová tiʼj Job? b) ¿Tiʼ tqʼama Satanás tiʼj Job?

⁷ ¿Alkyetoq Job? Jun tbʼanel xjal aju ma tzikʼ junlo 3,600 abʼqʼi tej tanqʼin. Tqʼama Jehová qa toj ambʼil aju, mintiʼtoq jun xjal at twitz Txʼotxʼ ik tzeʼn te Job. Nimtoq toklen Jehová toj twitz ex in neltoq tikʼen aju nya bʼaʼn (Job 1:8). Ok tqʼoʼn Jehová Job te jun axix tok tamiw.

⁸ Tqʼama Satanás qa in najbʼentoq Job te Jehová noq tuʼn junjun tiʼ in tzaj qʼoʼn te. Xi tqʼamaʼn Satanás jlu te  Jehová: «Bʼaqa mya tuʼnju mintiʼ in taqʼa ambʼil tuʼn ttzaj jun mya bʼaʼn tiʼj, mi kyiʼj qeju ateʼ tuj tja ex mi tiʼj tkyaqilju at te; kyʼiwlaʼn tuʼna tkyaqilju in tbʼinchaʼn, ex tuʼn jlu ma che chmet-xix qe talun tuj txʼotxʼ lu. Qʼiʼn elchaqa tkyaqilju at te, ex jakutzun tila qa mi xyolin mya bʼaʼn tiʼja» (Job 1:10, 11).

9. ¿Alkye ambʼil xi tqʼoʼn Jehová te Satanás?

⁹ Tqʼama Satanás qa oʼkxtoq in najbʼen Job te Jehová tuʼnju in xitoq tqʼoʼn qe tiʼchaq te. Tqʼama qa jakutoq tzʼel tpaʼn Job tiʼj Jehová. Maske nya toj tumel ela toj twitz Jehová aju tqʼama Satanás, pero xi tqʼoʼn ambʼil te tuʼn tok Job toj malbʼil tuʼn. Iktzun tten kʼeleltoq toj qʼanchaʼl qa in najbʼentoq Job te Jehová tuʼnju attoq tkʼuʼj tiʼj.

10. a) ¿Tiʼ ok tbʼinchaʼn Satanás tiʼj Job? b) ¿Tiʼ bʼant tuʼn Job?

¹⁰ Tnejel tzaj tzyet tuʼn Satanás tuʼn kyxi elqʼaʼn qe talun Job ex tuʼn kykyim txqantl. Yajxitl e kubʼ bʼyoʼn chʼixme kykyaqil tmajen Job. Naj tkyaqilju attoq te Job. Ex te bʼajsbʼil, bʼant tuʼn Satanás tuʼn kykyim qeju lajaj tkʼwaʼl Job tej ttzaj jun kyqʼiqʼ jbʼal. Pero kukx ajbʼen Job te Jehová. In tzaj tqʼamaʼn Tyol Dios jlu tiʼj Job: «Mintiʼ jun il o tbʼincha ex mintiʼ o yolin mya bʼaʼn tiʼj Dios» (Job 1:12-19, 22).

11. a) ¿Tiʼ mas ok tbʼinchaʼn Satanás tiʼj Job? b) ¿Tiʼ bʼant tuʼn Job?

¹¹ Nya oʼkx jlu bʼant tuʼn Satanás. Xi tqʼamaʼntl jlu te Jehová: «Qatzun ma tzʼok tkʼixbʼisaʼna aku t-ximlal, jakutzun tila qa mi xyolin mya bʼaʼn tiʼja twitzkuya». Tuʼntzunju tzaj jun matij yabʼil tiʼj Job tuʼn Satanás (Job 2:5, 7). Ax ikx toj ambʼil lu ten Job tzʼaqli twitz Jehová. Tqʼama qa kukxtoq kajbʼel te Dios ajxi tkyim (Job 2:3).

12. ¿Tzeʼn kubʼ tyekʼin Job qa nya ax tok aju tqʼama Satanás?

 ¹² Mintiʼtoq ojtzqiʼn tuʼn Job aju otoq tqʼama Satanás ex mintiʼtoq bʼiʼn tuʼn tiquʼn otoq tzaj nim nya bʼaʼn tiʼj. Axpe ikx kubʼ t-ximen qa tuʼn Jehová in tzajtoq tkyaqil jlu tiʼj (Job 6:4; 16:11-14). Noqtzun tuʼnj, kukx ajbʼen te Jehová. Otoq tzʼel toj qʼanchaʼl qa in najbʼentoq Job te Jehová tuʼnju attoq tkʼuʼj tiʼj. Kyamiwtoq kyibʼ tukʼil Dios. Nya ax tok tkyaqilju otoq tqʼama Satanás.

13. ¿Tiʼ tbʼanel tzaj tuʼnju kukx ajbʼen Job te Jehová?

¹³ Mintiʼtoq ojtzqiʼn tuʼn Job aju in nikʼtoq toj kyaʼj, noqtzun tuʼnj, kukx ajbʼen te Dios ex kubʼ tyekʼin qa nya bʼaʼn te Satanás. Tzaj kʼiwlaʼn Job tuʼn Jehová tuʼnju ok te jun tbʼanel tamiw (Job 42:12-17).

14, 15. ¿Alkye nya bʼaʼn in tzaj tqʼamaʼn Satanás kyiʼj kykyaqil xjal?

¹⁴ Jaku tzʼel qiʼn junjun tbʼanel xnaqʼtzbʼil tiʼjju ikʼ tiʼj Job. Toj ambʼil jaʼlo, in tzaj tqʼamaʼn Satanás qa in qo ajbʼen te Dios noq tuʼnju in tzaj tqʼoʼn qe tiʼchaq qe. Tqʼama jlu: «Qa mya tiʼjku t-ximlal xjal ma tzaj yajbʼil, [...] jaku txi tqʼoʼn tkyaqilju at te noq tuʼn kukx tanqʼin» (Job 2:4). A jlu in tzaj tyekʼin qa yolin Satanás nya bʼaʼn kyiʼj kykyaqil xjal ex nya oʼkx tiʼj Job. Tej otoqxi tzikʼ nim syent abʼqʼi tkyimlen Job, kukx yolin Satanás nya bʼaʼn tiʼj Jehová ex kyiʼj tmajen. Jun techel, in tzaj tqʼamaʼn Tyol Dios jlu: «Nkʼwaʼl, tzʼoka at tnabʼila, tuʼntzun ntzalaje tiʼja; iktzun tten jaku bʼant tuʼn t-xi ntzaqʼweʼne teju in xmayin wiʼje» (Proverbios 27:11, TNM).

¹⁵ Jaku jaw tjyoʼna tuʼn tajbʼena te Jehová ex jaku tzʼoka te tbʼanel tamiw. Iktzun tten kbʼel tyekʼina qa nya ax tok tyol Satanás. Oklo kʼokel tilil tuʼna tuʼn tbʼaj tchʼexpuʼna junjun tiʼ toj tanqʼibʼila tuʼntzun toka te tamiw  Dios ex atzun jlu mas tbʼanel jaku bʼant tuʼna. Nimxix toklen jlu, tuʼnju in tzaj tqʼamaʼn Satanás qa mlay tzʼajbʼentla te Dios aj ttzaj nya bʼaʼn tiʼja. In najbʼen alkyexku tiʼ tuʼn Satanás tuʼn miʼn txi qbʼiʼn Dios. ¿Tiʼ in bʼant tuʼn?

16. a) ¿Alkye junjun tiʼ in najbʼen tuʼn Satanás tuʼn ya miʼn kyajbʼen xjal te Jehová? b) Ximana tiʼj, ¿tiʼ jaku tzʼajbʼen tuʼn Satanás tuʼn miʼn tajbʼentla te Dios?

¹⁶ In najbʼen nimku tten tuʼn Satanás tuʼn miʼn ttentl qamiwbʼil tukʼil Dios. At maj, in qʼojin qiʼj ik tzeʼn «jun bʼalun» aju «in tzanun» wen (1 Pedro 5:8). Tuʼntzunju, miʼn tzaj bʼaj tkʼuʼja qa nya kyaj tamiwa, qe toj tjaya moqa junjuntl xjal tuʼn t-xnaqʼtzana tiʼj Tyol Dios ex tuʼn tkubʼ tbʼinchaʼna aju bʼaʼn. Jakulo tnaʼya qa in che qʼojin tiʼja (Juan 15:19, 20). * Ex at maj in nok tqʼon tibʼ Satanás «ik tzaʼn jun anjel in qoptzʼaj» ex in nok tilil tuʼn tuʼn miʼn qbʼin te Jehová (2 Corintios 11:14). Juntl tiʼ in najbʼen tuʼn Satanás tuʼn ya miʼn qajbʼen te Jehová, aju tuʼn tkubʼ qximen qa mintiʼ qoklen toj twitz Dios (Proverbios 24:10).

17. ¿Tiquʼn in xi qbʼiʼn Jehová?

¹⁷ In kubʼ qyekʼin qa nya ax tok tyol Satanás aj qnimen te Jehová. ¿Tiʼ kʼonil qiʼj tuʼn qbʼin te Jehová? In tzaj tqʼamaʼn Tyol Dios jlu: «Kykʼujlame Qman Dios tuʼn tkyaqil kyanmiye, tuʼn tkyaqil kykʼuʼje ex tuʼn tkyaqil  kyipune» (Deuteronomio 6:5). In xi qbʼiʼn Jehová tuʼnju kʼujlaʼn quʼn. Aj tchʼiy qkʼujlabʼil tiʼj, mas ktel qajbʼil tuʼn tkubʼ qbʼinchaʼn aju in tzaj tqanin qe. Kubʼ ttzʼibʼin apóstol Juan jlu: «Qa kʼujlaʼn Dios quʼn, che japunel qe tmandamyent quʼn; ex qe tmandamyent mya kyuw qe» moqa nya kwest qe (1 Juan 5:3).

18, 19. a) ¿Alkye junjun tiʼchaq nya bʼaʼn in nela toj twitz Jehová? b) ¿Tzeʼn in nel qnikʼ tiʼj qa mintiʼ in tzaj tqanin Jehová jun tiʼ qe aju mlayx bʼant quʼn?

¹⁸ In tzaj tqʼamaʼn Jehová qa at junjun tiʼ nya bʼaʼn. Kkanetel junjun techel tuʼna toj recuadro « Il tiʼj tuʼn tel tikʼuna aju in nel tikʼun Jehová». Jakulo kubʼ t-ximana tnejel qa at junjun tiʼchaq tbʼanel kyxol jlu. Noqtzun tuʼnj, aj tkubʼ tuʼjina qe taqikʼ Tyol Dios ex aj tkubʼ tena ximel kyiʼj, kʼelel tnikʼa qa mas bʼaʼn tuʼn kyokx qbʼiʼn tkawbʼil Dios. Ax ikx jakulo tzʼel tnikʼa tiʼj qa il tiʼj tuʼn tbʼaj  tchʼixpuʼna junjun tiʼchaq toj tanqʼibʼila. At maj kwest tuʼn tbʼant jlu. Noqtzun tuʼnj, qa ma bʼant tuʼna, ktzalajela tiʼj tzalajbʼil at kyxol tamiw Jehová (Isaías 48:17, 18). ¿Tzeʼn in nel qnikʼ tiʼj qa jaku kubʼ qchʼixpun qibʼ?

¹⁹ Mlayx tzaj tqanin Jehová jun tiʼ qe aju mlayx bʼant quʼn (Deuteronomio 30:11-14). In nok Jehová te jun axix tok qamiw ex ojtzqiʼnxix qoʼ tuʼn. Ojtzqiʼn tuʼn alkyeqe tbʼanel qmod ex alkyeqe nya bʼaʼn qmod (Salmo 103:14). Tqʼama apóstol Pablo qeju tbʼanel yol lu: «Mlay che kyaj qʼoʼne tuʼn Dios tuʼn kyoke tuj joybʼil kyiʼje nimxix, aju mlay tzikʼx kyuʼne. Ok kyoke tuj joybʼil kyiʼje, ktzajel tyekʼun Dios jun tumel tzaʼn tten tuʼn kyexe tuj, tuʼntzun tikʼx kyuʼne» (1 Corintios 10:13). Jaku tzʼok qeʼ qkʼuʼj tiʼj qa kukx qo tzajel tonin Jehová tuʼn tkubʼ qbʼinchaʼn aju bʼaʼn. Ex a tzul «qʼonte nimxix» tipumala aj tok weʼya twitz nya bʼaʼn (2 Corintios 4:7).

20. ¿Alkyeqe tmod Jehová il tiʼj tuʼn tel tkanoʼna ex tiquʼn?

²⁰ Qa qaj tuʼn qok te tamiw Jehová, nya oʼkx che kjel qtzaqpiʼn qe tiʼchaq nya bʼaʼn toj twitz. Il tiʼj tuʼn tbʼant juntl tiʼ quʼn (Romanos 12:9). In nok kykʼujlaʼn tamiw Jehová aju kʼujlaʼn tuʼn. In nel kykanoʼn qeju tbʼanel tmod ik tzeʼn qe jlu: «Tuʼn tten qkʼujlalil, tuʼn qtzalaj, tuʼn tten qmojbʼabʼl qibʼ, tuʼn tten qpasens, tuʼn qbʼinchante xtalbʼil te juntl, tuʼn tten qbʼanil, tuʼn qweʼxix tuj qokslabʼl, tuʼn qok mans, ex tuʼn qjakʼunte qibʼ» (Gálatas 5:22, 23). Tuʼn tel tnikʼa tiʼj tzeʼn kymod tamiw Dios, uʼjinktza Salmo 15:1-5.

21. ¿Tiʼ kʼonil tiʼja tuʼn kykubʼ tyekʼina qe tbʼanel mod kʼujlaʼn tuʼn Dios?

²¹ ¿Tiʼ kʼonil tiʼja tuʼn kykubʼ tyekʼina qeju tbʼanel mod? Bʼaʼn tuʼn tel tnikʼa tiʼjju kʼujlaʼn tuʼn Jehová. Tuʼn tel tnikʼa tiʼj, xnaqʼtzam tibʼa tuʼn tuʼjina ex tuʼn t-xnaqʼtzana tiʼj Tyol (Isaías 30:20, 21). Aj tbʼant jlu tuʼna, kukx kchʼiyil tkʼujlabʼila tiʼj Jehová. A jlu kʼonil tiʼja tuʼn tokx tbʼiʼna.

22. ¿Tiʼ tbʼanel tzul qa ma qo bʼin te Jehová?

²² Aj tbʼant junjun chʼixpubʼil quʼn, jaku tzʼok qmojbʼaʼn tukʼilju tuʼn tel qiʼn ttxʼaqin qxbʼalun ex tuʼn tok qqʼoʼn jun qxbʼalun akʼaj moqa saq. In tzaj tqʼamaʼn Tyol Dios jlu: «Ma tzʼel kykotpiʼne aju ojtxi kytene tukʼix ju ojtxi kybʼinchbʼene. Ex ma tzʼok kyqʼoʼne ju akʼaj kytene» (Colosenses 3:9, 10). Kwest tuʼn tbʼant quʼn, pero in tzaj ttziyen Jehová qa tzul tqʼoʼn jun tbʼanel oyaj qe qa ma bʼaj qchʼixpuʼn qanqʼibʼil ex qa ma qo bʼin te (Salmo 19:11). Noqtzun tuʼnj, bʼaʼn tuʼn t-xi tbʼiʼna Jehová tuʼnju kʼujlaʼn tuʼna ex nya tuʼnju ktzajel tqʼoʼn teya toj ambʼil tzul. Aju tbʼanel tzul tuʼn jlu, kbʼel tyekʼina qa nya ax tok tyol Satanás ex kʼokela te jun axix tok tamiw Jehová.