1, 2. ¿Jatumel jaku qoʼx klol qibʼ toj ambʼil jaʼlo?

XIMANA tiʼj qa in bʼeta toj bʼe ex noq minabʼen in nok yupj twitz kyaʼj. In qoptzʼaj twitz kyaʼj, in tinin wen ex in tzaj nim jbʼal. Tuʼn jlu in xiʼya jyol jun tembʼil jatumel tuʼn tokx tklon tibʼa. ¡In jaw tzalaja aj tkanet jun tuʼna!

² Chʼixme axju in bʼaj qiʼj toj ambʼil jaʼlo. Kukx in xiʼ nya bʼaʼn toj il. Jakulo kubʼ t-xjelina jlu: «¿Jatumel jaku chinxe klol wibʼe?». Jun kyxol qeju xjal e kubʼ tzʼibʼinte Tyol Dios, tqʼama jlu: «Aya jun ja kyuw bʼinchbʼen te jatum tuʼn tokx nklon wibʼe, aya Ndiose qʼuql nkʼuʼje tiʼja» (Salmo 91:2). Jaku tzʼonin Jehová qiʼj tuʼn qex kywitz nya bʼaʼn in che tzaj qiʼj, ex in tzaj tqʼoʼn jun tbʼanelxix qʼuqbʼil qkʼuʼj tiʼjju kbʼantel tuʼn toj ambʼil tzul.

3. ¿Tiʼ kbʼantel quʼn tuʼn qtzaj tonin Jehová?

³ ¿Toj alkye tten in xqʼuqin Jehová qiʼj? Jaku tzʼonin qiʼj aj qok weʼ twitz alkyexku nya bʼaʼn. At mas tipumal twitz alkyexku xjal jaku tzʼok bʼinchante nya bʼaʼn qiʼj. Axpe ikx qa ma tzaj jun nya bʼaʼn qiʼj jaʼlo, qʼuqli qkʼuʼj tiʼj Jehová qa kʼelel tiʼn jlu toj ambʼil tzul. In tzaj tqʼamaʼn Xjan Uʼj tuʼn tbʼant jlu quʼn: «Ax che tenkje tuj tkʼujlalil Dios» (Judas 21). Tuʼn tonin Jehová qiʼj tuʼn qex kywitz nya bʼaʼn, il tiʼj tuʼn kukx tten qamiwbʼil tukʼil. Noqtzun tuʼnj, ¿tiʼ kbʼantel quʼn tuʼn kukx tten qamiwbʼil tukʼil?

4, 5. ¿Tzeʼn o kubʼ tyekʼin Jehová qa kʼujlaʼn qoʼ tuʼn?

⁴ Tuʼn kukx qok te tamiw Jehová, il tiʼj tuʼn tel qnikʼ tiʼj qa kʼujlaʼnxix qoʼ tuʼn. Ximana tiʼj tkyaqilju o tzaj  tqʼoʼn qe. O tzaj tqʼoʼn jun tbʼanelxix qnajbʼil, aju Txʼotxʼ, atz jatumel in che jaw chʼiy tbʼanelxix awal ex ateʼ nim txkup twitz. Ax ikx in tzaj tqʼoʼn tbʼanelxix qwa ex nim aʼ tuʼn t-xi qkʼaʼn. Nya oʼkxju, ax ikx o tzaj tqʼamaʼn Jehová qe toj Tyol alkye tbʼi ex tzeʼnxix qe tmod. Noqtzun tuʼnj, aju mas tbʼanel yekʼbʼil tiʼj tkʼujlabʼil aju tej ttzaj tsamaʼn Jesucristo tuʼn tkyim tuʼn qpaj (Juan 3:16). Tuʼn jlu, at jun tbʼanelxix qʼuqbʼil qkʼuʼj toj ambʼil tzul.

⁵ O kubʼ tqʼoʼn Jehová aju Tkawbʼil Mesías toj kyaʼj. Kbʼel tnajsaʼn Kawbʼil lu tkyaqil yajbʼil ex kʼokel Txʼotxʼ tuʼn te jun tbʼanel najbʼil, jatumel qo anqʼil toj mujbʼabʼil ex toj tzalajbʼil (Salmo 37:29). Ax ikx o tzaj tyekʼin Jehová tkʼujlabʼil qiʼj tej ttzaj t-xnaqʼtzaʼn qe alkye tten tuʼn qanqʼin toj tbʼanel. Ex in txokin qiʼj tuʼn qnaʼn Dios te ex kukx taj tuʼn qtzaj tbʼiʼn. Ik tzeʼn ma tzʼel qnikʼ tiʼj, ax tok kʼujlaʼn qoʼ qkyaqilx tuʼn Jehová.

6. ¿Tzeʼn jaku kubʼ tyekʼina qa in xi tqʼoʼna chjonte tiʼj tkʼujlabʼil Jehová?

⁶ ¿Tzeʼn jaku kubʼ tyekʼina qa in xi tqʼoʼna chjonte tiʼj tkʼujlabʼil Jehová? Jaku kubʼ tyekʼina aj tok tqʼoʼna toklen tkyaqilju o tzaj tqʼoʼn teya. Bʼisbʼajilxix tuʼnju ateʼ nim xjal mintiʼ in xi kyqʼoʼn chjonte toj ambʼil jaʼlo. Ax jlu in bʼajtoq toj tqʼijlalil Jesús. Toj jun maj, e kubʼ tqʼanin Jesús lajaj xjal at txʼaʼk kyiʼj, pero oʼkx jun xi tqʼoʼn chjonte te (Lucas 17:12-17). Qaj tuʼn qok ik tzeʼn xjal lu ex tuʼn kukx txi qyekʼin te Jehová qa in xi qqʼoʼn chjonte te.

7. ¿Tzeʼn kʼokel qkʼujlaʼn Jehová?

⁷ Ax ikx il tiʼj tuʼn tkubʼ qyekʼin qa kʼujlaʼn Jehová quʼn. Xi tqʼamaʼn Jesús kye t-xnaqʼtzbʼen tuʼn tok kykʼujlaʼn Jehová tuʼn tkyaqil kyanmi, tuʼn tkyaqil kykʼuʼj ex tuʼn  tkyaqil kynabʼil (kjawil uʼjit Mateo 22:37). ¿Tiʼ t-xilen jlu?

8, 9. ¿Alkye tten in xi qyekʼin te Jehová qa kʼujlaʼn quʼn?

⁸ ¿Oʼkxpe kxel qqʼamaʼn qa kʼujlaʼn Jehová quʼn? Miʼn. Qa in nok qkʼujlaʼn Jehová tuʼn tkyaqil qanmi, tuʼn tkyaqil qkʼuʼj ex tuʼn tkyaqil qnabʼil, ok kbʼel qyekʼin tuʼn qbʼinchbʼen (Mateo 7:16-20). In tzaj tqʼamaʼn Xjan Uʼj qa kʼujlaʼn Dios quʼn, ok che japunel tkawbʼil quʼn. ¿Kwestpe tuʼn tbʼant jlu? Miʼn, tuʼnju nya kwest tuʼn kyjapun tkawbʼil Jehová quʼn (kjawil uʼjit 1 Juan 5:3).

⁹ Aj t-xi qbʼiʼn Jehová, in qo tzalaj ex in ten ttxolil qanqʼibʼil (Isaías 48:17, 18). Noqtzun tuʼnj, ¿tiʼ jaku tzʼonin qiʼj tuʼn kukx qok te tamiw Jehová? Qo xnaqʼtzan tiʼj.

10. ¿Tiquʼn il tiʼj tuʼn kukx tel tnikʼa tiʼj Jehová?

¹⁰ ¿Tzeʼn ok teya te tamiw Jehová? Tej tok tena xnaqʼtzal tiʼj Xjan Uʼj, el mas tnikʼa tiʼj Jehová ex chʼiy tamiwbʼila tukʼil. Ik tten tamiwbʼila lu ik tzeʼn qʼaqʼ. Tuʼn kukx tkʼant, il tiʼj tuʼn tokx qʼet siʼ toj. A jlu in tzaj tyekʼin qa il tiʼj tuʼn kukx tel tnikʼa tiʼj Jehová tuʼntzun kukx tten tamiwbʼila tukʼil (Proverbios 2:1-5).

11. ¿Tzeʼn kʼonil tiʼja aju kʼelel tnikʼa tiʼj toj Tyol Dios?

¹¹ Qa kukx ma xnaqʼtzana tiʼj Tyol Dios, kʼelel tnikʼa tiʼj junjuntl xnaqʼtzbʼil aju ok kpol toj tanmiya. Ximana tiʼj tzeʼn ela toj kywitz kabʼe t-xnaqʼtzbʼen Jesús tej t-xi tchikʼbʼaʼn kye junjun yol otoq kyaj qʼamaʼn. Kyqʼama: «Ax tok ma qnaʼ jun tzalajbʼil tuj qanmi tej matoq in yolin qukʼil tuj bʼe ex tej saj ttxʼolbʼaʼn aju tzʼibʼan tuj Tuʼjil» (Lucas 24:32).

12, 13. a) ¿Tiʼ jaku bʼaj tiʼj qkʼujlabʼil at tiʼj Dios? b) ¿Tiʼ jaku bʼant quʼn tuʼn kukx tten qkʼujlabʼil tiʼj Jehová?

 ¹² Pon toj kyanmi qeju kabʼe t-xnaqʼtzbʼen Jesús aju xi t-xnaqʼtzaʼn kye. Ax ikx teya nimlo jaw tzalaja tej t-xi tzyet tuʼn tel tnikʼa tiʼj Tyol Dios. A jlu onin tiʼja tuʼn tel tnikʼa tiʼj Jehová ex tuʼn tok tkʼujlaʼna. Nyalo taja tuʼn tkubʼ yupj aju tkʼujlabʼil at tiʼj (Mateo 24:12).

¹³ Tuʼnju ma tzʼoka te tamiw Dios, il tiʼj tuʼn tok tilil tuʼna tuʼn kukx tchʼiy tamiwbʼila tukʼil. Tuʼn tbʼant jlu, il tiʼj tuʼn kukx tel tnikʼa tiʼj Jehová ex tiʼj Jesús. Ax ikx nim toklen tuʼn t-ximana tiʼjju in nel tnikʼa tiʼj ex tzeʼn jaku kubʼ tbʼinchaʼna (Juan 17:3). Aj tuʼjina moqa aj t-xnaqʼtzaʼna tiʼj Tyol Dios, bʼaʼn tuʼn tkubʼ t-xjelina jlu: «¿Tiʼ in tzaj t-xnaqʼtzaʼn jlu weye tiʼj Jehová? ¿Tiquʼn il tiʼj tuʼn tok nkʼujlaʼne Dios tuʼn tkyaqil wanmiye ex tuʼn tkyaqil nkʼuʼje?» (1 Timoteo 4:15).

14. ¿Tzeʼn in nonin naʼj Dios qiʼj tuʼn kukx tchʼiy qkʼujlabʼil tiʼj Jehová?

 ¹⁴ Qa at jun teya tbʼanel tamiw, kukxlo in yolina tukʼil. A jlu in nonin tiʼja tuʼn tchʼiy tamiwbʼila tukʼil. Ax ikx, kukx kchʼiyel qkʼujlabʼil tiʼj Jehová qa kukx ma qo yolin tukʼil toj naʼj Dios (kjawil uʼjit 1 Tesalonicenses 5:17). Aju naʼj Dios jun tbʼanelxix oyaj o tzaj tqʼoʼn Qtat toj kyaʼj qe. Tbʼanel qa kukx ma txi qqʼamaʼn te aju tkuʼx toj qanmi (Salmo 62:8). Mintiʼ tuʼn kykyaj naʼj Dios toj qwiʼ ex tuʼn t-xi qqʼamaʼn jun ex juntl maj, sino bʼaʼn tuʼn t-xi qqʼamaʼn aju axix tok in qnaʼn. Qa kukx ma qo xnaqʼtzan tiʼj Xjan Uʼj ex qa kukx ma txi qqʼamaʼn aju tkuʼx toj qanmi te Jehová, kukx kchʼiyel qkʼujlabʼil tiʼj.

15, 16. ¿Tiʼ teya t-xim tiʼj pakbʼabʼil?

¹⁵ Tuʼn kukx tten qamiwbʼil tukʼil Jehová, il tiʼj tuʼn qyolin kyukʼil txqantl xjal tiʼjju in nel qnikʼ tiʼj. Jun tbʼanelxix qoklen aju tuʼn qyolin tiʼj Jehová kyukʼil txqantl (Lucas 1:74). Ax ikx, tqʼama Jesús qa il tiʼj tuʼn tbʼant jlu kyuʼn kykyaqil axix tok okslal. Tuʼntzunju, qkyaqilx il tiʼj tuʼn qpakbʼan tiʼj tbʼanel tqanil tiʼj Tkawbʼil Dios. ¿In bʼantpe jlu tuʼna? (Mateo 24:14; 28:19, 20).

¹⁶ Nimtoq toklen pakbʼabʼil toj twitz apóstol Pablo, tuʼntzunju ok tqʼoʼn te jun «qʼinumabʼl» (2 Corintios 4:7). Aj tyolina tiʼj Jehová ex tiʼj t-xim kyukʼil txqantl, atzun jlu mas nim toklen jaku bʼant tuʼna. At toklen pakbʼabʼil tukʼil tajbʼebʼila te Jehová, ex nim toklen toj twitz aju in bʼant tuʼna (Hebreos 6:10). Aj tpakbʼana, in nonina kyiʼj txqantl tuʼn kyok te tamiw Dios ex in chʼiy mas tamiwbʼila tuʼn tukʼil Jehová. Qa ma pakbʼana, jaku tzʼanqʼina te jumajx ex qeju in che bʼin tiʼja (kjawil uʼjit 1 Corintios 15:58). ¿Atpe juntl aqʼuntl jaku tzaj tqʼoʼn mas tzalajbʼil teya?

17. ¿Tiquʼn ilxix tuʼn qpakbʼan?

 ¹⁷ Ilxix tiʼj tuʼn qpakbʼan. In tzaj tqʼamaʼn Tyol Dios jlu: «Kyjaʼtzun kxel nkyuwsaʼne teya tuʼn t-xi tpakbʼaʼna tyol Dios» (2 Timoteo 4:2). Il tiʼj tuʼn tok kybʼiʼn xjal tbʼanel tqanil tiʼj Tkawbʼil Dios. Ax ikx, in tzaj tqʼamaʼn Tyol Dios qa «niqaʼ taʼ tuʼn tul kanun ju nintz tqʼijlalil jwisi tuʼn Qman» ex qa in laqʼeʼ naj ttzaj, aju xitbʼil «mlay tzikʼx tiʼj» (Sofonías 1:14; Habacuc 2:3). Chʼix tkubʼ tnajsaʼn Jehová tkyaqilju nya bʼaʼn tokx tjaqʼ tkawbʼil Satanás. Naʼmxtoq tbʼaj jlu, il tiʼj tuʼn t-xi qqʼamaʼn kye xjal tuʼn tjaw kyjyoʼn tuʼn kyajbʼen te Jehová.

18. ¿Tiquʼn il tiʼj tuʼn tok kychmon kyibʼ axix tok okslal?

¹⁸ Taj Jehová tuʼn tok kychmon kyibʼ qeju axix tok okslal tuʼn kykʼulin te. In tzaj tqʼamaʼn Tyol Dios jlu: «Qo ximan tiʼj tuʼn qkyuwsante qibʼ qxolx tuʼn qkʼujlante qibʼ ex tuʼn qbʼinchante bʼaʼn. Ex miʼn txi qkolin tuʼn tok qbʼuyin qibʼ, ik tzaʼn junjun ma che naqʼet mintiʼ in nnoʼk kybʼuyin kyibʼ; pero qqʼom qnabʼl qxolx, axixpe jlu tuʼn qbʼinchante, porke in laqʼex ttzaj tqʼijlalil tuʼn tul Qajaw» (Hebreos 10:24, 25). Ilxix tiʼj tuʼn tok tilil quʼn tuʼn qxiʼ kyoj kykyaqil chmabʼil, tuʼnju atz in bʼaj qqʼuqbʼaʼn qkʼuʼj ex in bʼaj qonin qibʼ qxolx.

19. ¿Tiʼ kʼonil qiʼj tuʼn kyok qkʼujlaʼn qerman?

¹⁹ Ok che kanetel tbʼanel tamiwa toj kʼloj okslal ex che onil tiʼja tuʼn tajbʼena te Jehová. Che okel tojtzqiʼna erman junxichaq kymod, junxichaq o tzikʼ toj kyanqʼibʼil, aʼyeju in nok tilil kyuʼn tuʼn kyajbʼen te Jehová. Pero ik tzeʼn teya, ax ikx kye aj il qe ex in che el txalpaj. Aj tbʼaj jlu, tbʼanel qa ma kubʼ tnajsaʼna kyil (kjawil uʼjit Efesios 4:32). Kukx qʼonka twitza tiʼj tbʼanel kymod qerman. Atzun jlu kʼonil tiʼja tuʼn kyok tkʼujlaʼna ex tuʼn kukx tchʼiy tamiwbʼila tukʼil Jehová.

20, 21. ¿Tiʼ aju «chwinqlal axix tok»?

²⁰ Taj Jehová tuʼn tten tbʼanelxix kyanqʼibʼil tamiw. In tzaj t-xnaqʼtzaʼn Xjan Uʼj qa toj ambʼil tzul junxitl qanqʼibʼil ktel twitzju at jaʼlo.

²¹ Ok qo anqʼil te jumajx ex nya oʼkx 70 moqa 80 abʼqʼi. Ok qo tzalajel tiʼj «chwinqlal te jumajx» toj jun tbʼanel najbʼil, jatumel qo okel te tzʼaqli, ktel mujbʼabʼil qxol ex qo tel toj txubʼtxaj. In nok tqʼoʼn Tyol Dios tbʼi jlu te «chwinqlal axix tok». In tzaj tqʼamaʼn Jehová qa tzul tqʼoʼn chwinqlal lu qe, noqtzun tuʼnj, il tiʼj tuʼn tok tilil quʼn tuʼn ttzaj tqʼoʼn qe (1 Timoteo 6:12, 19).

22. a) ¿Tiʼ kbʼantel quʼn tuʼn ttzaj qʼoʼn qchwinqlal «axix tok»? b) ¿Tiquʼn mlayx tzaj qʼoʼn qchwinqlal te jumajx noq tuʼnju in bʼant quʼn?

²² ¿Tiʼ kbʼantel quʼn tuʼn ttzaj qʼoʼn qchwinqlal «axix tok»? Il tiʼj tuʼn qaqʼunan tiʼj «aju bʼaʼn» ex tuʼn tchmet qaqʼunbʼen «bʼaʼn ik tzaʼn jun qʼinumabʼl» (1 Timoteo 6:18). A jlu in tzaj tyekʼin qa il tiʼj tuʼn tkubʼ qbʼinchaʼn aju in nel qnikʼ tiʼj toj Tyol Dios. Noqtzun tuʼnj, mlayx tzaj qʼoʼn qchwinqlal te jumajx noq tuʼnju in nok tilil quʼn, tuʼnju noq tuʼn «t-xtalbʼil Dios» tzul tqʼoʼn tbʼanel oyaj lu kye qeju kukx in che ajbʼen te (Romanos 5:15). Taj Jehová tuʼn ttzaj tqʼoʼn tbʼanelxix oyaj lu kye tmajen tuʼn tkyaqil tkʼuʼj.

23. ¿Tiquʼn il tiʼj tuʼn tkubʼ t-ximana tiʼ kbʼantel tuʼna toj ambʼil jaʼlo?

²³ Bʼaʼn tuʼn tkubʼ t-xjelina jlu: «¿In chin kʼuline te Dios ik tzeʼn tajbʼil?». Qa ma tzʼel tnikʼa tiʼj qa il tiʼj tuʼn tbʼaj tchʼixpuʼna junjun tiʼ toj tanqʼibʼila, bʼaʼn tuʼn tkubʼ tbʼinchaʼna. Qa ma tzʼok qeʼ qkʼuʼj tiʼj Jehová ex qa ma tzʼok tilil quʼn tuʼn t-xi qnimen, ok kʼokel te jun kolbʼil te qe. Ok kkolil Jehová kyiʼj tmajen toj bʼajsbʼil tqʼijlalil. Yajxitl ktzajel tqʼoʼn qchwinqlal te jumajx toj  Tbʼanel Najbʼil, ik tzeʼn o tzaj ttziyen. Jaku tzʼanqʼina te jumajx qa ma jaw tjyoʼna aju mas tbʼanel.