Tej qʼiʼntoq jun abʼqʼi wuʼne tukʼil qaq xjaw mintiʼtoq jun yabʼil tok wiʼje. Toj jun qonikʼan te agosto te 1967 tzaj nim kyaq wiʼje moqa fiebre. Te juntl qʼij kubʼ nnaʼne qa ya mintiʼtoq kyipun nqane moqa kyjwers. Tuʼn tel nikʼbʼaj tiʼtoq in bʼaj wiʼje inx kyiʼne toj jun hospital te Freetown (Sierra Leona) atz jatumel in qo anqʼine. Tzaj kyqʼamaʼn Doctor qa tok jun yabʼil wiʼje poliomielitis tbʼi. Aju yabʼil lu in nel kyiʼn kyipun qqan ex oʼkx in bʼaj jlu kyiʼj kʼwal te jweʼ abʼqʼi ex jakutoq tzʼel kyiqen txqantl. Mintiʼ onin ejercicio wiʼje tuʼn nbʼanixe juntl maj, chebʼe chebʼe el kyipun nqane ex mintiʼtl bʼant in bʼete nix tuʼn njaw weye. Tuʼnju yabʼil tok wiʼje ya mintiʼ ok tqʼoʼn nmane woklene. Nimtoq in chin bʼisune tuʼnju oʼkxtoq in xi njakʼun wibʼe twitz txʼotxʼ tuʼntzun tbʼant nbʼete. Ex kubʼ nximane qa ik nchwinqlale ktel te jumajx.

 Atztoq in qo anqʼine tukʼil ntxuʼye toj jun lugar jatumel mintiʼxix pwaq. Kykyaqil qe familia in che anqʼin atz prowqe. Kʼujlaʼntoq qine kyuʼn xjal pero wajtoqe tuʼn tkubʼ nnaʼne tkʼujlabʼil nmane. In tzajtoq kyqʼamaʼn junjun xjal weye qa aju yabʼil tok wiʼje nya noq kukx, sino tuʼnju otoq bʼant kyaqʼun chman kyuʼn xjal wiʼje. Ate junjuntl xi kyqʼamaʼn te ntxuʼye tuʼn nkyaj qʼoʼne ttzi jun ja jatumel in che ok xqʼuqit junjun kʼwal nya tzʼaqli kyxmilal. Iktzun tten jakutoq tzʼel jun iqtz tibʼaj tuʼnju ya mintiʼtoq tuʼn t-xqʼuqin wiʼje. Pero mintiʼ bʼant jlu tuʼn ex kukx xqʼuqin wiʼje.

 Tuʼnju mintiʼtoq in chin bʼete okxtoq in xi njukʼun wibʼe twitz txʼotxʼ. Nimtoq in chin kʼixbʼiye aj t-xi njukʼun wibʼe tuʼntzunju in che ajbʼentoq nxbʼalune pin ex in che ok nqʼoʼne chankla kyiʼj nqʼabʼe tuʼntzun miʼn nkʼixbʼiye nim. Tej tbʼet ambʼil e kanet kabʼe piẍ tzeʼ wuʼne: ik tten ik tzeʼn letra U. Tuʼn nbʼete in bʼaʼntoq jlu wuʼne: in che kubʼtoq nqʼoʼne piẍ tzeʼ nwitze, in che jaxtoq nqʼoʼne nqʼabʼe tibʼaj tuʼntzun t-xi njakʼun wibʼe tuʼn nbʼete. ¡Nimtoq in che choʼn nqʼabʼe aj tbʼant jlu wuʼne tuʼntzun aju mintiʼxix in chin exe bʼetel! Mintiʼtoq nchinxe toj escuela nix tuʼn nsaqchane kyukʼil junjuntl kʼwal, ex in tzaj bʼajtoq nkʼuʼje aj ximane tiʼj aj tpon ambʼil tuʼn miʼn tten ntxuʼye wukʼile.

 Kukx xi nqanine onbʼil te Dios tuʼnju nya wajtoqe tuʼn nmoʼne toj kay. Kubʼ in ximane qa matoq chin ajbʼena te Dios mlaytoq chin kyaj ttzaqpina. Toj 1981 in xiʼye toj jun iglesia nqayin tok tiʼn njaye. Tuʼn npone atz nim in sikte, in chkʼene ex in oqʼe. Toj iglesia lu mintiʼ kubʼ kyyekʼin xjal tbʼanel kymod wukʼile axpe ikx te pastor. Nya oʼkxju, ax ikx tzaj ilin pastor tiʼj ntxuʼye tuʼnju otoq chin kubʼ qeye toj jun qʼuqbʼil otoq chjet kyuʼn junjun xjal. Tuʼn jlu ya mintiʼ kubʼ nximane tuʼn nmeltzʼaje juntl maj.

 Akux in nex qʼij naqʼli qine tuʼn njaxe toj último nivel toj ja ex in che kubʼ weye ttzi ventan tuʼntzun tok nkeʼyine tiʼ mas in bʼaj peʼn. Tej qʼiʼntoq 18 abʼqʼi wuʼne kubʼ nximane tuʼn tbʼant junxitl tiʼ wuʼne ex bʼaj jlu toj jun prim te 1984. Maske atintoqe jawni in kuʼtze toj patio jatumel mintiʼxix in che ten xjal. Xi nkeʼyine kabʼe xjal in che pakbʼaʼn ttziyele ja. E ok laqʼeʼ ntxlaje ex e yolin wukʼile tiʼj jun tbʼanel qʼuqbʼil qkʼuʼj tiʼj ambʼil tzul. Tzaj kyqʼamaʼn qa chin bʼetele toj ambʼil tzul ex tzaj kyuʼjin Isaías 33:24 weye ex Apocalipsis 21:3, 4. Yajxitl tzaj kyqʼoʼn jun tbʼanel folleto weye aju tok tbʼi ¡Disfrute para siempre de la vida en la Tierra! Ex tzaj kyqʼamaʼn qa che meltzʼajel juntl maj tuʼn ttzaj kyqʼoʼn mastl xnaqʼtzbʼil weye.

 Tej kymeltzʼaj tzaj kyqʼamaʼn weye qa ax ikx tzultoq Pauline kyukʼil, jun misionera tzmatoq in pon. Ex japun twi kyyol. Tej tok wojtzqiʼne Pauline ok ik tzeʼn ntxuʼye atoq tpasens tbʼaneltoq tmod kubʼ tyekʼin tkʼujlabʼil wiʼje …; ok tilil tuʼn tuʼn tonin wiʼje ex ximen tiʼjju attoq tajbʼen weye. Tzaj tqʼamaʼn ntxuʼye weye tuʼn kukx nxnaqʼtzane tukʼil Pauline. Tzaj tyekʼin Pauline weye tuʼn tbʼant wuʼjine ex ajbʼen uʼj Mi libro de historias bíblicas tuʼn wukʼile, onin wiʼje tuʼn tok wojtzqiʼne Nmane at toj kyaʼj, aju at tkʼujlabʼil ex atzun jlu in chin jyontoqe tiʼj.

 Tbʼanel ela xnaqʼtzbʼil toj nwitze. Ok nbʼine qa nqayin tiʼj njaye in noktoq jun kychmabʼil testigos de Jehová aju Estudio tiʼj Libro te Congregación. a Xi nqanine te Pauline qa jaku chinxe ex tzaj tqʼamaʼn weye qa jaku bʼant tuʼn nxiʼye. Toj jun martes ul qil weye tuʼn qxiʼye junx ex ayon wiʼje tuʼn tbʼaj nbʼinchane ntene ik tzaʼn tuʼn nbañarine ex tuʼn tok nxbʼalune. Otoq tzaj qʼamaʼn weye tuʼn t-xi nqʼamaʼne te Pauline tuʼn nxi qʼiʼne toj taxi, pero xi nqʼamaʼne jlu te: «Miʼn jaku che ajbʼen tal tzeʼ wuʼne tuʼn npone».

 Tej wetze toj njaye, in keʼyintoq ntxuʼye wiʼje ex qe vecin ex tzaj bʼaj chʼin kykʼuʼj, kukxtoq in che keʼyin wiʼje. Akux in chin ikʼxe toj patio, xi kyqʼamaʼn junjun vecin jlu te Pauline: «¡Miʼn tzʼok t-obligarina!».

 Tzajtzun tqanin Pauline jlu weye tukʼil kʼujlabʼil: «Jay, ¿taja tuʼn t-xiʼya?». Otoq pon ambʼil tuʼn tkubʼ nyekʼine qa qʼuqli nkʼuʼje tiʼj Jehová (Proverbios 35, 6). Xi nqʼamaʼne te. «¡Ikju, waje tuʼn nxiʼye! Ma kubʼ nximane». Mintiʼ jun tiʼ kyqʼama vecin. Ex akux in chin exe ttziʼ pwert, chʼexpaj kymod. Tejtzun wetze kyxol, kykyaqilx e jaw aplaudirin ex e jaw schʼin tuʼn tzalajbʼil.

 ¡Nimxix in tzalaje toj chmabʼil! Ok jlu ik tzeʼn chʼin kyqʼiqʼ jatumel at nim kyaq. Ni jun el ikʼunte weye, sino kykyaqilx tzaj kyqʼoʼn jun bienvenida weye ex ok tilil kyuʼn tuʼn tkubʼ nnaʼne bʼaʼn. Atxix toj qʼij aju, xi tzyet tuʼn nxiʼye kykyaqil martes toj chmabʼil. Tej tikʼ chʼin ambʼil, xi nqanine qa jaku chinxe kyoj chmabʼil in che ok kyoj Ja te Chmabʼil kye Testigos de Jehová. Maske prow qine ex oʼkxtoq at kabʼe nvestide, ex jun par nchanklaye, qʼuqlitoq nkʼuʼje tiʼj qa mlaytoq chin el ikʼune kyuʼn tmajen Dios. Ex mintiʼ in nel tzpete tiʼj jlu.

 Tuʼn nxiʼye toj Ja te Chmabʼil kye Testigos de Jehová iltoq tiʼj tuʼn t-xi nbʼetina nim tuʼn npone jatumel ate taxi. Iltoq tiʼj tuʼn in xi iqine kyuʼn erman tuʼn qjaxe twi witz tuʼn qpone toj Ja te Chmabʼil.

 Tuʼnju otoq tzʼel nnikʼe tiʼj qa tbʼaneltoq te Jehová ok qe nkʼuʼje tiʼj. Kubʼ nximane tuʼn kukx in nxiʼye kyoj chmabʼil (Salmo 34:8). Toj jbʼalil, in chin bʼaj tʼaqete moqa (tʼoqe), ex in bʼaj yaj nxbʼalune tukʼil xoqʼil tuʼn jlu, iltoq tiʼj tuʼn tel nchʼexpuʼne wiʼje aj npone toj Ja te Chmabʼil. ¡Pero nimtoq toklen tuʼn tbʼant jlu wuʼne!

 Yolin Anuario kye testigos de Jehová tiʼjju ikʼ toj wanqʼibʼile toj 1985. Tej tjaw tuʼjin jun ermana Josette tbʼi, te Suiza, tzaj qʼaqʼen tkʼuʼj wiʼje ex tzaj toyin jun silla de rueda weye aju in xi yukit kyukʼil qqʼabʼ. Tuʼn silla de rueda lu mlaytoq chin bʼaj yaje tuʼn xoqʼil. Ajtoq wexe bʼetel in che jaw labʼintoq kʼwal tiʼj silla de rueda ex in tzaj kyqʼamaʼn qa kygantoq tiʼj. Ya mintiʼtoq in xi njukʼun wibʼe twitz txʼotxʼ tuʼn «nbʼete» ex ya mintiʼtltoq in chin tzaj chʼixwiye aj wexe bʼetel. Nimtoq in chin tzalaje tuʼn jlu. In noktoq qʼoʼn woklene kyuʼn xjal ex mintiʼtl in el ikʼune kyuʼn.

 Tuʼnju nya nim tiʼchaq at weye ex mintiʼ jun nya bʼaʼn in bʼaʼntoq wuʼne jun rat in chʼiye toj wokslabʼil. Nim onin silla de rueda wiʼje tuʼnju jakutoq chin exa toj pakbʼabʼil. In bautisarine toj 9 de agosto de 1986. Chʼexpaj wanqʼibʼile tuʼnju in bautisarine. Toj ambʼil aju chʼexpaj nchwinqlale. In chin tzalajtoqe ex kubʼ nximane qa at woklene ex ok qe nkʼuʼje wiʼje tuʼnju attoq jun Nmane kʼujlaʼn qine tuʼn ex ate nim xjal in che ximentoq wiʼje.

 Wajtoqe tuʼn t-xi nchjoʼne te Jehová tkyaqilju otoq bʼant tuʼn wiʼje. Tuʼntzunju kubʼ nximane tuʼn woke te precursora regular, maske kubʼ nximane qa mlaytoq che japun or wuʼne (Salmo 116:12). Pero xi nqʼamaʼne jlu te Jehová toj naʼj Dios, ex bʼant jlu wuʼne. In oke te precursora toj 1 te enero te 1988 ex atxix toj ambʼil aju, kukx in nok tilil wuʼne. Nimxix kʼiwlabʼil o tzaj nkʼamoʼne tuʼnju in chin ajbʼena te precursora. In che onin erman wiʼje tuʼn kyjapun or wuʼne, ax ikx in nok nqʼoʼn nwitze tiʼj tzeʼn in onin Jehová wiʼje tukʼil xewbʼaj xjan (Salmo 89:21).

 Tuʼnju precursora qine, in chin yukche mastl, tuʼntzun jlu mas in che yukch nqane. Ya ma tzikʼ chʼin ambʼil in xiye toj jun akʼaj clínica tuʼntzun kyonin wiʼje tukʼil junjun ejercicio aju fisioterapia tbʼi. Noqtzun tuʼnj tzaj tqʼamaʼn enfermera weye qa noqx gan tuʼn tbʼant jlu wuʼne, tuʼnju nya nimtl ambʼil atx tuʼn wanqʼine ex ax jlu tzaj tqʼamaʼn juntl tukʼil weye, tzaj bʼaj nkʼuʼje tuʼn jlu. Te npone ja xi nqanine te Jehová tuʼn tonin wiʼje tuʼn tkubʼ kyiʼj nya bʼaʼn nximbʼetze ex tuʼn tkanet jun tbʼanel tratamient wuʼne.

 Tej tbʼet ambʼil, ok pakbʼabʼil te jun tbʼanel qʼanbʼil te weye tuʼnju mas yukch nxmilale. Tej otoq tzikʼ junjun abʼqʼi, jun kyxol enfermera aju otoq tzaj tqʼamaʼn weye qa chʼinxtoq nkyime, ikʼ ttxlaj Ja te Chmabʼil ex tzaj keʼyin wiʼje. ¡Mintiʼ xi tnimen qa itzʼxtoq qine!

 Maske in chin ok weye twitz nya bʼaʼn kukx in nok tilil wuʼne toj wajbʼebʼile te Jehová. Toj Ja te chmabʼil, in tzaj kyqʼamaʼn erman tbʼanel yol weye tuʼnju kukx in chin tzalaje ex lwey in chin pone kyoj chmabʼil, in bʼant jlu wuʼne tuʼn tten ambʼil wiʼje tuʼn nyoline kyukʼil kykyaqil erman iktzun tten in kubʼ nyekʼine qa in chin ximane kyiʼj.

 Toj tkyaqil wanqʼibʼile o tzʼok nkeʼyine qa tbʼanel te Jehová, nim kʼiwlabʼil o tzaj tqʼoʼn weye. Nim in tzalaje tuʼnju in onine kyiʼj oxe xjal tuʼn kybautisarin. Jun kyxol jlu Amelia tbʼi, ten toj clase 137 toj Escuela te Galaad. Atzun weye o chin tene ela maj toj xnaqʼtzbʼil kye Precursor regular. ¡O tzʼok jlu ik tzeʼn jun oyaj te weye tuʼn Jehová! Ex tuʼn jlu o chin oke te jun xjal kukx in tzalaj, at qʼuqbʼil nkʼuʼje wiʼje ex nkubʼ nnane qa nim woklene. Ya mintiʼ in tzaj nchʼixwiye alkye qine. Ate tbʼanel wamiwe kukx in chin ajbʼen te Jehová. Nya oʼkx tzalu Freetown, sino toj tkyaqil tnam ex toj tkyaqil twitz txʼotxʼ.

 O tzikʼ 40 abʼqʼi atxix tej tok nbʼine tnejel maj qa in tzaj ttziyen Dios jun akʼaj Txʼotxʼ jatumel ktel jun tbʼanel kychwinqlal xjal. Aju tziybʼil lu in nonin wiʼje tuʼn tten wipumale ex mintiʼ in nok in keʼyine jniʼ ambʼil atx taj tuʼn tjapun tuʼn, kukx in chin ayone tukʼil pasens tiʼj Jehová tuʼnju qʼuqli nkʼuʼje qa tzul naj tqʼijlalil .(Miqueas 7:7). O tzaj tbʼanel weye tuʼnju at npasense, ex o tzʼonin Jehová wiʼje tuʼn wexe kywitz nim nya bʼaʼn. Kukx at onil weye aj ttzaj nya bʼaʼn wiʼje. At nim tiquʼn tuʼn ntzalaje ex tuʼn ntzeʼne tuʼnju ax tok in jaw twaʼbʼine Jehová ex ok tqʼoʼn woklene aju nya ximentoq wuʼne.