Toj Domingo 24 te Febrero te 1924, toj qonikʼen aju etz jun akʼaj emisora toj radio kye xnaqʼtzal tiʼj tyol Dios, a aju WBBR tbʼi, ex ok kybʼiʼn kykyaqil xjal. ¿Tzeʼn xi tzyet jlu? ¿Alkye ok bʼiʼn te? ¿Alkye tten kukx in ajbʼen tecnología kyuʼn Testigos de Jehová toj tkyaqil tumel tuʼn t-xi qʼamet aju «tqanil bʼaʼn lu tiʼj tkawbʼil Dios [...] tuj tkyaqil twitz txʼotxʼ»? (Mateo 24:14).

 Xi tzyet inauracion a las 8:30 te qale ex kubʼaj tej tjapun kabʼe or. Atz tzaj tzyet toj akʼaj estudio Staten Island, New York. In tzaj tqʼamaʼn hermano Ralph Leffler aju encargado tiʼj sonido, aju kubʼ kynaʼn tej ateʼtoq toj cabina kubʼ kynaʼn nimxix tzalajbʼil ex tzaj chʼin xobʼil kyiʼj, ex ax ikx kubʼ k-xjelin qa attoq jun kʼokʼel bʼinte programa. Tqʼamatl Ralph jlu: «Ok in txqoʼne interruptor ex xi tzyet tuʼn tex toj radio, oʼkx o ayone tiʼjju mas tbʼanel».

 Atoq ermano Victor Schmidt locutor toj emisora lu ex gerente te estación te radio. Xi tzyet programa tuʼn kyukʼil junjun Xnaqʼtzal tiʼj Tyol Dios aʼyeju at kyojtzqibʼil tuʼn kybʼitzin. Tnejel xi tzyet tuʼn jun solista tuʼn tbʼitzin tukʼil piano ,yajxitl xi tbʼitzin Cora Wellman aju bʼitz «noventa y nueve ovejas» ex atztoq in jatz toj parabola yolin Jesús tiʼj. Aju tal rit otoq kyaj naj (Lucas 15:4-7). Nya oʼkx jlu, ax ikx xi kybʼitzin junjuntl bʼitz ik tzeʼn aju tbʼitz Frederick W. Franz aju in yolintoq tiʼj txʼolbʼabʼil tiʼj kʼwalbʼaj meltzʼaj juntl maj (Lucas 15:11-25).

 Atoq ermano Rutherford, qʼil twitz aqʼuntl kyxol Xnaqʼtzal tiʼj Tyol Dios ex tqʼoʼn jun chikʼbʼabʼil in yolintoq tiʼj estación te radio ik tzeʼn qe tiʼchaq nim kyoklen tuʼn tonin tiʼj «Tkawbʼil Jesús». Tqʼama jlu: «ax te Dios ma tzaj qʼoʼn ambʼil tuʼn tok kybʼin xjal radio, in nel qnikʼ tiʼj qa atzun tajbʼil Dios jlu, tuʼn tajbʼen radio quʼn tuʼn kyxi xnaqʼtzet xjal tuʼn tel kynikʼ kyiʼj profecía ex tiʼj tzeʼn in japun kywiʼ»

 Nim xjal te jawni te Estados Unidos ok kybʼiʼn aju tnejel transmisión toj radio, axpe ikx tqʼama jun xjal te Morrisville, Vermont aju atetoq toj junlo 320 kilometro (200  milla), chi: ma tzʼok nbʼiʼne tvoz ermano Rutherford’ clarxix ex mintiʼ ma chʼexpaj jun letra tuʼn. Axpe ikx ok tbʼiʼn jun xjal in nanqʼin toj jun lugar najchaq ik tzeʼn tnam Monticello Florida. Aju akʼaj estación te radio tbʼanel ela toj kywitz xjal ex tzaj kysamaʼn nim carta te tuʼn ttzaj kyqʼoʼn chjonte.

 Kukx ex qʼoʼn tbʼanel tqanil toj radio kyoj 33 abʼqʼi, b mas ok kybʼiʼn xjal te jawni te Estados Unidos, noqtzun tuʼnj at maj in noktoq conectarin WBBR tukʼil junjuntl estacion te radio tuʼntzun tpon toj tkyaqil lugar te Estados Unidos toj Canadá ex toj junjuntl. Etz qʼamaʼn toj Anuario kye Testigo de Jehová aju etz toj 1975 qa toj 1933 atzun abʼqʼi lu mas nim xjal ok kybʼiʼn tbʼanel tqanil toj radio tuʼntzunju ajbʼen 408 estación te radio tuʼntzun tpon tqanil kyoj tkyaqil continente, ex etz 23,783 chikʼbʼabʼil. Tuj ambʼil aju jakutoq che kanet nimku estación te radio tuʼna ex jakutoq tzʼok tbʼina qe chikʼbʼabʼil te Watch Tower toj ax ambʼil. Jaku txi qqʼamaʼn qa xi samet tbʼanel tqanil tiʼj axix tok toj radio.

 Tej tajbʼen radio WBBR kyuʼn xnaqʼtzal tij tyol Dios , attoq junlo 1,064 pakbʼal tiʼj Tkawbʼil Dios atz Estados Unidos. Onin radio tiʼj grupo lu maske nya nim kybʼaj, tuʼntzun t-xi kypakbʼaʼn tbʼanel tqanil kye mas xjal. Noqtzun tuʼnj tuj abʼqʼi 1957, ya attoq junlo 187,762 pakbʼal tij Tkawbʼil Dios atz Estados Unidos ex twitz tkyaqil txʼotxʼ atlo jun 653,273 kybʼet. Aju xnaqʼtzbʼil tzaj qʼoʼn tuj ja te chmabʼil nim onin kyiʼj erman tuʼn kyok te jun tbʼanilxix pakbʼal ,ik tzeʼn kyojele ja ex toj juntl tumel te pakbʼabʼil.

 Ok kyqʼoʼn kywitz erman tij tbʼanel aqʼuntl otoq bʼant tuʼn radio tuʼntzunju kubʼ kyximen alkye mas tbʼanel, qa aju tuʼn t-xi pakbʼet kye xjal toj radio moqa aju tuʼn t-xi pakbʼet ttziyele ja. ¿Tiʼtzun bʼaj yajxitl? Kubʼ kyximen tuʼn t-xi kykʼayin aju estación te radio WBBR aju in najbʼentoq tuʼn Sociedad Watchtower. Xi kʼayin estación te radio lu toj 15 te Abril te 1957. Atxtoq jun qʼij tuʼn t-xi kʼayin ok jun despedida tuj radio ex xiʼ kyqanin junjun xjel te, Nathan H. Knorr tiquʼn kxel kʼayit aju estación te radio Tzaj tqʼamaʼn qa tuʼnju ya otoq chmet kybʼaj testigos de Jehová tuʼn pakbʼabʼil ttziyele ja. Tqʼamaʼn jlu: «Aju estación te radio WBBR o tzʼonin nim kyiʼj xjal». «Pero kyoj lugar jatumel in nok kybʼin junjun qprograma mintiʼ in kanin ik tzeʼn aju in bʼant twitz tkyaqil txʼotxʼ». Tuʼntzunju o kubʼ kyximen erman qa mas kchʼiyel tajlal pakbʼal qa ma txi pakbʼet tbʼanel tqanil ttziyele ja twitzju tuʼn t-xi pakbʼet toj radio, nya t-xilen qa ya mintiʼ tuʼn tajbʼentl radio kyuʼn sino ajtoq tikʼ ambʼil oktoq kʼajbʼel toj junxitl tten.

 Toj 6 te octubre te 2014 bʼaj jun tiʼ tbʼanelxix toj ttnam Jehová, Xi tzyet tuʼn tetz jun programa toj televisión tukʼil internet aju tok tbʼi JW Broadcasting, atxix toj ambʼil lu kykyaqil testigo de Jehová ex junjuntl xjal in nok kykeʼyin jun programa tkyaqil xjaw toj tembʼil lu, ex aju aplicación JW Library , tembʼil toj internet «streaming», ex jun kʼuxbʼil tuʼn tpon señal tuʼn satelite. c Twitz tkyaqil txʼotxʼ kukx in najbʼen radio ex televisión kyuʼn erman tuʼn kypakbʼan. ¿Tiquʼn in xi qqʼamaʼn jlu?

 Kyoj abʼqʼi o che kyaj in tzaj kymajen erman radio ex televisión tuʼn tok kybʼin ex tuʼn tok kykeʼyin qe chmabʼil ex qe asamblea, tuʼnju mintiʼ señal te internet. Axpe ikx in nok kybʼiʼn nim xjal programa lu maske nya testigo de Jehová qe. Jun techel kyoj abʼqʼi 2021ex 2022 aqeju gerente te radio xi kyqʼamaʼn te sucursal kye testigos de Jehová te oriente te África, qa nim xjal kygan tuʼn tok kybʼiʼn qe kychmabʼil testigos de Jehová. Nya oʼkxju toj ttnam Kenia, Sudán te jawni ex Tanzania, nim xjal aqeju in nok kybʼiʼn programa o tzaj kyqanin jun kyxnaqʼtzbʼil tiʼj Tyol Dios.

 Noqtzun tuʼnj kukx in nok tilil kyuʼn testigos de Jehová tuʼn kypakbʼan tiʼj tbʼanel tqanil tiʼj Tkawbʼil Dios twitz tkyaqil txʼotxʼ ttziyele ja, toj qtembʼil jw.org ex kyukʼil yekʼbʼil uʼj. Jaku che kanet Biblia ex junjuntl uʼj toj qtembʼile te internet ex o che kubʼ qʼoʼn toj mas te 1,080 yol ex nya chjoʼn twiʼ tkyaqil jlu. Ax ikx in tzaj tqʼoʼn tzaqʼwebʼil kyiʼj nimku xjel tiʼj Biblia, ex in tzaj tqʼoʼn tqanil tiʼj alkye or ex jatumel in che ok qchmabʼile. In qo tzalaj tiʼj tkyaqil aqʼuntl o bʼant kyuʼn Testigos de Jehová tuʼnju jaʼlo mas nim xjal in nok kybʼiʼn tbʼanel tqanil tiʼj Tkawbʼil Dios. In nel qnikʼ tiʼj qa in xi pakbʼet tbʼanel tqanil «tuj tkyaqil twitz txʼotxʼ» ik tzeʼn in tzaj tqʼamaʼn Biblia (Mateo 24:14).