Tej tikʼ tkabʼin nimaq qʼoj, chʼixme tkyaqil tnam toj Europa otoq che kubʼ xiten. Maske otoq che etz tzaqpaj, Testigos de Jehová ex txqantl xjal kyoj campo de concentración Nazis, kukx ten kyanqʼibʼil kwest. Ik tzeʼn kye txqantl xjal ax ikx kye Testigos mintiʼ kywa ex kyxbʼalin toj ambʼil aju. Atx taj nim tiʼchaq kye ex mintiʼtoq jun kyja jatumel tuʼn kyanqʼin. In tzaj tnaʼn ermana Karin Hartung jlu: «Nyaxix nim ja attoq toj ambʼil aju, tuʼntzunju iltoq tiʼj tuʼn kyanqʼin kyukʼil kyfamiliar toj ax ja moqa tuʼn t-xi ky-alquilarin cuartos». Ten ermana Gertrud Poetzinger wuq abʼqʼi tukʼil mij kyoj junjun campo de concentración, ax ikx anqʼin jun ambʼil toj jun ja jatumel oʼkx in che okx kʼuyit herramientas ex atz kubʼ jtan tibʼaj jun siy. a

 ¿Tiʼ bʼant tuʼn ttnam Jehová tuʼn t-xi qʼet onbʼil kye erman in che anqʼin atz jatumel tzaj xitbʼil tuʼn nimaq qʼoj? ¿Tiʼ xnaqʼtzbʼil jaku tzʼel qiʼn kyiʼj qeju e anqʼin kyoj ambʼil kwest tej tikʼ nimaq qʼoj?

 Jurat naj kanet tumel tuʼn ttnam Jehová tuʼn t-xi kyqʼoʼn onbʼil kye erman te Europa. Toj xjaw te noviembre ex diciembre  te 1945, aqeju erman Nathan Knorr ex Milton Henschel te central mundial i ex visitaril kye erman te Inglaterra, Suiza, Francia, Bélgica, los Países Bajos, Dinamarca, Suecia, Finlandia ex Noruega. Tuʼnju kyajtoq tuʼn tok kyojtzqin alkye tiʼchaq at tajbʼen kye erman. Tqʼama ermano Knorr jlu: «Ok qkeʼyine tnejel maj jniʼ xitbʼil otoq bʼaj kyoj tnam noq tuʼn nimaq qʼoj».

 Toj ambʼil aju mintiʼ xi qʼoʼn ambʼil te ermano Knorr tuʼn tokx toj Alemania. Pero aju ermano Erick Frost at toklen tuʼn tok tkeʼyin aqʼuntl toj sucursal te Alemania toj ambʼil aju, etz toj tnam tuʼn tyolin tukʼil ermano Knorr. b In tzaj tqʼamaʼn Erick jlu: «Tzaj tqʼoʼn ermano Knorr tbʼanel consej qeye ex tzaj ttziyen qa tuʼn ttzaj kysamaʼn wabʼj ex xbʼalun tuʼn tajbʼen quʼne». Ax ikx tqʼama: «Tej tikʼ chʼin ambʼil, pon toj Alemania nim harina, manteca, avena ex junjuntl wabʼj. Ax ikx qe Testigos te juntl tnam tzaj kysamaʼn nim caja nojni qe tukʼil xjabʼ, ex nim clase te xbʼalun». E jaw oqʼ erman tuʼnju nim e jaw tzalaj kyiʼj oyaj pon samaʼn kye kyuʼn erman. Ex «nya oʼkx a qe tiʼchaq jlu e pon samaʼn», tqʼama jun informe, «tuʼnju kukx xi kysamaʼn erman onbʼil toj juntl kabʼe abʼqʼi tukʼil mij». c

 Tej kymejorarin qe tiʼchaq tuʼn kyanqʼin, kukx ok tilil kyuʼn erman tuʼn kyajbʼen te Jehová. ¿Tzeʼn bʼant jlu kyuʼn?

 Kukx ok tilil kyuʼn tuʼn kyajbʼen te Jehová (Efesios 5:15,16). Toj ambʼil tej ttzaj nimaq qʼoj, kwest tuʼn kykanet qe uʼj in che etz tuʼn ttnam Jehová, moqa tuʼn kyex erman pakbʼal ex tuʼn tok kychmoʼn kyibʼ tuʼn kykʼulin te Jehová. Noqtzun tuʼnj, tej tikʼ nimaq qʼoj, chebʼe chebʼe xi tzyet tuʼn kypakbʼan ex tuʼn tok kychmon kyibʼ erman juntl maj. Jun ermano Jürgen Rundel tbʼi, atz in anqʼin Austria in tzaj tnaʼn: «Aju jaw quʼjine toj Informador d ex aju tzaj kyqʼamaʼn qe erman in che bʼet kyoj Ja te Chmabʼil, onin qiʼje tuʼn kukx tok tilil quʼne tuʼn qajbʼene te Jehová. Kubʼ qqʼone Jehová ex Jesús tnejel toj qanqʼibʼile, ik tzeʼn tuʼn qpakbʼane ex tuʼn qxnaqʼtzane qjunalxe tiʼj Biblia. Mintiʼ juntl tiʼ el qʼinte ambʼil qeye, ik tzeʼn televisión».

 Tqʼama ermana Ulrike Krolop jlu: «Naʼnx wuʼne qa in chin tzalajtoqe aj nxnaqʼtzane tiʼj jun xnaqʼtzbʼil kwest tuʼn tel qnikʼ tiʼj. Kubʼ tqʼoʼn nchmile jun tbʼanel techel nwitze, tuʼnju maske at nim tiʼchaq tuʼn t-xi tbʼinchan pero in neltoq tpan ambʼil tuʼn t-xnaqʼtzan tiʼj jun Atalaya». Karin aju ma qo yolin tiʼj, in tzaj tnaʼn jlu: «Tej ttzaj nimaq qʼoj, el qnikʼe tiʼj qa jurat naj jaku txi naj qe tiʼchaq at teya. Pero aju xnaqʼtzbʼil in netz tuʼn ttnam Jehová, maske nya nim, kukx ul qukʼile. Kukx ok tkwentin Jehová qeju tmajen e ten tzʼaqli».

 Xi tzyet tuʼn kypakbʼan juntl maj (Mateo 28:19, 20). Tej tten nimaq qʼoj ya mintiʼtl bʼant tuʼn kypakbʼan erman ex tuʼn t-xi kyqʼoʼn xnaqʼtzbʼil tiʼj Tyol Dios. Jun ermano in nok tbʼi te Friedhelm in tzaj tnaʼn qa tej tikʼ nimaq qʼoj «kykyaqil jurat naj xi tzyet tuʼn kypakbʼan». In tzaj tqʼamaʼn Ulrike jlu tiʼj ambʼil aju: «Aju tnejel Testigo pakbʼan kye tfamilia nchmile, kukxtoq tok t-uniforme aju in najbʼen toj campo te concentración. Kubʼ tyekʼin qa jurat naj xi tzyet tuʼn tpakbʼan». In tzaj tqʼamaʼn Jürgen jlu: «Tej tikʼ nimaq qʼoj, kykyaqilx kyajtoq tuʼn kypakbʼan. Nim qe kuʼxun xi tzyet tuʼn kypakbʼan te tkyaqil ambʼil ».

 Ok kyojtzqin tfamilia Ulrike aju axix tok tbʼajlenxi qʼoj. In tzaj tnaʼn jlu: «Kwesttoq qanqʼibʼile tuʼnju tzaj qʼoj». Axpe ikx, nimku xjal in che anqʼintoq kyxol tbʼuchil ja. Entonces, ¿tzeʼn in che kanettoq xjal kyuʼn testigos de Jehová? In tzaj tqʼamaʼn jlu: «In xi qjyoʼntoqe jatumel in che kʼanttaq lámpara ex jatumel at sibʼ».

 Xi kyqʼuqbʼaʼn kykʼuʼj kyxolx (1 Tesalonicenses 5:11). Akux in nikʼ qʼoj, ok bʼinchan nim nya bʼaʼn kyiʼj testigo de Jehová. Noqtzun tuʼnj, tej tkubʼaj qʼoj mintiʼ ok kyqʼoʼn kywiʼ tiʼj nya bʼaʼn otoq che ikʼ toj, sino mas xi kyqʼuqbʼaʼn kykʼuʼj kyxolx. Kubʼ kynaʼn nim tzalajbʼil tuʼnju e ten tzʼaqli twitz Jehová tej kymalonjtz toj kyokslabʼil (Santiago 1:2, 3). In tzaj tqʼamaʼn Johannes aju in anqʼin Estados Unidos jlu: «Attoq jun erman in bʼet kyojele Ja te Chmabʼil aju otoq ten kyoj campo de concentración ex kukxtoq in tzaj tqʼamaʼn junjun experiencia tiʼj tzeʼn otoq tzʼonin Jehová kyiʼj erman. ¡Nimxix chʼiy qʼuqbʼil qkʼuʼje kyuʼn kykyaqil qeju experiencia tzaj tqʼamaʼn erman!».

 In tzaj tqʼamaʼn Johannes qa, tej tbʼaj nimaq qʼoj, kukx e ten erman ttxlaj Jehová akux in tzaj kynaʼn tzeʼn otoq tzʼonin Jehová kyiʼj tej kyten kyoj campo te concentración ex tzeʼn otoq tzaj tzaqʼweʼn kynaʼj Dios. Ex ik tzeʼn ma qo yolin tiʼj, kukx ok tilil kyuʼn Testigos tuʼn tten jun tbʼanel kyamiwbʼil tukʼil Jehová: In jawtoq kyuʼjin Biblia tkyaqil qʼij, e ten kyoj chmabʼil ex mintiʼ kyaj kykolin tuʼn kypakbʼan. Ten Elisabeth toj asamblea te Núremberg toj 1946 ex in tzaj tqʼamaʼn jlu: «Aqeju erman otoq che ten pres kukx delgado qeʼ ex mintiʼ kyjwers. Pero, aj kyok ten yolil tiʼj otoq tzikʼ kyiʼj, in jaw qoptzʼaj kywitz tuʼnju nimxix tzalajbʼil in kubʼ kynaʼn» (Romanos 12:11).

 Mintiʼ el kypan kyibʼ (Romanos 1:11, 12). Akux at qʼoj, mintiʼ e bʼant tuʼn kyten Testigos junx nim ambʼil tuʼnju in che el ikʼun. In tzaj tqʼamaʼn Karin jlu: «Mintiʼxix in cheʼx erman visitaril kyibʼ kyxolx tuʼntzun miʼn tok kyqʼoʼn aj kawil kywitz kyiʼj ex tuʼn miʼn ttzaj nya bʼaʼn kyiʼj txqantl erman». Chʼexpaj tkyaqil lu tej tkubʼaj qʼoj. «Xi kybʼinchaʼn erman tkyaqil junx toj mujbʼabʼil», chi Friedhelm, «aqeju chmabʼil ex pakbʼabʼil atzunju tnejel in kubʼ kyqʼoʼn toj kyanqʼibʼil».

 Jun anciano te Alemania Dietrich tbʼi, in tzaj tnaʼn qa kyoj qeju tnejel abʼqʼi tbʼajlenxi qʼoj noq junjun Testigos attoq kykar: «Ex il tiʼj tuʼn qxi bʼete tuʼn qpone toj chmabʼil ex in bʼant jlu quʼne junx kyukʼil nim erman. Onin aju ambʼil qiʼje tej qtene junx tuʼn tchʼiy qamiwbʼile kyukʼil erman. Ok qoʼye ik tzeʼn jun familia».

 Toj ambʼil jaʼlo nim qe tmajen Jehová in che ex twitz nya bʼaʼn tuʼn tpaj xitbʼil in tzaj twitz Txʼotxʼ, ik tzeʼn qe yabʼil , qʼoj, aju ikʼbʼil ex mebʼayil (2 Timoteo 3:1). Maske jaku qo ok we twitz nya bʼaʼn ik tzeʼn jlu, mas bʼaʼn qa mintiʼ ma tzaj bʼaj qkʼuʼj tiʼj. ¿Tiquʼn? Tuʼnju aju techel kyaj kyqʼoʼn erman e anqʼin atz Alemania tej kyten Nazis, in nonin qiʼj tuʼn kukx qten tzʼaqli twitz Jehová, ax ikx, in tzaj tqʼuqbʼaʼn qkʼuʼj qa mlay qo kyaj tkolin Jehová kyoj qe mankbʼil tqʼijlalil. Tuʼntzunju tbʼanel qa ma tzʼel qkanoʼn tiʼj apóstol Pablo, tej tkubʼ tzʼibʼin jlu: «Kyjaʼtzun in qeʼxix qkʼuʼj tuʼn t-xi qmaʼn: Ate Qman onil weye; mlay chin xobʼe. Mintiʼ jun mya bʼaʼn jaku kybʼincha xjal wiʼje» (Hebreos 13:6).