Agostinho, jun xjal te Brasil, in tzaj tqʼamaʼn jlu: «In jaw chʼiye toj kojbʼil, puro prowtoq qoʼye ex kyaj ntzaqpiʼne escuela tuʼn waqʼunane tuʼntzun wonine kyiʼj nmane». Bʼant tuʼjin Agostinho tejxi tjapun twi 33 abʼqʼi. In tqʼamaʼntl jlu: «Tej tbʼant wuʼjine ex ntzʼibʼine, kubʼ nnaʼne qa at woklene ex in tzalaje».

 At Agostinho kyxol qeju 250 mil xjal e onin testigo de Jehová kyiʼj tuʼn tbʼant kyuʼjin ex tuʼn tbʼant kytzʼibʼin kyoj qeju 70 abʼqʼi o che ikʼ. ¿Tiquʼn in bʼant jlu quʼne, aqoʼye testigo de Jehová? ¿Tzeʼn in nonin xnaqʼtzbʼil jlu kyiʼj xjal tuʼn tbʼant kyuʼjin?

 Kyoj abʼqʼi 1930, ya in che pakbʼantoq testigo de Jehová kyoj 115 tnam. Tuʼn kypakbʼan kyoj junxichaq yol, in xi kyyekʼintoq misionero junjun grabación tiʼj chikʼbʼabʼil tiʼj tyol Dios toj kyyol xjal. Attoq nim xjal kyajtoq tuʼn tel kynikʼ tiʼj Tyol Dios, noqtzun tuʼnj, kwesttoq tuʼn t-xi qʼoʼn xnaqʼtzbʼil kye tuʼnju mintiʼtoq in bʼant kyuʼjin nix kytzʼibʼin.

 Qa nyatoq bʼaʼn uʼj kyuʼn xjal, mlaytoq bʼant tuʼn tel kynikʼ tiʼj Biblia nix tuʼn tbʼant tajbʼil Dios kyuʼn (Josué 1:8; Salmo 1:2, 3). Ax ikx, mlaytoq bʼant tuʼn tjapun kyoklen twitz Dios. Jun techel, qa mintiʼtoq in bʼant kyuʼjin mambʼaj, mlaytoq bʼant tuʼn kyxi kyxnaqʼtzaʼn kykʼwal (Deuteronomio 6:6, 7). Ex aqeju e ok te testigo yajxi, qa nyatoq bʼaʼn uʼj kyuʼn, mlaytoq bʼant tuʼn kypakbʼan nix tuʼn t-xi kyqʼoʼn xnaqʼtzbʼil kye xjal.

 Kyoj abʼqʼi 1940 ex 1950, kabʼe ermano nejni qe twitz aqʼuntl, a ermano Nathan H. Knorr ex Milton G. Henschel, i ex bʼet kyoj junjun tnam tuʼntzun kyonin tuʼn tbʼaj nukʼuʼn pakbʼabʼil. Xi kyqʼamaʼn kye erman kyoj Ninja Qʼil twitz Aqʼuntl kyoj qe tnam jatumel mintiʼxix in bʼanttoq kyuʼjin xjal, qa iltoq tiʼj tuʼn t-xi qʼoʼn xnaqʼtzbʼil kye erman kyoj Ja te Chmabʼil tuʼn tbʼant kyuʼjin ex tuʼn tbʼant kytzʼibʼin.

 Xi kysamaʼn erman toj sucursal junjun tqanil kye congregación tuʼn tel kynikʼ tzeʼn tuʼn t-xi kyqʼoʼn xnaqʼtzbʼil kye txqantl tuʼn tbʼant kyuʼjin. Kyoj junjuntl tnam, ajbʼen kyuʼn erman aju xnaqʼtzbʼil in xitoq tqʼoʼn gobierno. Jun techel, aju Ninja Qʼil twitz Aqʼuntl te Brasil, xi tsamaʼn kye congregación junjun uʼj i etz tuʼn gobierno tuʼn tbʼant kyuʼjin xjal. Atzun kyoj junjuntl tnam, aʼyex erman bʼaj kybʼinchen jun xnaqʼtzbʼil tuʼn tbʼant kyuʼjin xjal.

 Kykyaqil xjal, qe xinaq, qe xuʼj, qe kʼwal ex qe tij, jakutoq che pon kʼamol xnaqʼtzbʼil. ¿Tiquʼn? Tuʼntzun tbʼant kyuʼjin kykyaqil xjal toj kyex kyyol. Tuʼntzunju, xi qʼoʼn xnaqʼtzbʼil kyoj nim yol toj ax Ja te Chmabʼil.

 ¿Tzeʼn in nonin xnaqʼtzbʼil jlu kye xjal tuʼn tbʼant kyuʼjin? Jun testigo de Jehová toj tnam México xi tqʼamaʼn jlu: «Jaʼlo si jaku tzʼel nnikʼe tiʼjju in tzaj tqʼamaʼn Tyol Dios ex in kuʼpun toj wanmiye. Tuʼnju ma bʼant wuʼjine, mintiʼ in tzaj xobʼe aj nyoline kyukʼil nvecine tiʼj Tyol Dios».

 In nonin xnaqʼtzbʼil tuʼn tbʼant kyuʼjin xjal tuʼn tel kynikʼ tiʼj Biblia, ¿atpe juntl tbʼanel in tzaj kyiʼj xjal tuʼn jlu? At. In tzaj tqʼamaʼn Isaac, te tnam Burundi jlu: «Tuʼnju ya o bʼant wuʼjine ex ntzʼibʼine, jaku bʼant mas tbʼanel waqʼune. O kanet waqʼune tuʼn tjaw bʼinchet ja ex o chin oke te nejenel kyxol aqʼunal».

 Qʼiʼntoq 49 abʼqʼi tuʼn jun xuʼj te tnam Perú, Jesusa tbʼi, tej t-xi qʼoʼn xnaqʼtzbʼil te tuʼn tbʼant tuʼjin. In tzaj tqʼamaʼn jlu: «Tuʼntzun tjapun woklene te xuʼjilbʼaj, il tiʼj tuʼn tok nkeʼyine alkye kybʼi tiʼchaq ex jteʼ kywiʼ aj nxiʼye loqʼel. Kwesttoq jlu te weye ojtxe, pero jaʼlo, tuʼnju o tzaj xnaqʼtzan weye tuʼn tbʼant wuʼjine, mas tbʼanel in kubʼ nnaʼne aj nxiʼye loqʼel kyukʼil nfamiliaye».

 Kyoj qe abʼqʼi o che ikʼ, in xi kyqʼoʼn junjun gobierno chjonte kye testigo de Jehová tuʼnju in xi kyqʼoʼn xnaqʼtzbʼil kye xjal tuʼn tbʼant kyuʼjin. Kukx in bʼant jlu quʼne, aqoʼye testigo de Jehová. Ex in najbʼen junxichaq tumel tuʼn tex qqʼoʼne xnaqʼtzbʼil mas tbʼanel. O tzʼetz mas te 224 millón uʼj toj junlo 720 yol tuʼn t-xi qqʼoʼne xnaqʼtzbʼil kye xjal tuʼn tbʼant kyuʼjin ex tuʼn qonine kyiʼj tuʼn kyuʼjin mas tbʼanel. a