Toj abʼqʼi 2023, qkyaqilx qaj tuʼn qtzalaj junx kyukʼil toj qja. ¿Tiʼ jaku tzʼonin qiʼj tuʼn qtzalaj?

 In tzaj tqʼamaʼn Tyol Dios qa noq toj chʼin ambʼil che tel nya bʼaʼn in qo ok weʼ twitz ex qa ya mlay che tentl toj ambʼil tzul. Axpe ikx, «tkyaqil aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe, [...] ex tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Romanos 15:4).

•   Tuʼn tel mas tnikʼa tiʼjju in tzaj ttziyen Biblia, uʼjinktza xnaqʼtzbʼil «¿Atpe jun tbʼanel ambʼil tzul?».

 In tzaj tqʼamaʼn Tyol Dios qa in nok qʼuqbʼil qkʼuʼj ik «tzaʼn taqʼal barc» (Hebreos 6:19). Jaku tzʼonin qʼuqbʼil qkʼuʼj qiʼj. In nonin qiʼj tuʼn qex kywitz nya bʼaʼn toj ambʼil jaʼlo, tuʼn tten jun tbʼanel qximbʼetz ex tuʼn tkubʼ qnaʼn axix tok tzalajbʼil. Keʼyinka jlu:

•   Qʼonka twitza tiʼj tzeʼn onin qʼuqbʼil tkʼuʼj jun xjal tiʼj tuʼn tkyaj ttzaqpiʼn jun vicio. Qʼonka twitza tiʼj video «El wikʼune aju wanqʼibʼile qʼiʼntoq».

•   Qʼonka twitza tiʼj tzeʼn in nonin qʼuqbʼil qkʼuʼj in tzaj tqʼoʼn Tyol Dios aj tkyim jun toj qja. Qʼonka twitza tiʼj video Aju bʼis in kubʼ qnaʼn aj tkyim jun xjal kʼujlaʼn quʼn.

 In che ayon nim xjal tuʼn kybʼaj tiʼchaq tbʼanel, pero nya qʼuqli kykʼuʼj tiʼj qa che bʼajel. Atzun qe tziybʼil tkuʼx toj Biblia junxitl qe. ¿Tiquʼn? Tuʼnju a Jehová a o qʼamante «ex mibʼan te Dios nikʼan yol» (Tito 1:2). Oʼkx Jehová at tipumal tuʼn t-xi tbʼinchaʼn tkyaqilju in tzaj tqʼamaʼn ex in tzaj tqʼamaʼn Biblia jlu tiʼj: «In tbʼinchaʼn Qman tkyaqil noq alkye tajbʼil» (Salmo 135:5, 6).

 In xi qqʼone txokbʼil tiʼja tuʼn ttzalaja tiʼj qʼuqbʼil qkʼuʼj in tzaj tqʼoʼn Biblia. Jaku bʼant jlu tuʼna aj tel tpaʼna ambʼil tuʼn t-xnaqʼtzana tiʼj Tyol Dios (Hechos 17:11). ¿Taja tuʼn t-xnaqʼtzana noq kukx tiʼj Tyol Dios? ¡Tbʼanel qa ma txi tzyet abʼqʼi 2023 tuʼna tukʼil tzalajbʼil!