¡KUKX QO XQʼUQIN!
¿Atzpe tzul qʼoj Armagedón toj tnam Israel? | ¿Tiʼ in tzaj tqʼamaʼn Biblia?
In tzaj tqʼamaʼn Biblia qa aju qʼoj Armagedón nya toj jun lugar kʼokel, sino in tzaj tqʼamaʼn qa jun qʼoj lu kʼokel tuʼn Dios kyukʼil kykyaqil aj kawil twitz tkyaqil Txʼotxʼ.
«Aqe jlu juʼẍ qe puro ploj qe [...] in che pon kyukʼil rey tuj tkyaqil twitz txʼotxʼ tuʼn kyok kychmoʼn, tuʼntzun kyqʼojin tiʼj Dios tuj jun qʼij maʼ toklen, aju Dios at tipumal tuʼn tbʼant tkyaqil tuʼn. [...] Ex e ok kychmoʼn qe rey tuj lugar Armagedón tbʼi tuj yol hebreo» (Apocalipsis 16:14, 16).
Atz tzajni yol Armagedón tiʼj yol hebreo Har Meghiddóhn ex a t-xilen «witz te meguidó». Jun tnamtoq te Meguidó ex attoq toj ojtxe tnam Israel. Tuʼn jlu, ateʼ junjun xjal in kubʼ kyximen qa atz tzul qʼoj Armagedón toj tnam Israel. Pero aqeju «rey tuj tkyaqil twitz txʼotxʼ» ex kykyaqil kysoldad mlayx bʼajx kyten tuʼn kyqʼojin toj jun lugar ik tzeʼn Meguidó moqa alkyexku juntl lugar toj oeste te Asia (Oriente Próximo).
Tej tkubʼ tzʼibʼin uʼj te Apocalipsis, ajbʼen nim yol toj aju in che ok te techel juntl tiʼ (Apocalipsis 1:1 La Biblia. Traducción del Nuevo Mundo). Tuʼntzunju, aj tyolin Biblia tiʼj Armagedón, mintiʼ in yolin tiʼj jun lugar, sino in yolin tiʼjju kbʼajel twitz tkyaqil Txʼotxʼ aj tok kychmon kyibʼ kykyaqil tnam tuʼn kyqʼojin tiʼj t-gobierno Dios toj bʼajsbʼil qʼoj (Apocalipsis 19:11-16, 19-21).