¿In kubʼpe t-ximana qa tzul jun tbʼanel ambʼil? At nim xjal in nok tilil kyuʼn tuʼn tten jun tbʼanel kyximbʼetz maske at nim nya bʼaʼn. ¿Jakupe tzʼok qeʼ qkʼuʼj tiʼj qa ya mlay ten nya bʼaʼn? Jaku. In tzaj tqʼoʼn Biblia jun qʼuqbʼil qkʼuʼj qa ax tok tzul jun tbʼanel ambʼil.

•  ¿Tiʼ in tzaj ttziyen Tyol Dios?

•  ¿Axpe tok aju in tzaj tqʼamaʼn Biblia tiʼj ambʼil tzul?

•  ¿Alkye tten kjapunel aju in tzaj ttziyen Tyol Dios?

•  ¿Jtoj japun twiʼ aju in tzaj ttziyen Tyol Dios?

•  ¿Tzeʼn jaku che onin tziybʼil toj Tyol Dios tiʼja toj ambʼil jaʼlo?

 Mintiʼ in kubʼ tewin Biblia tkyaqil nya bʼaʼn in tzaj kyiʼj xjal toj ambʼil jaʼlo, pero in tzaj ttziyen qa mlay che ten nya bʼaʼn lu te jumajx. Qo xnaqʼtzan kyiʼj junjun.

•   Aju nya bʼaʼn: Mintiʼ kyja xjal

   Aju in tzaj tqʼamaʼn Tyol Dios: «Kjawil kybʼinchaʼn xjal kyja ex ax qe che najal tuj» (Isaías 65:21).

   Aju kbʼajel: Kykyaqil xjal ktel jun kyja.

•   Aju nya bʼaʼn: Mintiʼ kyaqʼun xjal ex mebʼa qeʼ moqa prow qeʼ

   Aju in tzaj tqʼamaʼn Tyol Dios: «Qe xjal skʼoʼmaj wuʼne che tzalajel tiʼj taqʼunbʼen kyqʼabʼ» (Isaías 65:22).

   Aju kbʼajel: Kykyaqil xjal ktel jun kyaqʼun aju kygan ex in che tzalaj tiʼj.

•   Aju nya bʼaʼn: Qe nya bʼaʼn in nok bʼinchaʼn kyiʼj txqantl

   Aju in tzaj tqʼamaʼn Tyol Dios: «Qe nejenel che kawil tuj tumelxix» (Isaías 32:1).

   Aju kbʼajel: Kxel bʼinchaʼn kyiʼj kykyaqil xjal toj tumelxix. Kykyaqil ktel tiʼchaq kye ex mlay tzʼok bʼinchaʼn nya bʼaʼn kyiʼj xjal tuʼn kyyajil moqa tuʼnju alkye kyoklen at.

•   Aju nya bʼaʼn: Mintiʼ kywa xjal

   Aju in tzaj tqʼamaʼn Tyol Dios: «Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz txʼotxʼ» (Salmo 72:16).

   Aju kbʼajel: Ktel nim tbʼanel wabʼj kye kykyaqil. Ni jun kxeʼl jtal tukʼil weʼyaj ex ni jun kʼokel tyabʼ tuʼnju mintiʼ twa.

•   Aju nya bʼaʼn: Aju elqʼabʼil ex aju bʼiybʼel

   Aju in tzaj tqʼamaʼn Tyol Dios: «Kykyaqil xjal che anqʼil mintiʼtl kyxobʼil, ex teylex te junjun kʼojlal tjaqʼ t-xlekumal tqan t-uva ex tqan t-higo» (Miqueas 4:4).

   Aju kbʼajel: Kykyaqil xjal ya mlay che tzaj xobʼ tuʼnju ya mlay che ten xjal nya bʼaʼn ex «qe xjal bʼaʼn ok che etzal tiʼj ju txʼotxʼ» (Salmo 37:10, 29).

•   Aju nya bʼaʼn: Qe qʼoj

   Aju in tzaj tqʼamaʼn Tyol Dios: «Mlayx tzaj kytzyuʼn qe tnam juntl maj kyspad tuʼn kyqʼojin kyiʼj txqantl tnam, ex mlayx kykʼam juntl maj xnaqʼtzbʼil tuʼn tbʼant kyqʼojin» (Isaías 2:4).

   Aju kbʼajel: Ktel mujbʼabʼil twitz tkyaqil Txʼotxʼ (Salmo 72:7). Ni jun tzul nya bʼaʼn tiʼj tuʼn qʼoj, ni jun kxeʼl anqʼil toj juntl lugar ex ni jun kjawil oqʼ tuʼnju ya mlay ten kamik.

•   Aju nya bʼaʼn: Qe yabʼil

   Aju in tzaj tqʼamaʼn Tyol Dios: «Mi jun xjal najl tuj tnam ok tmaʼ kyjaʼ: Yabʼ qine, chiwt» (Isaías 33:24).

   Aju kbʼajel: Ya mlay che ten xjal nya tzʼaqli kyxmilal ex ya mlay tzaj yabʼil kyiʼj xjal (Isaías 35:5, 6). Nya oʼkxju, axpe ikx in tzaj ttziyen Biblia qa ya miʼn tentl kamik (Apocalipsis 21:4).

•   Aju nya bʼaʼn: Aju nya bʼaʼn o tzʼok bʼinchaʼn tiʼj Txʼotxʼ

   Aju in tzaj tqʼamaʼn Tyol Dios: «Ktzalajel aju lugar mintiʼ kynajbʼil xjal tuj, ex aju tzqij txʼotxʼ ktzalajel nimxix ex che jawil poqʼl nim bʼech twitz» (Isaías 35:1).

   Aju kbʼajel: Kʼokel tkyaqil twitz Txʼotxʼ te jun tbʼanel najbʼil atz jatumel jaku che anqʼin xjal, ik tzeʼn kubʼ t-ximen Dios tnejel (Génesis 2:15; Isaías 45:18).

 At maj kwest tuʼn tkubʼ qximen qa ax tok jlu. Pero tbʼanel qa ma xnaqʼtzana tiʼjju in tzaj ttziyen Biblia tiʼj ambʼil tzul. Tkyaqilju in tzaj ttziyen Biblia mintiʼ toklen tukʼilju in tzaj kytziyen xjal ex tukʼilju in tzaj kyqʼamaʼn tiʼj ambʼil tzul. Aju in tzaj tqʼamaʼn Biblia atz in tzaj tukʼil Dios. ¿Tiquʼn junxitl aju in tzaj ttziyen Dios? Qo xnaqʼtzan tiʼj kabʼe tiquʼn:

•   Jaku tzʼok qeʼ qkʼuʼj tiʼj Dios. In tzaj tqʼamaʼn Biblia qa «mibʼan te Dios nikʼan yol» moqa mintiʼ in tzaj tqʼamaʼn nya ax tok yol (Tito 1:2). Ax ikx, oʼkx Dios jaku tzaj qʼamante tiʼ kbʼajel toj ambʼil tzul (Isaías 46:10). Ateʼ nim techel toj Biblia aʼyeju in tzaj kyyekʼin qa kukx in japun aju in tzaj tqʼamaʼn Dios. Qa taja tuʼn tel mas tnikʼa tiʼj jlu, qʼonka twitza tiʼj video tok tbʼi: ¿Tiquʼn jaku tzʼok qʼuqeʼ qkʼuʼj qa ax tok aju tkuʼx toj Tyol Dios?

•   Jaku txi tbʼinchaʼn Dios kyiʼj nya bʼaʼn in che tzaj qiʼj. In tzaj tqʼamaʼn Biblia qa «in tbʼinchaʼn Qman tkyaqil noq alkye tajbʼil» (Salmo 135:5, 6). Toj juntl yol, mintiʼ jun jaku tzʼel qʼinte ambʼil te Dios tuʼn tjapun twi t-ximbʼetz. Ax ikx, taj Dios tuʼn tonin qiʼj tuʼnju kʼujlaʼn qoʼ tuʼn (Juan 3:16).

 Ax tok, bʼalo in kubʼ t-ximana jlu: «Qa taj Dios tuʼn tonin qiʼj ex jaku bʼant tuʼn, ¿tiquʼn kukx in che tzaj nim nya bʼaʼn qiʼj?». Qa taja tuʼn tel mas tnikʼa tiʼj tzaqʼwebʼil tiʼj xjel lu, qʼonka twitza tiʼj video ¿Tiquʼn in tzaj tqʼoʼn Dios ambʼil te yajbʼil?

 Kjapunel twi ttziybʼil Dios tuʼn Tkawbʼil, aju gobierno lu ktel toj kyaʼj. O txi tqʼoʼn Dios toklen Jesús tuʼn tkawin toj Kawbʼil lu, ex o txi tqʼoʼn toklen tuʼn t-xqʼuqin tiʼj Txʼotxʼ ex kyiʼj qeju in che anqʼin twitz. Tej tten Jesús tzalu twitz Txʼotxʼ, e kubʼ tqʼanin qe yabʼ, xi tqʼoʼn kywa xjal, weʼ kyqʼiqʼ tuʼn, ax ikx e jaw anqʼin junjun xjal tuʼn (Marcos 4:39; 6:41-44; Lucas 4:40; Juan 11:43, 44). Aju bʼant tuʼn, jun yekʼbʼil tiʼjju kbʼantel tuʼn aj tok te Rey toj Tgobierno Dios.

 Qa taja tuʼn tel mas tnikʼa tiʼj tzeʼn kʼonil Tkawbʼil Dios tiʼja, qʼonka twitza tiʼj video ¿Tiʼ aju Tkawbʼil Dios?

 Ya chʼixtl. ¿Tiquʼn jaku tzʼok qeʼ qkʼuʼj tiʼj? Tuʼnju tzaj tqʼamaʼn Biblia ojtxe qa kbʼajel junjun tiʼchaq aʼyeju tzul kyyekʼin qa chʼixtoq t-xi tzyet tuʼn tkawin Tkawbʼil Dios twitz Txʼotxʼ (Lucas 21:10, 11). Qkyaqilx in nok qqʼoʼn qwitz tiʼj qa in japun twi tkyaqilju kyaj tqʼamaʼn Biblia.

 Qa taja tuʼn tel mas tnikʼa tiʼj, jaku jaw tuʼjina xnaqʼtzbʼil «¿Jtoj kkawil Tkawbʼil Dios tibʼaj Txʼotxʼ?».

 Tqʼama jun aj tzʼibʼil tiʼj Tyol Dios qa aju qʼuqbʼil qkʼuʼj in tzaj tqʼoʼn Biblia «ik tten ik tzaʼn taqʼal barc, in ajbʼen te tzuybʼil te qanmi tuʼn tten qanmi segurxix ex tuʼn miʼn qyyukch» (Hebreos 6:19). Ik tzeʼn taqʼal barc in ajbʼen te tzyubʼil te barc tuʼn tten kyuw aj ttzaj jun kyqʼiqʼ jbʼal, ax ikx aju qʼuqbʼil qkʼuʼj tiʼj jun tbʼanel ambʼil tzul, in nonin qiʼj tuʼn qex kywitz nim nya bʼaʼn in che tzaj toj ambʼil jaʼlo. Ex aju qʼuqbʼil qkʼuʼj in tzaj tqʼoʼn Biblia, jaku tzʼonin qiʼj tuʼn tten qximbʼetz toj tumel, tuʼn tkubʼ qnaʼn bʼaʼn ex axpe ikx, tuʼn miʼn ttzaj yabʼil tiʼj qxmilal (1 Tesalonicenses 5:8).