Tzul nim nya bʼaʼn toj 2024 ex nim xjal in kubʼ kyximen qa kukx ktzajel nya b’a’n. Pero jaku tzʼok qeʼ qkʼuʼj tiʼj qa jaku qo ten bʼaʼn. ¿Alkye tten ex tiʼ jaku bʼant quʼn tuʼn tbʼaj jlu?

 In tzaj ttziyen Biblia qa kʼelel tiʼn Qman Dios tkyaqil nya bʼaʼn aqeju mintiʼ in che onin tuʼn tten jun qʼuqbʼil qkʼuʼj toj ambʼil tzul. In tzaj tqʼamaʼn Biblia alkye tten kbʼantel jlu tuʼn Qman Dios aj ttzaj tqʼamaʼn jlu: «Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apocalipsis 21:4).

•   Qa tajbʼila tuʼn tel chʼintl tnikʼa tiʼjju in tzaj ttziyen Tyol Dios, jaku txi tjyoʼna xnaqʼtzbʼil «¿Atpe jun tbʼanel ambʼil tzul?».

 Aju in tzaj tqʼamaʼn Biblia tiʼj ambʼil tzul, jaku tzʼonin tiʼja tuʼn tkubʼ tyoʼna tuʼn tul jun tbʼanel ambʼil ex tuʼn ttzalaja (Romanos 15:13). Nya oʼkxju, ax ikx, ateʼ tbʼanel consej toj Tyol Dios aqeju jaku che onin tiʼja qa in nok weʼya twitz jun nya bʼaʼn, ik tzeʼn mebʼayil moqa prowil, ik tzeʼn qa in nok bʼinchaʼn jun ya bʼaʼn tiʼja ex ik tzeʼn qa tok jun yabʼil tiʼja.

•   Bʼaʼn tuʼn tel tnikʼa tiʼj alkye tten onin aju in tzaj tqʼamaʼn Biblia tiʼj jun xjal tuʼn ttzalaj ex tuʼn tkubʼ tnaʼn bʼaʼn maske jaw chʼiy toj jun familia mebʼa. Qʼonka twitza tiʼja video Juan Pablo Zermeño: O tzʼonin Jehová wiʼje tuʼn tten ttxolil wanqʼibʼile.

•   Bʼaʼn tuʼn tel tnikʼa tiʼj alkye tten jaku tzʼonin Biblia tiʼja qa o kyim jun toj tjaya ex qa in kubʼ tnaʼna bʼis moqa in kubʼ tnaʼna qa aya at tpaj ex qa in tzaj bʼaj tkʼuʼja tuʼn. Jaku txi tjyoʼna xnaqʼtzbʼil «¿Jakupe kanet qʼuqbʼil nkʼuʼje toj Biblia?».

•   Bʼaʼn tuʼn tel tnikʼa tiʼj jun xuʼj ma bʼet ambʼil ten kyxol soldad ex tqʼama qa «mintiʼxtoq chʼin lastmi tukʼil». Pero kanet jun qʼuqbʼil tkʼuʼj toj Tyol Dios. Jaku tzʼok tqʼoʼna twitza tiʼj video Cambié las armas por la Biblia.

 ¿Taja tuʼn ttena bʼaʼn kyukʼil toj tjaya toj 2024? Jaku tzʼonin Biblia tiʼja tuʼn tbʼaj jlu. Jaku xnaqʼtzana noq kukx tiʼj Tyol Dios ex jaku tzʼel tnikʼa tiʼj tzeʼn jaku tzʼonin Dios tiʼja tuʼn tkubʼ tnaʼna bʼaʼn ex alkye tten jaku ten jun qʼuqbʼil tkʼuʼja tuʼn (Jeremías 29:11).