¿Tiʼ jaku bʼant quʼn qa noq minabʼen saj jun yabʼil qiʼj?
¿Ope tzaj jun yabʼil tiʼja noq minabʼen? Qa ikju, in nel tnikʼa tiʼj qa jaku qo sikt tuʼn jun yabʼil ik tzeʼn jlu ex jaku qo gastarin nim pwaq tuʼn. ¿Tiʼ jaku tzʼonin tiʼja? ¿Tzeʼn jaku tzʼonina tiʼj jun toj tjaya moqa tiʼj jun tamiwa aju o tzaj jun yabʼil tiʼj? Maske nya jun libro te qʼanbʼil aju Biblia, pero aʼyeju nabʼil ateʼkux toj jaku che onin qiʼj tuʼn qex twitz alkyexku yabʼil.
Junjun nabʼil aj ttzaj jun yabʼil qiʼj
Bʼaʼn tuʼn t-xiʼya tukʼil jun doctor.
¿Tiʼ in tzaj tqʼamaʼn Tyol Dios? «Qe xjal mya yabʼ, mya il tiʼj jun qʼanal kye, noq oʼkx qe xjal yabʼ» (Mateo 9:12).
¿Tiʼ t-xilen? Bʼaʼn tuʼn t-xiʼya qʼanil tibʼa tukʼil jun doctor qa il tiʼj.
¿Yajtzun qa ma bʼant jlu tuʼna? Bʼaʼn tuʼn t-xiʼya tukʼil jun doctor mas tbʼanel. At maj mas bʼaʼn tuʼn txi qanit mas tqanil tiʼj yabʼil te juntl doctor (Proverbios 14:15). Qʼamanxa kye doctor tiʼxix in kubʼ tnaʼna. Ex qʼonka tilil tuʼn tel tnikʼa tiʼjju in tzaj kyqʼamaʼn (Proverbios 15:22). Jyonxa tqanil tiʼjju yabʼil tok tiʼja ex alkye qe qʼanbʼil jaku tzʼonin tiʼja. Qa ma tzʼel tnikʼa tiʼ in tzaj tuʼn yabʼil tok tiʼja, mas jaku tzʼel tnikʼa tiʼj tiʼ jaku bʼant tuʼna tuʼn texa twitz.
Qʼonka tilil tuʼn tten jun tbʼanel tanqʼibʼila.
¿Tiʼ in tzaj tqʼamaʼn Tyol Dios? «Aju tuʼn tnuqpaj qximlal, […] at tajbʼen» (1 Timoteo 4:8).
¿Tiʼ t-xilen? Qʼonka tilil tuʼn tten jun tbʼanel tanqʼibʼila, ik tzeʼn tuʼn tbʼinchana ejercicio.
¿Yajtzun qa ma bʼant jlu tuʼna? Qʼonka tilil tuʼn tbʼinchana ejercicio, ax ikx tbʼanel qa ma waʼna ex qa ma tzʼojlana toj tumel. In tzaj kyqʼamaʼn doctor qa tbʼanel tuʼn tok tilil kyuʼn xjal at yabʼil kyiʼj tuʼn kyanqʼin toj tumel maske tzma in nel kynikʼ tiʼj yabʼil tok kyiʼj. Noqtzun tuʼnj, bʼaʼn tuʼn t-xi tbʼiʼna qa mlay tzaj jun nya bʼaʼn tiʼja tuʼn tkyaqilju kbʼantel tuʼna.
Qaninxa onbʼil kye tamiwa.
¿Tiʼ in tzaj tqʼamaʼn Tyol Dios? «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17).
¿Tiʼ t-xilen? Jaku che onin tamiwa tiʼja kyoj ambʼil kwest.
¿Yajtzun qa ma bʼant jlu tuʼna? Qʼamanxa aju in kubʼ tnaʼna te jun tamiwoya aju in nok qeʼ tkʼuʼja tiʼj. Kʼonil jlu tiʼja tuʼn miʼn ttzaj bʼajxix tkʼuʼja ex tuʼn tkubʼ tnaʼna bʼaʼn. At maj kyaj qe toj qja ex qe qamiw tuʼn kyonin qiʼj, pero at maj mintiʼ in nel kynikʼ tiʼj tzeʼn tuʼn tbʼant kyuʼn. Tuʼntzunju, tbʼanel tuʼn t-xi tqʼamaʼna kye tiʼxix jaku bʼant kyuʼn. Ximana kyiʼj tiʼ jaku bʼant kyuʼn ex qʼonxa chjonte kye tiʼj tkyaqil onbʼil ktzajel kyqʼoʼn. Noqtzun tuʼnj, maske kyaj tamiwoya tuʼn kyonin tiʼja, atlo maj jaku kubʼ tnaʼna siktleʼn. Tuʼntzunju, atlo maj il tiʼj tuʼn t-xi tqʼamaʼna kye jniʼ ambʼil ex toj alkye qʼij jaku che pon onil teya moqa visitaril teya.
Tenx t-xima toj tumel.
¿Tiʼ in tzaj tqʼamaʼn Tyol Dios? «Qa at tzalajbʼil tuj tanmi xjal, a jlu mer ik tzaʼn jun qʼanbʼil te te, qatzun in bʼisun, in bʼaj tipun t-ximlal tuʼn» (Proverbios 17:22).
¿Tiʼ t-xilen? Qa ma tzalaja ex qa ma ten t-xima toj tumel, kʼonil tiʼja tuʼn miʼn ttzaj bʼajxix tkʼuʼja tuʼn yabʼil ex tuʼn texa twitz.
¿Yajtzun qa ma bʼant jlu tuʼna? Akux in naqʼeta tiʼjju in nikʼ tiʼja, qʼonk twiʼya tiʼjju jaku bʼant tuʼna ex nya tiʼjju mlay bʼant. Miʼn kubʼ tmojbʼaʼna aju in bʼaj tiʼja tukʼilju in bʼaj kyiʼj txqantl nix aju in bʼaj tiʼja jaʼlo tukʼilju tanqʼibʼila ten tej naʼmxtoq ttzaj yabʼil tiʼja (Gálatas 6:4). Bʼaʼn tuʼn tkubʼ tbʼinchaʼna junjun tiʼ aju jaku bʼant tuʼna, tuʼntzun tten t-xima toj tumel (Proverbios 24:10). Qa jaku bʼant, tzʼonina kyiʼj txqantl. Bʼaʼn tuʼn ttzaj tnaʼna qa mas ktzalajela qa at chʼin ma txi tqʼoʼna kye txqantl ex a jlu jaku tzʼonin tiʼja tuʼn tikʼ tnaʼl jun rat tyabʼa (Hechos 20:35).
Jaku tzʼonin Dios tiʼja aj ttzaj tyabʼa
In tzaj tyekʼin Biblia qa jaku tzʼonin Qman Jehová tiʼj jun xjal yabʼ. a Ax tok mlay bʼant jun milagr tuʼn Dios, pero in nonin Dios kyiʼj tmajen toj junjuntl tumel.
In tzaj tqʼuqbʼaʼn kykʼuʼj. In tzaj tziyen jlu toj Biblia: «Kqebʼil kykʼuʼje tuʼn Dios; mas maʼ t-xilen jlu twitz tkyaqil […] kyximbʼetze» (Filipenses 4:6, 7). Aju qʼuqbʼil qkʼuʼj lu jaku tzʼonin qiʼj tuʼn miʼn ttzaj bʼajxix qkʼuʼj. In xi tqʼoʼn Dios qʼuqbʼil kykʼuʼj qeju in che naʼn Dios te ex in xi kyqʼamaʼn te aju in bʼaj kykʼuʼj tiʼj (1 Pedro 5:7).
In tzaj tqʼoʼn kynabʼil. Jaku tzaj tqʼoʼn Jehová qnabʼil tuʼn tel qnikʼ tiʼj alkye mas bʼaʼn (Santiago 1:5). Aj tel qnikʼ tiʼj Biblia ex aj tkubʼ qanqʼiʼn qe consej in che jatz toj, in ten qnabʼil.
In tzaj ttziyen jun tbʼanel ambʼil kye. In tzaj tqʼamaʼn Jehová qa tzul tiʼn jun ambʼil atz jatumel «mi jun xjal najl tuj tnam ok tmaʼ kyjaʼ: Yabʼ qine, chiwt» (Isaías 33:24). O tzʼonin jlu kyiʼj nimku xjal tuʼn tten kyxim toj tumel, axpe ikx qa aju yabʼil tok kyiʼj mintiʼ qʼanbʼil te (Jeremías 29:11, 12).
a In tzaj tqʼamaʼn Biblia qa Jehová tbʼi Dios (Salmo 83:18; TNM).