¿Chʼixpe tul fin del mundo? ¿Tiʼ t-xilen yol apocalipsis?
¿Tiʼ in kubʼ t-ximana aj tok tbʼiʼna yol apocalipsis? Bʼalo in kubʼ t-ximana qa in yolin tiʼj jun xitbʼil jatumel knajel tkyaqil Txʼotxʼ tuʼn. Nim xjal in kubʼ kyximen qa a jlu kbʼajel ex mas qa in nok kybʼiʼn noticia ik tzeʼn jlu.
«Ax tok, jakulo tzaj jun nimaq qʼoj nuclear, jaku bʼaj jlu aj tkubʼ kyximen xjal moqa noq minabʼen» (Boletín de Científicos Atómicos).
«Kyoj qe mankbʼil 10 abʼqʼi o che ikʼ, o tzaj mas xitbʼil twitz Txʼotxʼ, ik tzeʼn aj t-xiʼ qʼaqʼ kyoj kʼul, mintiʼxix in tzaj nim jbʼal, at nim kyaq, in jaw chʼiy aʼ ex in nok kycolor coral ateʼ toj aʼ te saq» (National Geographic).
«Toj ambʼil jaʼlo, mas nim nya bʼaʼn o tzaj kyuʼn langosta toj tnam África» (The Associated Press).
¿Kbʼelpe xiten Txʼotxʼ tuʼn jun apocalipsis? ¿Tiʼ in tzaj tqʼamaʼn Biblia?
¿Chʼixpe tkubʼ xiten Txʼotxʼ?
Miʼn. In tzaj tqʼamaʼn Tyol Dios qa kukx ktel Txʼotxʼ te jumajx (Eclesiastés 1:4). Mlay kubʼ tnajsaʼn Dios Txʼotxʼ, sino kbʼel tnajsaʼn «qeju ma naj twitz txʼotxʼ kyuʼn» (Apocalipsis 11:18).
¿Chʼixpe tul fin del mundo?
Aj tyolin Biblia tiʼj fin del mundo, atz in yolin kyiʼj xjal che kbʼel najsaʼn tuʼnju mintiʼ in che nimen te Dios ex oʼkx in kubʼ kybʼinchaʼn kyex kyajbʼil. Ik tzeʼn bʼant tuʼn Dios toj tqʼijlalil Noé, ax ikx kbʼel tnajsaʼn toj chʼintl ambʼil «kykyaqil xjal mya nimal» te (2 Pedro 2:5; 3:7).
In tzaj tqʼamaʼn 1 Juan 2:17 qa «kbʼajel ju twitz txʼotxʼ tukʼix ju kyajbʼil xjal mya bʼaʼn». In tzaj tyekʼin texto lu qa mlay kubʼ tnajsaʼn Dios Txʼotxʼ, sino aʼyeju xjal in che ximen tuʼn kybʼinchante nya bʼaʼn.
¿Toj alkye ambʼil tzul xitbʼil?
Mintiʼ in tzaj tqʼamaʼn Tyol Dios toj alkye ambʼil tzul xitbʼil (Mateo 24:36). Oʼkx in tzaj tqʼamaʼn qa chʼinx tul. ¿Tzeʼn ojtzqiʼn jlu quʼn? Tuʼnju kyaj qʼamaʼn toj Biblia qa tuʼn kybʼaj junjun tiʼchaq ik tzeʼn jlu:
Tuʼn tten qʼoj, waʼyij, txʼuʼj yabʼil ex «noq jachaq tzul» kyajnabʼ (Mateo 24:3, 7, 14; Lucas 21:10, 11; Apocalipsis 6:1-8).
Oʼkx che ximel xjal kyiʼjx. Jun techel, «oʼkx tok kykʼuʼj tiʼj pwaq», mibʼan che qʼon chjonte ex mintiʼ in kyjakʼun kyibʼ (2 Timoteo 3:1-5).
Nim xjal in nok qeʼ kykʼuʼj tiʼj qa atxix toj 1914 in japun aju in tzaj tqʼamaʼn Tyol Dios tuʼn tbʼaj toj ambʼil jaʼlo. Tuʼn jlu in kubʼ kyximen qa chʼinx tul xitbʼil. Qa taja mas tqanil, jaku jaw tuʼjina qe xnaqʼtzbʼil «¿Qué indica la cronología bíblica sobre el año 1914?» ex «¿Cuál es la señal de ‹los últimos días› o de ‹los tiempos finales›?».
¿Tiʼ t-xilen yol apocalipsis toj Biblia?
Aj tajbʼen yol «apocalipsis» toj yol griego, a t-xilen «tuʼn tel qʼiʼn jun tmaqsil» moqa «tuʼn tel qʼiʼn tvelo». Ax ikx in yolin tiʼj jun tqanil naʼmxtoq tel nikʼbʼaj tiʼj. Ex in yolin tiʼj tqanil tzaj qʼamaʼn tiʼj Jesús, jatumel kʼelel nikʼbʼaj tiʼj qa at tipumal tuʼn tel tiʼn tkyaqil nya bʼaʼn twitz Txʼotxʼ ex qa ktzajel tkʼiwlaʼn qeju in che nimen te Jehová (2 Tesalonicenses 1:6, 7; 1 Pedro 1:7, 13).
Aju mankbʼil uʼj tkuʼx toj Biblia, in nok tbʼi te Apokálypsis moqa Revelación, tuʼnju in tzaj tqʼamaʼn qe tiʼchaq che kbʼajel toj ambʼil tzul (Apocalipsis 1:1). Ax ikx, toj uʼj lu ateʼ tbʼanel tqanil ex qʼuqbʼil qkʼuʼj (Apocalipsis 1:3). In tzaj tyekʼin qa kbʼel tnajsaʼn Dios tkyaqil nya bʼaʼn ex qa kʼokel Txʼotxʼ te jun paraíso tuʼn. Aj tbʼaj jlu, ya mlay kubʼ kynaʼn xjal kʼixkʼoj ex ya mlay che ikʼ toj nya bʼaʼn... Axpe ikx ya mlay tentl kamik (Apocalipsis 21:3, 4).
¿Tajpe teya tuʼn tel mas tnikʼa tiʼjju in tzaj ttziyen Dios qe toj Biblia? In xi kyqʼoʼn testigo de Jehová xnaqʼtzbʼil tiʼj Tyol Dios noq kukx. Tbʼanel qa ma yolina kyukʼil ex qaninxa jun t-xnaqʼtzbʼila kye.