Qa kukx in tzaj bʼaj qkʼuʼj, jaku tzaj jun yabʼil tiʼj qxmilal ex tiʼjju in kubʼ qnaʼn. Axpe ikx jaku tzaj mas nya bʼaʼn qiʼj twitzju otoq tzaj.

•  Noq chʼin ambʼil paʼmila tuʼn tok tbʼiʼna, tuʼn tjaw tuʼjina ex tuʼn tok tqʼoʼn twitza kyiʼj noticia. Nya il tiʼj tuʼn tok qbʼiʼn tkyaqil tqanil tiʼj jun tiʼ in bʼaj. Mas jaku tzaj bʼaj qkʼuʼj ex jaku qo tzaj xobʼ qa ma tzʼok qqʼoʼn nim ambʼil kyiʼj noticia.

   Taqikʼ Tyol Dios nim toklen: «Qa […] in bʼisun [jun xjal], in bʼaj tipun t-ximlal tuʼn» (Proverbios 17:22).

   «Nya kwest tuʼn qnaqʼet tiʼj tuʼn tok qbʼiʼn aju mas nim toklen ex aju mas akʼaj noticia. Pero nya bʼaʼn jlu. Ya mintiʼxix in tzaj bʼaj nkʼuʼje qa mintiʼ in nok nqʼoʼn nwitze kyiʼj nim noticia» (John).

   Ximana tiʼj lu: ¿Ilxixpe tiʼj tuʼn tok tqʼoʼn twitza kyiʼj akʼaj noticia?

•  Ximana tiʼj jniʼ ambʼil kʼokel tqʼoʼna kyiʼj junjun tiʼchaq. Qʼonka tilil tuʼn tjaw weʼya, tuʼn twaʼna, tuʼn kybʼant junjun aqʼuntl tuʼna tjaya ex tuʼn txiʼya jtal toj ax or tkyaqil qʼij. Qa ma bʼant jlu tuʼna kʼonil tiʼja ex mlay tzaj bʼajxix tkʼuʼja.

   Taqikʼ Tyol Dios nim toklen: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te» (Proverbios 21:5).

   «Tej ttzaj tzyet COVID-19, kyaj ntzaqpiʼne tkyaqil tiʼchaq in bʼant wuʼne, ex ajbʼen ambʼil wuʼne tuʼn tkubʼ nbʼinchaʼne qe tiʼchaq mintiʼ tzaj kyiʼn tbʼanel weye. Tuʼnju wajtoqe tuʼn tajbʼen ambʼil wuʼne toj tumel kubʼ nximane tuʼn tkubʼ ntzʼibʼine alkye or tuʼn t-xi nbʼinchaʼne kykyaqil tiʼchaq junjun qʼij» (Joseph).

   Ximana tiʼj lu: ¿Tzʼibʼinpe jun tajlal or tuʼna? Aj tkubʼaj qʼij, ¿in kubʼpe t-ximana qa in nonin tajlal or lu tiʼja tuʼn tkubʼ tnaʼna qa ma bʼant jun tbʼanel aqʼuntl tuʼna?

•  Tenx t-ximbʼetza toj tumel. Qa oʼkx ma ximana kyiʼj tiʼchaq tajtoqa tuʼn tbʼant tuʼna toj junxitl tten moqa kyiʼj tiʼchaq nya bʼaʼn jaku che bʼaj toj ambʼil tzul, mas jaku tzaj bʼaj tkʼuʼja kyuʼn. Mas bʼaʼn tuʼn tok tilil tuʼna tuʼn ttzaj tnaʼna kabʼe moqa oxe tiʼ in tzalaja kyiʼj.

   Taqikʼ Tyol Dios nim toklen: «Kyqʼonxe chjonte te Dios» (Colosenses 3:15).

   «Aj wuʼjine tiʼj Tyol Dios, in nok tilil wuʼne tuʼn miʼn nximane kyiʼj nya bʼaʼn tqanil ex in chin ximane kyiʼj tbʼanel tiʼchaq. Bʼalo nya nim toklen jlu, pero in nonin wiʼje» (Lisa).

   Ximana tiʼj lu: ¿Kukxpe in ximana kyiʼj tiʼchaq nya bʼaʼn in bʼaj tiʼja ex mintiʼ in tzaj tnaʼna qe tbʼanel tiʼchaq in che ikʼ toj tanqʼibʼila?

•  Ximana kyiʼj txqantl. Tbʼanel qa mintiʼ ma tzʼel qpaʼn qibʼ kyiʼj txqantl, tuʼnju at maj in kubʼ qximin qa atzun jlu mas bʼaʼn tuʼn tbʼant quʼn aj ttzaj bʼaj qkʼuʼj twitz jun tiʼ, pero mas bʼaʼn tuʼn qximen tzeʼn jaku qo onin kyiʼj txqantl.

   Taqikʼ Tyol Dios nim toklen: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:4).

   «Aj tonina kyiʼj txqantl jaku tzalaja. Ax ikx, jaku che tzalaj txqantl tuʼna ex toj ax ambʼil ya mintiʼ in tzaj bʼaj tkʼuʼja kyiʼj tiʼchaq in nok weʼya twitz. Ya mintiʼ ambʼil tuʼn ttzaj bʼaj tkʼuʼja» (María).

   Ximana tiʼj lu: Kyxol xjal ojtzqiʼn tuʼna ¿Atpe jun taj tuʼn tonina tiʼj? ¿Tiʼ onbʼil jaku txi tqʼoʼna te xjal lu?

•  Bʼaʼn tuʼn tok t-xqʼuqina t-xmilala. Bʼinchama ejercicio ex bʼaʼn tuʼn tojlana. Tbʼanel qa ma txi twaʼna tbʼanel wabʼj. Qa ma tzʼok t-xqʼuqin tibʼa jaku ten jun tbʼanel t-ximbʼetza tiʼj tanqʼibʼila ex jaku tzʼonin tiʼja tuʼn miʼn ttzaj bʼajxix tkʼuʼja.

   Taqikʼ Tyol Dios nim toklen: «Aju tuʼn tnuqpaj qximlal, [at] tajbʼen» (1 Timoteo 4:8).

   «Mintiʼ in qo exe bʼinchal ejercicio tukʼil wale ik tzeʼn qaje, pero o kubʼ qtzʼibʼine jniʼ or jaku bʼant quʼne ax qjaye. O tzʼonin jlu qiʼje tuʼn tkubʼ qnaʼne bʼaʼn ex tuʼn tten tbʼanel qxole tukʼil wale» (Catherine).

   Ximana tiʼj lu: ¿Ilpe tiʼj tuʼn t-xi twaʼna tbʼanel wabʼj ex tuʼn tbʼinchana ejercicio tuʼntzun tten t-xmilala toj bʼaʼn?

 O che onin qe nabʼil lu kyiʼj nim xjal tuʼn miʼn ttzaj bʼajxix kykʼuʼj kyiʼj tiʼchaq. ¿Ex tiʼ mas o tzʼonin kyiʼj? Aju tej tel kynikʼ tiʼjju in tzaj ttziyen Tyol Dios tiʼj tbʼanel ambʼil tzul ex tej tel kynikʼ kyiʼj tziybʼil jaku tzʼok qe qkʼuʼj kyiʼj. Bʼaʼn tuʼn tjaw tuʼjina xnaqʼtzbʼil lu: «¿Tiʼ kbʼantel tuʼn Tkawbʼil Dios?».