Kyoj junjuntl seman, kʼokel votación kyuʼn xjal kyoj junjun tnam tuʼn tjaw kyjyoʼn jun akʼaj gobierno. Tuʼntzunju, nim toklen tuʼn tkubʼ kyximen alkye kkawil kyibʼaj.

 ¿Tiʼ in tzaj tqʼamaʼn Tyol Dios tiʼj jlu?

 In tzaj tqʼamaʼn Tyol Dios qa mlay bʼant jun tiʼ kyuʼn xjal in che kawin.

•   «Miʼn tzʼok qeʼ kykʼuʼje kyiʼj qe xjal maʼ kyoklen, ex ax xjal qe, ex mintiʼ kolbʼil kyukʼil, ok kykyim ok che okel te quq juntl maj, ex axtzun qʼij lu kbʼajel aju otoq kubʼ kyximan tuʼn tbʼant» (Salmo 146:3, 4).

 Kykyaqil xjal in che kawin kpol jun qʼij ok che kyimel maske at nim kynabʼil ex kyojtzqibʼil. Maske ma bʼant jun tbʼanel aqʼuntl kyuʼn, mintiʼ ojtzqiʼn kyuʼn qa ax jlu kbʼantel kyuʼn qeju che kawil te kyxel (Eclesiastés 2:18, 19).

 Ex in tzaj tqʼamaʼn Tyol Dios qa mintiʼ e kubʼ bʼinchaʼn xjal tuʼn kykawin kyibʼaj txqantl.

•   «Mya ax te xjal tajaw tchwinqlal, ex mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (Jeremías 10:23).

 ¿Atpe jun xjal toj ambʼil jaʼlo jaku tzʼok te jun tbʼanel aj kawil?

 In tzaj tqʼamaʼn Biblia qa o jaw tskʼoʼn Dios jun aj kawil at nim tnabʼil ex tojtzqibʼil. ¿Alkyetzun? A Jesús (Salmo 2:6). In kawin Jesús toj Tkawbʼil Dios, jun gobierno at toj kyaʼj (Mateo 6:10).

 ¿Kjawil tjyoʼn teya Jesús tuʼn tkawin tibʼaja? In tzaj tqʼamaʼn Tyol Dios tiquʼn nim toklen tuʼn tbʼant jlu tuʼna.

•   «Che mokʼekuye twitz [Jesús] tukʼil tchiylal, porke mya yajku tzaj tqʼoj ex jaku che bʼaj kyime tuʼn ax tuj bʼe, porke jurat naj in tzaj tqʼoj. At tzalajbʼil kye qeju nnoʼk qeʼ kykʼuʼj tiʼj tuʼn kyklet» (Salmo 2:12).

 Atzun ambʼil lu tuʼn tkubʼ t-ximana tiʼ kbʼantel tuʼna. In tzaj qʼamaʼn kyoj profecía qa xi tzyet tuʼn tkawin Jesús toj 1914 ex qa kʼelel tiʼn Tkawbʼil Dios tkyaqil kykawbʼil xjal (Daniel 2:44).

 Qa taja tuʼn tel tnikʼa tiʼj tzeʼn jaku tzʼonina tiʼj tkawbʼil Jesús, bʼaʼn tuʼn tjaw tuʼjina xnaqʼtzbʼil «Qo onin tiʼj Tkawbʼil Dios toj ambʼil jaʼlo».