Tkyaqil abʼqʼi in che kyim xjal tuʼn droga moqa tuʼn junjuntl qʼanbʼil in najbʼen kyuʼn. Ex mas o tzaj nya bʼaʼn kyiʼj xjal lu atxix tej ttzaj COVID-19. At nim xjal o kyaj kytzaqpiʼn droga kyuʼn qe consej in tzaj tqʼoʼn Tyol Dios. ¿In nokpe tilil tuʼna tuʼn texa twitz nya bʼaʼn lu? Qa ikju, jaku che onin consej lu tiʼja. a

Tzalu kʼelel qnikʼ kyiʼj xnaqʼtzbʼil lu:

•  ¿Tiquʼn bʼaʼn tuʼn tjyona onbʼil toj Biblia tuʼntzun tkubʼ tiʼj jun nya bʼaʼn tuʼna?

•  Kyaje consej in tzaj tqʼoʼn Tyol Dios tuʼn tkubʼ tiʼj jun nya bʼaʼn quʼn

•  Junjun versículo toj Tyol Dios jaku che onin tiʼja tuʼn tkubʼ tiʼj jun nya bʼaʼn

•  Junjuntl experiencia: Onin Tyol Dios kyiʼj tuʼn tkubʼ tiʼj nya bʼaʼn kyuʼn

•  ¿In tzajpe tqʼoʼn Tyol Dios ambʼil tuʼn tajbʼen jun tratamiento quʼn kyiʼj junjun vicio?

•  ¿In tzajpe tqʼoʼn Tyol Dios ambʼil tuʼn tajbʼen droga quʼn te qʼanbʼil?

 O tzʼel kynikʼ junjun xjal tiʼj qa in che naqʼet xjal kyiʼj junjun vicio tuʼnju in kubʼ kynaʼn qa kyjunalx ateʼ, in che sikt, in bʼaj kykʼuʼj ex at depresión kyiʼj. Jaku tzʼonin Tyol Dios tiʼja tuʼn tten tipumala aj tok weʼya kywitz nya bʼaʼn ex tuʼn miʼn tnaqʼeta tiʼj jun vicio. Ax ikx jaku tzʼonin tiʼja tuʼn toka te tamiw Dios (Salmo 25:14). Jaku tzʼonin Biblia tiʼja tuʼn texa twitz alkyexku tiʼ maske kwest tuʼn t-xi tokslaʼna (Marcos 11:22-24).

1.  1. Bʼaʼn tuʼn tok tojtzqiʼna Jehová (Juan 17:3). b A Bʼinchal tkyaqil ex at nimxix tipumal. Pero nya oʼkx jlu, sino ax ikx in nok te jun tbʼanel mambʼaj. Taj tuʼn tok te tamiwa, ex at tipumal tuʼn tonin tiʼja (Isaías 40:29-31; Santiago 4:8). Qa taja tuʼn tok kʼujlaʼna tuʼn Dios, in tzaj ttziyen qa tzul tqʼoʼn jun tbʼanel tanqʼibʼila toj ambʼil tzul (Jeremías 29:11; Juan 3:16).

2.  2. Qaninxa onbʼil te Jehová. Bʼaʼn tuʼn tnaʼna Dios ex tuʼn t-xi tqanina onbʼil te tuʼn tkubʼ tiʼj vicio tuʼna, tuʼntzun toka te xjan moqa te saq ex tuʼn ttzalaj Dios tiʼja (Romanos 12:1). Kʼonil tiʼja tukʼil xewbʼaj xjan ex tzul tqʼoʼn tipumala tuʼnju in tzaj tqʼamaʼn Tyol Dios jlu: «Ate Dios in tzaj qʼonte nimxix qipumal, mya quʼnxqe» (2 Corintios 4:7; Lucas 11:13). Kʼonil xewbʼaj tiʼja tuʼn tkyaj ttzaqpiʼna qe drogra ex chebʼe chebʼe jaku tzʼoka te akʼaj tuʼntzun ttzalaj Dios tiʼja (Colosenses 3:9, 10).

3.  3. Qʼonkxa qe t-ximbʼetz Dios toj twiʼya (Isaías 55:9). Kʼonil Dios tiʼja tuʼn tbʼaj tchʼexpuʼna t-ximbʼetza; ex tuʼn tkyaj ttzaqpiʼna qe vicio (Efesios 4:23). Atz tkuʼx qe t-ximbʼetz Dios toj Biblia, tuʼntzunju tbʼanel tuʼn tuʼjina tiʼj tkyaqil qʼij (Salmo 1:1-3). Ateʼ junjun mas in nel kynikʼ tiʼj Tyol Dios qa at jun in xi qʼonte xnaqʼtzbʼil kye (Hechos 8:30, 31). In xi kyqʼoʼn testigo de Jehová xnaqʼtzbʼil tiʼj Tyol Dios. Ax ikx in qo txokine tiʼja tuʼn tpona kyoj qchmabʼile, jatumel in qo xnaqʼtzane tiʼj Tyol Dios ex in nel qnikʼe tiʼj tzeʼn jaku txi qbʼiʼne aju in tzaj tqʼamaʼn.

4.  4. Jyoma qe tamiwa jaku che onin tiʼja. Qa in nok tilil tuʼna tuʼn tkubʼ tiʼj jun vicio, ax ikx bʼaʼn tuʼn t-ximana tiʼj alkyeqe tamiwa at (Proverbios 13:20). Qa ma tzʼok qjunin qibʼ kyukʼil qe xjal in che ajbʼen te Dios, jaku che kanet tbʼanel qamiw. Taj Dios tuʼn kyten qamiw ik tzeʼn jlu, tuʼnju ojtzqiʼn tuʼn qa jaku che onin qiʼj (Salmo 119:63; Romanos 1:12). Ax ikx, bʼaʼn tuʼn tok t-xqʼuqina alkyeqe tiʼchaq in nok tkeʼyina, in nok tbʼiʼna ex in jaw tuʼjina tuʼnju jaku txi tbʼinchaʼna aju in bʼant kyuʼn. Toj juntl yol, paʼmil tibʼa kyiʼj tiʼchaq mintiʼ in nonin tiʼja (Salmo 101:3; Amós 5:14).

 Filipenses 4:13, TNM: «Tkyaqil tiʼchaq in nikʼx wuʼne noq tuʼn wipumale in tzaj tqʼoʼn aju qʼolte ipumalj».

 «Ojtzqiʼntoq wuʼne qa mlaytoq chin exe twitz njunalxe, mlaytoq ten wipumale tuʼn tkyaj ntzaqpiʼne qe droga. Tuʼntzunju, xi nqanine onbʼil te Dios ex tzaj tqʼoʼn wipumale» (Patrizia, te Italia).

 Joseph Ehrenbogen. Ok tkeʼyin nim bʼiybʼel ex kʼan tiʼj nim qʼeʼn, ajbʼen tabaco, marihuana ex heroína tuʼn. Chʼixmi kyim nim maj tuʼn nim vicio, pero tej jaw tuʼjin jun xnaqʼtzbʼil toj Tyol Dios onin tiʼj tuʼn tkyaj ttzaqpiʼn qe vicio. Jaku jaw tuʼjina aju ikʼ toj tanqʼibʼil toj xnaqʼtzbʼil tok tbʼi: «O tzʼok nqʼoʼne kyoklen xuʼj ex toklen nchwinqlale».

 Dimitri Kórshunov. Ok tilil tuʼn tuʼn tkyaj ttzaqpiʼn tuʼn tkʼan tiʼj qʼeʼn. Tuʼn tel tnikʼa tiʼj tiʼ onin tiʼj tuʼn tkyaj ttzaqpiʼn vicio, qʼonka twitza tiʼj video «El wikʼune aju wanqʼibʼile qʼiʼntoq».

 In tzaj tqʼoʼn. In tzaj tqʼamaʼn Tyol Dios jlu: «Qe xjal mya yabʼ, mya il tiʼj jun qʼanal kye, noq oʼkx qe xjal yabʼ» (Mateo 9:12). In tzaj tqʼamaʼn Instituto Nacional sobre el Abuso de Drogas te Estados Unidos jlu: «In nok vicio te droga te jun yabʼil ex kwest tuʼn tkyaj. Tuʼntzunju, at maj nya oʼkx tuʼn tok tilil tuʼn xjal tuʼn tkyaj ttzaqpiʼn». Mas at tipumal Dios twitzju tipumal jun xjal aj tok tilil tuʼn tuʼn tkyaj ttzaqpiʼn jun vicio. Pero at maj il tiʼj tuʼn tajbʼen jun tratamiento kyuʼn. Ateʼ junjun xjal o kubʼ tiʼj jun vicio kyuʼn tuʼnju o tzʼonin Tyol Dios kyiʼj, pero nya oʼkx jlu bʼant kyuʼn, sino ax ikx ajbʼen jun tratamiento tzaj tqʼoʼn jun doctor kye. c Jun techel, tej tikʼ Allen toj lu in tzaj tnaʼn jlu: «Tej tok tilil wuʼne tuʼn tkyaj ntzaqpiʼne tuʼn nkʼane qʼeʼn, tzaj choʼn nxmilale ex kubʼ nnaʼne nim kʼixkʼoj. Toj ambʼil aju el nnikʼe tiʼj qa nya oʼkx jaku tzʼonin Tyol Dios wiʼje sino ax ikx iltoq tiʼj tuʼn t-xi nkʼaʼne jun qʼanbʼil».

 In tzaj tqʼoʼn. Axpe ikx in tzaj tqʼamaʼn Biblia tuʼn tajbʼen qʼeʼn tuʼn tok qʼanet junjun yabʼil moqa tuʼn t-xi onit jun xjal tuʼn tikʼx kʼixkʼoj tuʼn ya chʼixtoq tkyim (Proverbios 31:6; 1 Timoteo 5:23). Noqtzun tuʼnj, bʼaʼn tuʼn ttzaj qnaʼn qa ateʼ junjun qʼanbʼil ik tzeʼn qʼeʼn jaku che ok te jun vicio. Tuʼntzunju, il tiʼj tuʼn qjyon tqanil tiʼj tiʼ nya bʼaʼn jaku tzaj qiʼj ex tuʼn tok qxqʼuqin qibʼ aj kyajbʼen junjun qʼanbʼil quʼn (Proverbios 22:3).