¿Tiʼ in tzaj tqʼamaʼn Biblia tiʼj weʼyaj toj ambʼil jaʼlo?
«Ya miʼn tentl weʼyaj». Atzun jlu tzaj kyqʼamaʼn qe aj kawil tuʼn tbʼant kyuʼn. Kyaj tuʼn t-xi kybʼinchaʼn junjun nya bʼaʼn ik tzeʼn jlu, tuʼn t-xi kyqʼoʼn kywa xjal twitz tkyaqil Txʼotxʼ, a pero ¿axpe tok qa ya miʼn tentl weʼyaj? ¿Tiʼ in tzaj tqʼamaʼn Tyol Dios tiʼj jlu?
Kyaj qʼamaʼn toj Biblia tuʼn tten weʼyaj toj ambʼil jaʼlo
Kyaj qʼamaʼn toj Biblia tuʼn tten weʼyaj toj ambʼil jaʼlo, tuʼnju in qo anqʼin «tuj mankbʼil tqʼijlalil» (2 Timoteo 3:1). Nya tuʼn Dios at weʼyaj, pero o tzaj tqʼoʼn tqanil qe tiʼj jlu (Santiago 1:3). Qqʼonk qwitz tiʼj kabʼe profecía in yolin Biblia tiʼj.
«Ex noq jachaq tzul […] weʼyaj» (Mateo 24:7). Toj profecía lu, kyaj qʼamaʼn qa tuʼn ttzaj weʼya twitz tkyaqil Txʼotxʼ. Toj junjun tqanil etz kyuʼn xjal at kynabʼil ex kyojtzqibʼil tiʼj tzeʼn in xi sipin wabʼj twitz tkyaqil Txʼotxʼ kyqʼama jlu: «Maske in nok tilil kyuʼn xjal tuʼn miʼn tten weʼyaj pero mas ma txiʼ toj il tuʼnju nim xjal mintiʼ in kanet kywa, bʼisbʼajil tuʼnju nim o che kyim tuʼn weʼyaj». b
«Ex o wile, lu jun chej qʼeq tiʼj. Ex aju tjax tibʼaj chej, tzyuʼn jun balans tuʼn» (Apocalipsis 6:5). Toj profecía lu, aju chejil chej lu in nok te techel weʼyaj toj bʼajsbʼil tqʼijlalil. c Aju balans qʼin tuʼn toj tqʼabʼ in najbʼen tuʼn tok malet wabʼj, akux in bʼet chej lu at jun tqʼajqʼajel in tman qa ma jax kywi tiʼchaq in xi qwaʼn ex in tzaj tqʼamaʼn tuʼn miʼn tbʼaj qyajin qe tiʼchaq lu (Apocalipsis 6:6). Tuʼn jlu in nel qnikʼ tiʼj tiquʼn at weʼyaj twitz tkyaqil Txʼotxʼ, ex nim millón xjal mintiʼ in kanet tbʼanel kywa nixpe tuʼn ttzaj kylaqʼoʼn.
¿Tzeʼn kbʼel naj weʼyaj?
In tzaj kyqʼamaʼn qeju at kyojtzqibʼil, qa aju qplaneta jaku tzaj tqʼoʼn wabʼj kye kykyaqil xjal, pero ¿tiquʼntzun in tzaj weʼyaj? ¿Tiʼ in tzaj tqʼamaʼn Tyol Dios tiʼj aju kbʼantel tuʼn Jehová d aju bʼinchal qe, tuʼn t-xi tbʼinchaʼn kyiʼj nya bʼaʼn?
Aju nya bʼaʼn: Mlay kubʼ naj kyuʼn aj kawil aju mebʼayil ex aju nya bʼanʼ in tzaj kyiʼj xjal tuʼn weʼyaj.
Aju kbʼantel: Kʼelel qʼiʼn kyoklen xjal in che kawin toj ambʼil jaʼlo ex kkawil Tkawbʼil Dios te kyxel (Daniel 2:44; Mateo 6:10). Toj ambʼil jaʼlo kwest tuʼn ttzaj kylaqʼoʼn xjal kywa, pero tjaqʼ Tkawbʼil Dios kchʼexpajel jlu. In yolin Biblia tiʼj Jesús aju kkawil toj Tkawbʼil Dios «porke a kkolol kyiʼj qe mebʼa in che kubʼsan twitz ex kyiʼj qeju in che yajlanjtz ex mintiʼ jun onil kye […] Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz txʼotxʼ» (Salmo 72:12, 16).
Aju nya bʼaʼn: In tzaj xitbʼil kyuʼn guerra ex kwest in kanet kypwaq xjal ex ya mintiʼ in xi sipen wabʼj twitz tkyaqil Txʼotxʼ ex at maj mintiʼ in jyet kyuʼn xjal aju at tajbʼen tuʼn t-xi kywaʼn.
Aju kbʼantel: «Ma weʼ tkyaqil qʼoj tuʼn tuj tkyaqil twitz txʼotxʼ, ma che kubʼ ttoqan qe xobʼl plech kyukʼix qe lans, ex ma tzʼok tqʼoʼn kyqʼaqʼal qe carwaj in che ajbʼen tuj qʼoj» (Salmo 46:9). Che kbʼel tnajsaʼn Jehová qe kʼuxbʼil in che ajbʼen toj qʼoj ex qe xjal in che qʼojin ex tuʼn jlu kykyaqil kkanetel kywa toj jun tumel nya kwest. In tzaj ttziyen Tyol Dios jlu: «Che tel xjal tuj txubʼtxaj ex che bʼetel tuj tumelxix tuj tqʼijlalil Tkawbʼil» (Salmo 72:7).
Aju nya bʼaʼn: Aj ttzaj nim qʼijl ex nim jbʼal in tzaj xitbʼil twitz Txʼotxʼ, in tzaj nya bʼaʼn tiʼj awal ex kyiʼj alumaj.
Aju kbʼantel: Ktel tipumal Dios tuʼn miʼn ttzajtl xitbʼil, kbʼantel junjun tiʼ tuʼn tuʼntzun tten wabʼj twitz tkyaqil Txʼotxʼ. In tzaj tqʼamaʼn Tyol Dios jlu: «Bʼiʼx takeʼ kyqʼiqʼ tuʼn Qman ex mintiʼ jaw pulwintl mar, aju tzqij txʼotxʼ nnoʼk te nintz najabʼ tuʼn, ex atzun in che jatz jlet qe twi aʼ tuj, atzun in che kubʼ tqʼoʼn qeju mintiʼ in kanun kywa, ex in jaw kybʼinchaʼn kytanmi tuj. In kuʼx kyawaʼn kyawal tuj kojbʼil, in kuʼx kyawaʼn tqan uva, ex nim twitz kyawal in jaw kychmoʼn» (Salmo 107:29, 35-37).
Aju nya bʼaʼn: Aqeju xjal sbʼul qe oʼkx in che ximen kyiʼjx, in kubʼ kybʼinchaʼn junjun tiʼ tuʼn t-xiʼ qwaʼn aju mlay tzʼonin qiʼj, axpe ikx ya mintiʼtl in xi kyqʼoʼn onbʼil kye xjal mintiʼ kywa.
Aju kbʼantel: Aqeju xjal sbʼul che kbʼel najsaʼn tuʼn Tkawbʼil Dios (Salmo 37:10, 11; Isaías 61:8). In tzaj tqʼamaʼn Biblia jlu tiʼj Dios: «In xi tbʼinchaʼn kyiʼj qeju in che bʼaj yajlaʼn ex in xi tqʼoʼn kywa qeju nneʼl kykʼuʼj» (Salmo 146:7).
Aju nya bʼaʼn: Toj junjun abʼqʼi in naj mas te nikʼjan moqa mij wabʼj toj tkyaqil twitz Txʼotxʼ.
Aju kbʼantel: Tjaqʼ Tkawbʼil Dios kxel sipet kywa xjal toj jun tten tzʼaqli, jun techel, tej tten Jesús twitz Txʼotxʼ xi tqʼoʼn kywa mas te jweʼ mil xjal, xi tqʼamaʼn kye t-xnaqʼtzbʼen: «Kychmoʼnktze qe ttxʼaqan wabʼj ma kyaj ten, tuʼntzun miʼn tnaj chʼin» (Juan 6:5-13).
In qo tzalaj tuʼnju kxel tbʼinchaʼn Tkawbʼil Dios tiʼj nya bʼaʼn ik tzeʼn weʼyaj, kykyaqil qe xjal che tzalajel tiʼj tbʼanel wabʼj (Isaías 25:6). Tuʼn tel tnikʼa tiʼj jtoj kbʼantel jlu tuʼn Tkawbʼil Dios, uʼjinktza xnaqʼtzbʼil «¿Jtoj kkawil Tkawbʼil Dios tibʼaj Txʼotxʼ?».
a Ma jatz toj Agenda 2030 sobre el Desarrollo Sostenible, aprobada en el 2015 por todos los Estados Miembros de las Naciones Unidas.
b Chi jun tqanil tuʼn Organización de las Naciones Unidas para la Alimentación y la Agricultura, tuʼn Fondo Internacional de Desarrollo Agrícola, tuʼn Fondo de las Naciones Unidas para la Infancia, tuʼn Programa Mundial de Alimentos de las Naciones Unidas ex tuʼn Organización Mundial de la Salud.
c Tuʼn tel mas tnikʼa tiʼj alkyeqe kyaje xjal in che chejin aju in yolin Apocalipsis tiʼj, uʼjinktza aju xnaqʼtzbʼil «¿Alkyeqe kyaje xjal in che chejin?».
d Jehová tbʼi Dios (Salmo 83:18, La Biblia. Traducción del Nuevo Mundo). Uʼjinktza xnaqʼtzbʼil «¿Alkye Jehová?».