Toj tkyaqil twitz Txʼotxʼ, in che bʼiyen xjal tuʼn tkubʼ kychʼixpuʼn política.

•    Toj ambʼil te votación te 2023-2024 toj México, e kubʼ bʼyoʼn 39 candidato ex bʼaj junjuntl nya bʼaʼn toj política, naʼmxtoq bʼaj jun tiʼ ik tzeʼn jlu.

•    At nim bʼiybʼil toj Europa tuʼn tpaj política, axpe ikx chʼixtoq tkubʼ bʼyoʼn aj kawil te tnam Eslovaquia toj 15 te mayo te 2024.

•    Toj 13 te julio te 2024, bʼiʼx e jaw labʼin xjal toj Estados Unidos tej chʼixtoq tkubʼ bʼyoʼn Donald Trump, jun xjal otoq tzʼok te presidente.

 ¿Tiquʼn at bʼiybʼil tuʼn tpaj política? ¿Kbʼajelpe te jumajx? ¿Tiʼ in tzaj tqʼamaʼn Tyol Dios tiʼj jlu?

 In yolin Tyol Dios tiʼj ambʼil jaʼlo, in nok tqʼoʼn tbʼi te «mankbʼil tqʼijlalil» ex in tzaj tqʼamaʼn qa tzultoq nya bʼaʼn ex bʼiybʼil kyxol xjal tuʼnju ten nya bʼaʼn kymod.

•    «Tuj mankbʼil tqʼijlalil tzul nim yajbʼil. Ok che ul xjal oʼkx tok kykʼuʼj kyiʼjx, [...] ex mintiʼ in kyqʼoʼn chjonte tiʼj ju in kykʼmoʼn, [...] ex mintiʼ in chewix kykʼuʼj, [...] ex mintiʼ chʼin kylastmi kyiʼj xjal, ex nneʼl kyikʼun aju bʼaʼn, ax in che ok meltzʼaj kyiʼj kyukʼil, txʼuʼj kywiʼ, ex in jaw kyniman kyibʼ» (2 Timoteo 3:1-4).

 Ax ikx o kyaj tqʼamaʼn Biblia qa che jawiltoq tilj xjal tiʼj gobierno ex ktzajeltoq bʼiybʼil kyxol xjal tuʼn tlaj política toj ambʼil jaʼlo (Lucas 21:9, nota) Noqtzun tuʼnj, nya te jumajx ktel bʼiybʼil ex política.

 In tzaj tqʼamaʼn Biblia qa kʼelel tiʼn Dios kykyaqil gobierno twitz Txʼotxʼ ex kbʼel tqʼoʼn tex Tkawbʼil toj kyaʼj te kyxel kykawbʼil xjal.

•    «Ate Dios aju at tuj kyaʼj kbʼel tqʼoʼn jun kawbʼil mlay naj [...], noq oʼkx che bʼel bʼaj kykyaqil txqantl kawbʼil tuʼn, atzunte kukx ktel te jumajx» (Daniel 2:44).

 Ktel mujbʼabʼil ex tzalajbʼil toj tkyaqil twitz Txʼotxʼ noq tuʼnju Tkawbʼil Dios.

•    A Jesucristo aj kawil toj Tkawbʼil Dios ex in nok qʼoʼn tbʼi te «Nejenel tuʼn kyten xjal toj txubʼtxaj» Ex «te jumajx kwebʼel qʼoj tuʼn, tuʼn kyten xjal tuj txubʼtxaj, ex aju tkawbʼil kyjel ten te jumajx» (Isaías 9:6, 7).

•    Jaʼlo, aqeju in che onin tiʼj Tkawbʼil Dios in bʼaj kyxnaqʼtzan kyibʼ tuʼn kyanqʼin toj txubʼtxaj ex toj mujbʼabʼil. Ex in bʼant kyuʼn aju in tzaj tqʼamaʼn Tyol Dios kyiʼj: «Kbʼajel kybʼinchaʼn kyspad tuʼn kyok te punt ex kylans kbʼajel kybʼinchaʼn tuʼn kyok te jobʼl tqʼabʼ uva. Mlayx tzaj kytzyuʼn qe tnam juntl maj kyspad tuʼn kyqʼojin kyiʼj txqantl tnam, ex mlayx kykʼam juntl maj xnaqʼtzbʼil tuʼn tbʼant kyqʼojin» (Isaías 2:3, 4).

 Tuʼn tok tojtzqiʼna mas, uʼjinktza xnaqʼtzbʼil lu: «¿Qué cosas logrará el Reino de Dios?» ex keʼyinka video lu: ¿Tiʼ aju Tkawbʼil Dios?