Ok nim tiroteo toj julio te 2022 twitz tkyaqil Txʼotxʼ:

•   «Nim e jaw labʼin xjal te Japón ex te txqantl tnam tej tkubʼ bʼyoʼn Shinzo Abe, jun kyxol qe ministro político mas ojtzqiʼn twitz. Ex mas e jaw labʼin tuʼnju mintiʼxix in nok bʼiybʼil toj tnam lu ex tuʼnju ateʼ nim ley tuʼn miʼn tten ky-arma xjal» (10 te julio te 2022, The Japan Times).

•   «Nim e tzaj xobʼ xjal te Dinamarca tuʼnju e kubʼ bʼyoʼn oxe xjal toj jun centro commercial te Copenhagen tuʼn jun xjal qʼiʼn arma tuʼn» (4 te julio te 2022, Reuters).

•   «Toj tnam Sudafrica: e ok ten junjun xjal dispararil toj jun bar te Soweto ex e kyim 15 xjal» (10 te julio te 2022, The Guardian).

•   «E kyim mas te 220 xjal atz Estados Unidos kyuʼn xjal qʼiʼn arma kyuʼn toj fin de semana tej tok fiesta te 4 te julio» (5 te julio te 2022, CBS News).

 ¿Kpolpe jun qʼij jatumel kbʼel naj tkyaqil bʼiybʼil lu? ¿Tiʼ in tzaj tqʼamaʼn Tyol Dios tiʼj jlu?

 In tzaj tqʼamaʼn Tyol Dios qa in qo anqʼin «tuj mankbʼil tqʼijlalil», jun ambʼil atz jatumel «mintiʼ chʼin kylastmi» xjal kyiʼj txqantl ex at nim ikʼbʼil toj kyanmi (2 Timoteo 3:1, 3). In che tzaj xobʼ xjal tuʼn tkyaqil jlu (Lucas 21:11). In tzaj qʼamaʼn toj Tyol Dios qa kbʼel naj bʼiybʼil ex qa «che tel [xjal] tuj txubʼtxaj, ex che najal kyuj qe ja segurxix te ojlabʼl» (Isaías 32:18). Pero, ¿tzeʼn kbʼel naj bʼiybʼil?

 Kbʼel tnajsaʼn Dios qe nya bʼaʼn xjal ex qe arma.

•   «Qeju bʼinchal mya bʼaʼn […], bʼiʼx che elex lajoʼn tuj [Txʼotxʼ]» (Proverbios 2:22).

•   «Ma weʼ tkyaqil qʼoj tuʼn [Dios] tuj tkyaqil twitz txʼotxʼ, ma che kubʼ ttoqan qe xobʼl plech kyukʼix qe lans, ex ma tzʼok tqʼoʼn kyqʼaqʼal qe carwaj in che ajbʼen tuj qʼoj» (Salmo 46:9).

 Ya miʼn che bʼiyen xjal tuʼnju kxel tqʼoʼn Dios xnaqʼtzbʼil kye tuʼn kyanqʼin toj mujbʼabʼil.

•   «Tuj tkyaqil twi witz xjan aju etzan tuʼn Qman, mintiʼ jun kbʼinchal jun mya bʼaʼn tiʼj juntl, porke ik tzaʼn aʼ in noj mar tuʼn, ax ikxtzun kykyaqil xjal twitz txʼotxʼ kʼelel kynikʼ tiʼj Qman» (Isaías 11:9).

•   Axpe ikx toj ambʼil jaʼlo, in xi tqʼoʼn Dios xnaqʼtzbʼil kye xjal tuʼn miʼn kybʼiyin ex tuʼn miʼn tajbʼen arma kyuʼn aj ttzaj tqʼamaʼn tuʼn tbʼaj «kybʼinchaʼn qe kyspad tuʼn kyok te kypunt ex qe kylans tuʼn kyok te jobʼl triw» (Miqueas 4:3).

 In tzaj ttziyen Biblia qa ya mlay che tzaj xobʼ xjal tuʼn bʼiybʼil. ¿Taja tuʼn tel mas tnikʼa tiʼj jlu? Bʼaʼn tuʼn tjaw tuʼjina xnaqʼtzbʼil «¿Es posible librarse del miedo?».

 Ax ikx, qa taja tuʼn tel mas tnikʼa tiʼj tzeʼn kbʼel naj bʼiybʼil, jaku jaw tuʼjina xnaqʼtzbʼil «¡Por fin paz en la Tierra!».