¡KUKX QO XQʼUQIN!
Mas in jax kywi tiʼchaq twitz tkyaqil Txʼotxʼ: ¿Tiʼ in tzaj tqʼamaʼn Tyol Dios tiʼj jlu?
Tqʼama presidente in naqʼunan toj Grupo de Banco Mundial toj jun tqanil te junio te 2022 qa mas tzul nya bʼaʼn tuʼnju mintiʼ pwaq. Mas in jax kywi tiʼchaq ex tojx ambʼil lu, mintiʼ kypwaq xjal.
Ik tzeʼn tqʼama Fondo Monetario Internacional, «jun rat ma jax twi gasolina ex twi wabʼj, ex tuʼn jlu mas in tzaj nya bʼaʼn kyiʼj xjal kyoj tnam jatumel mintiʼxix pwaq».
In nonin Tyol Dios qiʼj tuʼn tel qnikʼ tiʼj tiquʼn in che ikʼ nya bʼaʼn lu, tzeʼn jaku qo ex kywitz ex tiʼ qʼuqbʼil qkʼuʼj in tzaj tqʼoʼn Dios toj ambʼil tzul.
Kjawix kywi tiʼchaq kyoj «mankbʼil tqʼijlalil»
In nok tqʼoʼn Tyol Dios tbʼi ambʼil jaʼlo te «mankbʼil tqʼijlalil» (2 Timoteo 3:1).
Tqʼama Jesús qa «tzul sekʼpubʼl» ex qa che tzajel xobʼ xjal tuʼn jlu (Lucas 21:11). Aj tjax kywi tiʼchaq, in che tzaj xobʼ nim xjal tuʼnju mintiʼ ojtzqiʼn kyuʼn tiʼ kbʼajel toj ambʼil tzul ex tzeʼn tuʼn kykʼaʼchit toj kyja.
In tzaj tqʼamaʼn uʼj te Apocalipsis qa kjawix kywi tiʼchaq toj ambʼil jaʼlo. In tzaj tqʼamaʼn jlu: «Xi nbʼiʼne jun tqʼajqʼajel [...] in tmaʼn: Kabʼ libr triw tuʼn jun denari pwaq, ex qaq libr sebad tuʼn jun denari pwaq» (Apocalipsis 6:6).
Tuʼn tel mas tnikʼa tiʼj «mankbʼil tqʼijlalil» ex tiʼj profecía tkuʼx toj uʼj te Apocalipsis, keʼyinka video Chʼexpaj tkyaqil toj abʼqʼi 1914 ex uʼjinktza xnaqʼtzbʼil «¿Alkyeqe kyaje xjal in che chejin?».
¿Tzeʼn kjel nya bʼaʼn toj ttxolil?
«Kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz. Ok tjaw tbʼinchaʼn xjal jun ja, mlay bʼant tuʼn tpon junxitl najal tuj, ex ok tkuʼx tawal xjal, mlay bʼant junxitl tuʼn twaʼn tiʼj» (Isaías 65:21, 22).
«Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz txʼotxʼ. Ik kʼokel twitz ik tzaʼn qe tzeʼ twi witz Líbano, ex che chmetel nim xjal tuj tnam ik tzaʼn kʼul in poqʼchaj tuj kojbʼil» (Salmo 72:16).
«Ex atzun yol lu ma tma Qman: Aqine chin jawil weʼ ex che kletel wuʼne qe xjal in che bʼaj yajlaʼn ex qe xjal mebʼa» (Salmo 12:5).
Toj chʼintl ambʼil, kxel tbʼinchaʼn Dios tiʼj nya bʼaʼn in tzaj tuʼnju mintiʼ pwaq ex nya oʼkx toj jun tnam kbʼantel tuʼn, sino twitz tkyaqil Txʼotxʼ. Tuʼn tel mas tnikʼa tiʼj jlu, uʼjinktza xnaqʼtzbʼil «¿Atpe ttxolil qa ma kubʼ qximen qa kxel sipen aju at tajbʼen kye xjal toj tumel toj ambʼil tzul?».
Maske naʼmx tpon ambʼil tuʼn tel tiʼn Dios tkyaqil nya bʼaʼn, jaku tzʼonin Biblia qiʼj tuʼn qex kywitz. ¿Alkye tten? In tzaj tqʼoʼn tbʼanel consej qe tiʼj tzeʼn tuʼn tajbʼen pwaq quʼn toj tumel (Proverbios 23:4, 5; Eclesiastés 7:12). Tuʼn tel mas tnikʼa tiʼj, uʼjinktza qe xnaqʼtzbʼil «Xqʼuqink tpwaqa» ex «¿Tzeʼn jaku qo anqʼin tukʼil nya nim tiʼchaq?».