¿Alkye tten in xqʼuqin Dios kyiʼj qeju chkin kywiʼ?
Toj ambʼil jaʼlo, ateʼ junlo 70 millón xjal chkin kywiʼ twitz tkyaqil Txʼotxʼ ex in najbʼen jun kyxol qeju mas te 200 lenguaje de señas kyuʼn. Pero bʼisbʼajilxix tuʼnju mas in nok bʼinchaʼn nya bʼaʼn kyiʼj xjal lu ik tzeʼn in tzaj tyekʼin junjun tqanil in tzaj qʼamaʼn tzalu:
«Twitz tkyaqil Txʼotxʼ, nya nim kyoklen qeju xjal chkin kywiʼ toj kywitz txqantl» (chi Asociación Nacional de Sordos te Estados Unidos).
«Mas mebʼa moqa prow qeju xjal chkin kywiʼ kyoj tnam nyaxix qʼinin. Ax ikx mas mintiʼ in xi qʼoʼn xnaqʼtzbʼil kye, mas mintiʼ in xi qʼoʼn kyaqʼun ex mas mintiʼ in xi qʼoʼn tkyaqil tqanil tiʼj jun tiʼ kye» (chi Federación Mundial de Sordos).
¿Tzeʼn in che ela xjal chkin kywiʼ toj twitz Dios? ¿Tiʼ in tzaj tqʼamaʼn Biblia kyiʼj? ¿Ex alkye tten in che onin testigo de Jehová kyiʼj?
¿Tiʼ t-xim Dios kyiʼj xjal chkin kywiʼ?
In tzaj tyekʼin Biblia qa in ximen Qman Jehová kyiʼj qeju xjal chkin kywiʼ. a Tajbʼil tuʼn tok qqʼoʼn kyoklen qeju xjal lu ex tajbʼil tuʼn t-xi qʼet xnaqʼtzbʼil kye aju in tzaj tqʼoʼn.
Aju in tzaj tqʼamaʼn Tyol Dios: «Miʼn tzʼok kyyasoʼne aju xjal chkin twiʼ» (Levítico 19:14).
Aju t-xilen: Aju ley tzaj tqʼoʼn Jehová kye aj Israel, ok t-xqʼuqin kyoklen xjal chkin kywiʼ.
Aju in tzaj tqʼamaʼn Tyol Dios: «Mintiʼ in tkeʼyin Dios aju kyxilen xjal» (Hechos 10:34).
Aju t-xilen: In ximen Jehová kyiʼj xjal te junjuntl tnam, te junjuntl kyyol, ax ikx kyiʼj qeju xjal chkin kywiʼ.
Aju in tzaj tqʼamaʼn Tyol Dios: «Bʼaj tbʼetin Jesús kyuj kykyaqil tnam [...], in pakbʼan tiʼj tqanil bʼaʼn tiʼj tkawbʼil Dios» (Mateo 9:35).
Aju t-xilen: Tej tul Jesús tzalu twitz Txʼotxʼ, xi tqʼoʼn xnaqʼtzbʼil kye xjal tiʼj Tkawbʼil Dios ex tiʼjju kbʼantel tuʼn Kawbʼil lu tuʼn tonin kyiʼj xjal, ik tzeʼn tiʼ kbʼantel tuʼn tonin kyiʼj xjal chkin kywiʼ (Mateo 6:10).
Aju in tzaj tqʼamaʼn Tyol Dios: Ax ikx «qe chkyin» kywiʼ «bʼant kybʼin tuʼn» Jesús «ex qe men [...] bʼant kyyolin tuʼn» (Marcos 7:37).
Aju t-xilen: Kubʼ tyekʼin Jesús aju kbʼantel tuʼn Tkawbʼil Dios aj tpon ambʼil tuʼn kyyolin ex tuʼn kybʼin qeju xjal chkyin kywiʼ tuʼn. Toj ambʼil lu, kubʼ tyekʼin Jesús tbʼanel tmod tukʼil jun xjal chkin twiʼ tej tyolin tukʼil naʼmxtoq tbʼant tyolin xjal tuʼn ex naʼmxtoq tbʼant tbʼin xjal tuʼn (Marcos 7:31-35).
Aju in tzaj tqʼamaʼn Tyol Dios: «Kbʼantel kybʼin qeju chkyin kywiʼ» (Isaías 35:5).
Aju t-xilen: O tzaj ttziyen Jehová qa ok che bʼil qeju xjal chkyin kywiʼ (Isaías 29:18).
¿Tzeʼn in che onin testigos de Jehová toj ambʼil jaʼlo kyiʼj xjal chkin kywiʼ?
Twitz tkyaqil Txʼotxʼ, in xi kypakbʼan testigos de Jehová Tyol Dios kye xjal chkin kywiʼ. ¿Alkye tten in bʼant kyuʼn? In bʼant jlu kyuʼn aj kyetz Biblia ex qe video kyoj mas te 100 lenguaje de señas tuʼntzun kyxnaqʼtzan tiʼj Tyol Dios. Ax ikx in xi kyqʼoʼn xnaqʼtzbʼil tiʼj Tyol Dios ex in che ok chmabʼil kyuʼn. Alkyexku jun xjal jaku txi qʼet t-xnaqʼtzbʼil te moqa jaku pon kyoj chmabʼil noq kukx. ¿Tiquʼn nya chjoʼn twiʼ tkyaqil jlu? Tuʼnju tqʼama Jesús: «Noq kukx ma kykʼame kyoklene lu, ax ikx [...] noq kukx kybʼinchame» (Mateo 10:8).
Jaku che kanet qe onbʼil tiʼj Tyol Dios tuʼna ex jaku che kutz tdescargarina kyoj qe aplicación lu:
Aju JW.ORG. Qa taja tuʼn tkubʼ tqʼoʼna página lu toj teya tyol, jaku kubʼ tchʼexpuʼna aj t-xi tqʼoʼna clic toj icono tjax toj twiʼ página.
Aju aplicación JW Library Sign Language. Noq kukx jaku kutz tiʼna aplicación lu tuʼntzun kykutz tdescargarina moqa tuʼn t-xi tyekʼina qe video toj lenguaje de señas.
¿Alkyeqe onbʼil tiʼj Biblia o che etz quʼne toj lenguaje de señas?
O tzʼetz Biblia toj lenguaje de señas. Aju Traducción del Nuevo Mundo de las Santas Escrituras toj lenguaje de señas americano atzun tnejel Biblia o kubʼ traducirin tkyaqil toj lenguaje de señas twitz tkyaqil Txʼotxʼ. Ya o tzʼetz traducirit tkyaqil moqa noq jun piẍ te Traducción del Nuevo Mundo kyoj junjuntl yol te lenguaje de señas ex in che etz traducirin kyoj mas lenguaje de señas aj tikʼ ambʼil (jaku tzʼok tqʼoʼna twitza tiʼj alkyeqe lenguaje de señas o tzʼetz Biblia kyoj toj jun lista tkubʼ jatumel in tqʼamaʼn « Aju Traducción del Nuevo Mundo toj lenguaje de señas»).
Bʼaʼn tuʼn tok tqʼoʼna twitza tiʼj video tok tbʼi La Traducción del Nuevo Mundo completa en lenguaje de señas americano ya está disponible tuʼntzun tel tnikʼa tiʼj alkye aqʼuntl in bʼant tuʼn tetz jun Biblia toj lenguaje de señas.
Jaku kutz tdescargarina aplicación JW Library Sign Language. Jun rat jaku kanet jun texto taja toj aplicación lu.
Mambʼaj qe Dmytro ex Vita, pero ate’ kabʼe kykʼwal nya chkyin kywiʼ. Qʼonk twitza tiʼj alkye tten in jaw kyuʼjin Biblia tkyaqil qiʼj toj lenguaje de señas.
Qe video in tzaj kyxnaqʼtzaʼn tiʼj Biblia. O che etz nim videos toj lenguaje de señas kyuʼn Testigos de Jehová aqeju jaku che onin kyiʼj xjal tuʼn tel kynikʼ ex tuʼn tjapun kyuʼn aqeju consej in tzaj tqʼoʼn Biblia kye:
Xnaqʼtzbʼil tiʼj Tyol Dios oʼkx te teya. Jaku xnaqʼtzana tiʼj Tyol Dios toj lenguaje de señas toj jniʼ ambʼil at tiʼja ex tukʼil jun xjal jaku tzʼonin tiʼja. Qʼamanxa tuʼn tzaj yekʼin teya alkye tten in nok xnaqʼtzbʼil lu.
In nanqʼin Jeson Senajonon atz toj tnam Filipinas. Keʼyinka tzeʼn o tzʼonin xnaqʼtzbʼil lu tiʼj tuʼn ten jun tbʼanel tamiwbʼil tukʼil Dios.
Jun pastortoq Mario Antúnez toj jun iglesia te Honduras. Keʼyinka tzeʼn o kanet tzaqʼwebʼil kyiʼj qe t-xjel tiʼj Biblia, ik tzeʼn tej tqʼama aju ikʼ tiʼj toj xnaqʼtzbʼil «Tenia muchas preguntas y pocas respuestas».
In che ok chmabʼil ex junjuntl ikʼsabʼil. At nim congregación ex junjun grupo toj lenguaje de señas twitz tkyaqil Txʼotxʼ. Kyoj lu, in nok kychmon kyibʼ xjal chkin kywiʼ tuʼn kyxnaqʼtzan ex tuʼn kynaʼn Dios tkyaqil seman. Ax ikx in che ok junjuntl ikʼsabʼil mas matij moqa mas nintzkuʼ toj lenguaje de señas tkyaqil abʼqʼi tuʼn kukx kyxnaqʼtzan qeju xjal chkyin kywiʼ tiʼj Tyol Dios. Kyoj chmabʼil lu, ax ikx in xi qʼet onbʼil kye qeju chkyin kywiʼ ex moẍ. Ax ikx in xi qʼet onbʼil tiʼj Tyol Dios toj braille ex nya chjoʼn twiʼ.
Bʼaʼn tuʼn t-xi tjyoʼna jun congregación mas nqayin tiʼj tjaya.
Bʼaʼn tuʼn t-xiʼya toj jun asamblea moqa toj jun ikʼsabʼil in nok quʼne tkyaqil abʼqʼi.
Ex bʼaʼn tuʼn t-xiʼya toj Nabʼitz Tkyimlen Jesucristo aju chmabʼil mas nim toklen in nok toj tkyaqil abʼqʼi.
In nanqʼin José Luis Ayala toj tnam México. Chkin twiʼ tej tul itzʼ ex tej tbʼet ambʼil kyaj te moẍ. Bʼaʼn tuʼn tel tnikʼa tiʼj alkye tten o txi qʼet onbʼil te tuʼn tok te jun tbʼanel aj xnaqʼtzal tiʼj Biblia.
a Jehová tbʼi Dios (Salmo 83:18, La Biblia. Traducción del Nuevo Mundo). Ex bʼaʼn tuʼn txi tjyoʼna xnaqʼtzbʼil «¿Alkye Jehová?».