Twitz tkyaqil txʼotxʼ ex jun maj toj abʼqʼi, in nok kychmon kyibʼ testigos de Jehová ex nim millón xjal otoq txi qʼet txokbʼil kye tuʼn tkubʼ kyikʼsaʼn Nabʼitz Tkyimlen Jesucristo, ik tzeʼn kyaj qʼamaʼn tuʼn t-xi bʼinchet (Lucas 22:19). Aj tkubʼ ikʼset lu, in nonin qiʼj tuʼn tel qnikʼ tiʼj jniʼ toklen tchwinqlal Jesús xi tqʼoʼn kyiʼj xjal. Ax ikx, in nonin qiʼj tuʼn tel qnikʼ tiʼj alkye tten jaku tzʼonin chojbʼil o bʼant tuʼn Jesús qiʼj toj ambʼil jaʼlo ex toj ambʼil tzul (Juan 3:16).

 Qa tena moqa miʼn toj Nabʼitz Tkyimlen Jesucristo toj abʼqʼi lu, ¿tiʼ jaku bʼant tuʼna tuʼn tonin chojbʼil tiʼja aju o bʼant tuʼn Jesús? Tqʼama Jesús kabʼe tiʼj tuʼn tbʼant quʼn:

1.  1. Tuʼn tok qojtzqiʼn alkye Dios ex alkye Jesús. Xi tqʼamaʼn Jesús jlu te Ttat toj jun naʼj Dios: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).

2.  2. Tuʼn t-xi qbʼinchaʼn aju in nel qnikʼ tiʼj. Tqʼama Jesús qa nimxix toklen tuʼn tkubʼ qanqʼin tkyaqil qe t-xnaqʼtzbʼil Jesús toj qanqʼibʼil. Jun techel, tej chʼixtoq tkubʼaj jun tchikʼbʼabʼil twiʼ jun witz, tqʼama qa at tzalajbʼil teju xjal in xi tbʼiʼn tyol «ex in tbʼinchaʼn aju in» tqʼamaʼn (Lucas 6:46-48). Ax ikx toj juntl maj, tqʼama qe yol lu: «Qa ma tzʼel kynikʼe tiʼj jlu, at-xix tzalajbʼil kyeye qa ma kybʼinchaye» (Juan 13:17).

 ¿Tajbʼil teya tuʼn tel mastl tnikʼa tiʼj Dios ex tiʼj Jesús? ¿Taja tuʼn tel tnikʼa tiʼj alkye tten tuʼn tkubʼ tbʼinchaʼna aju in nel tnikʼa tiʼj? In tzaj qʼamaʼn junjun tumel tzalu aju jaku tzʼonin tiʼja.

 Aju xnaqʼtzbʼil in xi qqʼoʼne tiʼj Tyol Dios o tzʼonin kyiʼj nim xjal tuʼn tkubʼ kyxnaqʼtzaʼn Biblia ex tuʼn tkubʼ kybʼinchaʼn aju in nel kynikʼ tiʼj.

•   Tuʼn tel mastl tnikʼa tiʼj tzeʼn qe xnaqʼtzbʼil in xi qqʼoʼne, bʼaʼn tuʼn tokxa toj qtembʼile te internet jatumel in tqʼamaʼn «Jaku tzʼonin jun qeye tiʼja tuʼn t-xnaqʼtzana tiʼj Biblia».

•   Tuʼn tel tnikʼa tiʼj tzeʼn aju aj t-xnaqʼtzan jun xjal tiʼj Tyol Dios tukʼil jun testigo de Jehová, qʼonka twitza tiʼj video Bʼaʼn tulena toj xnaqʼtzbʼil tiʼj Tyol Dios.

 Kabʼe maj in nok kychmon kyibʼ testigo de Jehová toj seman kyoj lugar in nok kybʼi te ja te chmabʼil. Kyoj qe chmabʼil lu, in che yolin testigo de Jehová tiʼjju in tzaj tqʼamaʼn Tyol Dios ex tiʼjju alkye tten jaku kubʼ kybʼinchaʼn aju in nel kynikʼ tiʼj.

 Noq alkyexku xjal jaku tzʼokx ex nya il tiʼj tuʼn tok te testigo de Jehová tuʼn t-xiʼ kyoj chmabʼil lu. Ax ikx at maj, tuʼnju in che ikʼ junjun tiʼchaq toj junjun lugar, atz toj videoconferencia in che ok chmabʼil, pero qa toj ja te chmabʼil ex qa toj videoconferencia, in qo txokine tiʼja tuʼn ttena kyoj chmabʼil.

•  Tuʼn tok tqʼoʼna twitza tiʼj tiʼ kbʼajel aj t-xiʼya toj jun chmabʼil kye testigo de Jehová, qʼonka twitza tiʼj video ¿Tiʼ in bʼaj toj jun Ja te Chmabʼil?

•   Tuʼn tok tqʼoʼna twitza tiʼj jatumel taʼ jun ja te chmabʼil mas nqayin jatumel in nanqʼina, bʼaʼn tuʼn tokxa toj qtembʼile te internet atz jatumel tqʼamaʼn «Kychmabʼil testigos de Jehová».

 O che kubʼ qʼoʼn nim xnaqʼtzbʼil ex video toj tembʼil lu te internet aqeju jaku che onin tiʼja tuʼn tel mas tnikʼa tiʼjju kyaj t-xnaqʼtzaʼn Jesús ex tiʼj toklen chojbʼil bʼant tuʼn tej tkyim.

 Jun techel, Qa tajbʼila tuʼn tel tnikʼa tiʼj tiquʼn jaku tzʼonin tkyimlen junx xinaq moqa ichan kyiʼj nim millón xjal, jyonxa qe xnaqʼtzbʼil «¿Alkye tten in qo klet tuʼn Jesús?», «¿Tiquʼn kyim Jesús ex ikʼx nim kʼixkʼoj tuʼn?» moqa bʼaʼn tuʼn tok tqʼoʼna twitza tiʼj video ¿Tiquʼn kyim Jesús?