Bʼalo kʼokel kykeʼyin junlo 5 millón xjal Copa Mundial de la FIFA. Xi tzyet toj 20 te noviembre ex kpol bʼaj toj 18 te diciembre te 2022. In kubʼ kyximen nim xjal qa nya oʼkx kʼokel kychmon kyibʼ tuʼn tok kykeʼyin fútbol, sino kʼonil kyiʼj tuʼn tten mujbʼabʼil kyxol.

•   «At tipumal deporte tuʼn tchʼexpaj kymod xjal, tuʼn tkubʼ kynaʼn tzalajbʼil, tuʼn tok kychmon kyibʼ» (Nelson Mandela, expresidente te Sudáfrica).

•   «In nonin fútbol [...] kyiʼj xjal tuʼn tten qʼuqbʼil kykʼuʼj, tuʼn kytzalaj, tuʼn tten kʼujlabʼil kyxol ex tuʼn tten junx kyximbʼetz» (Gianni Infantino, presidente te FIFA). a

 ¿Axpe tok jaku bʼant jlu tuʼn fútbol moqa tuʼn alkyexku juntl clase deporte? ¿Jakupe tzʼok qeʼ qkʼuʼj tiʼj qa jaku ten tzalajbʼil ex mujbʼabʼil kyxol xjal?

 Nya oʼkx in che keʼyin xjal tiʼj mundial toj abʼqʼi lu. Sino ax ikx o tzaj tiʼn qʼoj kyxol ex kyxol político, ik tzeʼn tiʼj kyoklen, tiʼj kytnam ex tiʼj pwaq.

 Maske ikju, ateʼ nim xjal in kubʼ kyximen qa in che onin deporte ik tzeʼn mundial tuʼn kytzalaj jun rat. Noqtzun tuʼnj, mintiʼ in nonin jlu kyiʼj xjal tuʼn tten mujbʼabʼil kyxol te jumajx. Sino mas in nel toj qʼanchaʼl tiʼ kyximbʼetz ex kymod at, ex tuʼn jlu in kubʼ kyyekʼin qa nya kyaj tuʼn tten mujbʼabʼil kyxol. In yolin Biblia kyiʼj mod lu ex in tzaj tqʼamaʼn qa jun yekʼbʼil lu tiʼj qa in qo anqʼin kyoj «mankbʼil tqʼijlalil» (2 Timoteo 3:1-5).

 In tzaj tqʼamaʼn Biblia qa jaku tzʼok qeʼ qkʼuʼj tiʼj qa jaku ten mujbʼabʼil kyxol xjal. In tzaj ttziyen qa kykyaqil xjal ateʼ twitz Txʼotxʼ che tel toj mujbʼabʼil tjaqʼ «tkawbʼil Dios» at toj kyaʼj (Lucas 4:43; Mateo 6:10).

 A Jesús kkawil toj Tkawbʼil Dios ex kʼonil tuʼn tten mujbʼabʼil kyxol xjal twitz tkyaqil Txʼotxʼ. In tzaj tqʼamaʼn Tyol Dios jlu:

•   «Che tel xjal tuj txubʼtxaj ex che bʼetel tuj tumelxix» (Salmo 72:7).

•   «A kkolol kyiʼj qe mebʼa in che kubʼsan twitz [...]. Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal» (Salmo 72:12, 14).

 Toj ambʼil jaʼlo, in che onin t-xnaqʼtzbʼil Jesús tuʼn kyten nim millón xjal toj mujbʼabʼil toj 239 tnam. Ax ikx, o che onin kyiʼj tuʼn miʼn tten ikʼbʼil toj kyanmi. Tuʼn tel mas tnikʼa tiʼj jlu, jaku jaw tuʼjina kʼloj xnaqʼtzbʼil «Jaku kubʼ tiʼj ikʼbʼil quʼn».