¡KUKX QO XQʼUQIN!
¿Alkye jun jaku kolin kyiʼj xjal toj qʼoj? | ¿Tiʼ in tzaj tqʼamaʼn Biblia?
Tzaj qʼamaʼn jlu tuʼn Naciones Unidas:
Kyoj qe qʼij 7 a 23 te octubre te 2023, e kyim 6 mil 400 xjal ex 15 mil 200 e kʼixbʼi tuʼn qʼoj in nok kyxol tnam Gaza tukʼil Israel ex chʼixmi kykyaqil jlu nya soldad qe. Nya oʼkxju, ax ikx e ikʼ bʼet nim mil xjal kyja tuʼn kyxiʼ toj juntl lugar.
Toj 24 te septiembre te 2023, e kyim 9 mil 701 xjal ex 17 mil 748 e kʼixbʼi tuʼnju in nok qʼoj kyxol tnam Rusia tukʼil Ucrania.
¿Alkye qʼuqbʼil kykʼuʼj xjal lu in tzaj tqʼoʼn Biblia?
At jun qʼuqbʼil kykʼuʼj
In tzaj tqʼamaʼn Biblia qa kwebʼel «tkyaqil qʼoj tuʼn [Dios] tuj tkyaqil twitz txʼotxʼ» (Salmo 46:9). Kbʼel tqʼoʼn Dios jun kawbʼil moqa jun gobierno toj kyaʼj tuʼn tkawin te kyxel ky-gobierno xjal (Daniel 2:44). At nim tbʼanel tzul tiʼn Tkawbʼil Dios kye xjal.
Qbʼinx aju kbʼantel tuʼn Jesucristo aju aj Kawil toj Tkawbʼil Dios:
«A kkolol kyiʼj qe mebʼa in che kubʼsan twitz ex kyiʼj qeju in che yajlanjtz ex mintiʼ jun onil kye.Ktzajel tzʼeʼy tkʼuʼj kyiʼj qe xjal mans, ex che kletel qe xjal mebʼa tuʼn. Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal» (Salmo 72:12-14).
Kʼajbʼel Kawbʼil tuʼn Dios tuʼn tel tiʼn kʼixkʼoj ex yajbʼil in tzaj tuʼn qʼoj ex bʼiybʼel.
«Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porke aqeju at tnejel ma che naj» (Apocalipsis 21:4).
Chʼix tpon ambʼil tuʼn tul tiʼn Tkawbʼil Dios chʼixpubʼil twitz Txʼotxʼ. Kyaj qʼamaʼn jlu toj Biblia: «Ok kybʼiʼye ok tok qʼoj ex ok kybʼiʼye tqanil tiʼj qʼoj», ex atzun jlu in bʼaj toj ambʼil jaʼlo (Mateo 24:6). A jlu ex qeju junjuntl tiʼchaq in che ikʼ, in tzaj tyekʼin qa in qo anqʼin ‹kyoj bʼajsbʼil qʼij› te kykawbʼil xjal (2 Timoteo 3:1).