IN QO TXOKINE KYIʼJ XJAL TUʼN TTZAJ KYNAʼN TKYIMLEN JESÚS
Kbʼel tnajsaʼn Jesús qʼoj
Tej tten Jesús tzalu twitz Txʼotxʼ, kubʼ tyekʼin tkʼujlabʼil kyiʼj xjal, tej t-xi tqʼoʼn tchwinqlal te chojbʼil (Mateo 20:28; Juan 15:13). Chʼix tpon ambʼil tuʼn tkubʼ tyekʼin juntl maj tkʼujlabʼil kyiʼj xjal, ok kbʼantel jlu tuʼn aj tajbʼen toklen te aj kawil toj Tkawbʼil Dios tuʼn tweʼ «tkyaqil qʼoj tuʼn tuʼj tkyaqil twitz txʼotxʼ» (Salmo 46:9).
Ojtzqinka tiʼ in tzaj tqʼamaʼn Biblia tiʼjju kbʼantel tuʼn Jesús:
«Porke a kkolol kyiʼj qe mebʼa in che kubʼsan twitz ex kyiʼj qeju in che yajlanjtz ex mintiʼ jun onil kye. Ktzajel tzʼeʼy tkʼuʼj kyiʼj qe xjal mans, ex che kletel qe xjal mebʼa tuʼn. Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal, ex maʼ t-xilen kychwinqlal tuj twitz» (Salmo 72:12-14).
¿Tzeʼn jaku txi qqʼoʼn chjonte tiʼj tkyaqilju o bʼant tuʼn Jesús ex tiʼjju kbʼantel tuʼn? Toj Lucas 22:19, tqʼama Jesús kye t-xnaqʼtzbʼen tuʼn ttzaj kynaʼn tkyimlen. Tuʼntzunju, tkyaqil abʼqʼi in nok kychmoʼn kyibʼ testigo de Jehová tuʼn ttzaj kynaʼn tkyimlen. In qo txokine tiʼja tuʼn tok tchmon tibʼa qukʼile tuʼn ttzaj qnaʼn tkyimlen Jesús toj domingo 24 te marzo te 2024.