IN QO TXOKINE KYIʼJ XJAL TUʼN TTZAJ KYNAʼN TKYIMLEN JESÚS
Kʼelel tiʼn Jesús weʼyaj
Tej tten Jesús tzalu twitz Txʼotxʼ, kubʼ tyekʼin nim tkʼujlabʼil kyiʼj xjal, pero mas kyiʼj xjal mebʼa ex kyiʼj qeju in tzaj bʼaj kykʼuʼj (Mateo 9:36). Ax ikx kyim noq tuʼn kyklet nimku xjal (Mateo 20:28; Juan 15:13). Chʼix tpon ambʼil tuʼn tkubʼ tyekʼin juntl maj tkʼujlabʼil kyiʼj xjal aj tajbʼen toklen te Rey toj Tkawbʼil Dios tuʼn tel tiʼn weʼyaj tzalu twitz Txʼotxʼ.
In tzaj tqʼamaʼn Biblia toj tbʼanel yol aju kbʼantel tuʼn Jesús:
«Tuj tumelxix kxel tbʼinchan rey kyiʼj qe mebʼa, ex che kletel tuʼn qe xjal mintiʼ at kye» (Salmo 72:4).
¿Tzeʼn jaku txi qqʼoʼn chjonte tiʼjju o bʼant tuʼn Jesús ex tiʼjju kbʼantel tuʼn? Kyoj qe yol tkuʼx toj Lucas 22:19, tqʼama Jesús kye t-xnaqʼtzbʼen tuʼn ttzaj kynaʼn tkyimlen. Tuʼntzunju tkyaqil abʼqʼi, in nok kychmon kyibʼ testigo de Jehová tuʼn ttzaj kynaʼn jlu. In qo txokine tiʼja tuʼn ttena qukʼile tuʼn ttzaj qnaʼn Tkyimlen Jesús toj domingo 24 te marzo te 2024.