In tzaj nim nya bʼaʼn tuʼnju in che sbʼun gobierno ex in bʼaj jlu twitz tkyaqil Txʼotxʼ. a Jun techel, kyoj nimku tnam tzaj kyqʼamaʼn xjal qa kyaj kyiʼn gobierno pwaq tuʼn tajbʼen tiʼj pandemia ex bʼant jlu kyuʼn tuʼn kyok te qʼinun. Tuʼn jlu, tzaj nya bʼaʼn kyiʼj nim xjal ex e kyim tuʼnju mintiʼ xi qʼoʼn qʼanbʼil kye.

 Twitz tkyaqil Txʼotxʼ, in tzaj nim nya bʼaʼn kyiʼj xjal tuʼn sbʼubʼil. Tqʼama David Cameron jlu, aju tnejel exministro te Reino Unido: «In nok sbʼubʼil ik tzeʼn jun matij telaraña ex nimku tnam o che tzyet tuʼn».

 Pero jaku tzʼok qeʼ qkʼuʼj tiʼj qa kbʼel naj sbʼubʼil in bʼant kyuʼn gobierno. ¿Tiquʼn in xi qqʼamaʼn jlu? Qo xnaqʼtzan kyiʼj junjun versículo jatumel in tzaj tqʼamaʼn tiʼ kbʼantel tuʼn Dios.

 In tzaj tqʼamaʼn Biblia jlu: «In tzalaj Qman tuʼn tbʼinchet aju tzʼaqlxix ex ikʼun tuʼn aju elqʼaʼmj ex ju bʼyoj xjal» (Isaías 61:8). b Ojtzqiʼn tuʼn Dios aj kyikʼ xjal toj yajbʼil tuʼnju in che sbʼun txqantl (Proverbios 14:31). In tzaj ttziyen jlu: «Aqine chin jawil weʼ ex che kletel wuʼne qe xjal in che bʼaj yajlaʼn» (Salmo 12:5).

 ¿Tiʼ kbʼantel tuʼn Dios? Mlay tzʼok ten Dios ximel tiʼj alkyeqe xjal jaku bʼant kykawin kyxol qeju ateʼ, sino kʼokel tqʼoʼn Tkawbʼil te kyxel kykyaqil. Atz taʼ Tkawbʼil Dios toj kyaʼj (Marcos 1:14, 15; Mateo 6:10). In tzaj tqʼamaʼn Tyol Dios jlu: «Ate Dios aju at tuj kyaʼj kbʼel tqʼoʼn jun kawbʼil mlay naj ex [...] che bʼel bʼaj kykyaqil txqantl kawbʼil tuʼn, atzunte kukx ktel te jumajx» (Daniel 2:44). Iktzun tten kbʼel tnajsaʼn Dios sbʼubʼil at toj ambʼil jaʼlo.

 ¿Tzeʼn ojtzqiʼn quʼn qa mlay ten sbʼubʼil toj Tkawbʼil Dios? Ximana tiʼj jlu:

1.  1. Aju ipumalj. ¿Jatumel ktzajel tipumal Tkawbʼil Dios? Atz tzul tukʼil Dios (Apocalipsis 11:15).

    ¿Tiquʼn nim toklen jlu? Tuʼn tbʼant kyaqʼun gobierno tzalu twitz Txʼotxʼ, in najbʼen kypwaq xjal kyuʼn. Ex tuʼn jlu, mas in tzaj tqʼoʼn ambʼil kye tuʼn kysbʼun, tuʼn kyelqʼan ex tuʼn tbʼaj kyyajin txqantl. Atzunte Tkawbʼil Dios, kukx kʼonil Jehová tiʼj, tuʼntzunju kukx tzul tqʼoʼn tkyaqilju at tajbʼen kye xjal (Salmo 145:16).

2.  2. Aju aj kawil. O txi tqʼoʼn Dios toklen Jesús tuʼn tkawin toj Tkawbʼil (Daniel 7:13, 14).

    ¿Tiquʼn nim toklen jlu? Maske in nok tilil kyuʼn gobierno tuʼn kyok te tbʼanel xjal, jaku kubʼ kyiʼj kyuʼn qeju ateʼ kytxlaj (Eclesiastés 7:20). Atzunte Jesús, o kubʼ tyekʼin qa ni jun jaku sbʼun tiʼj (Mateo 4:8-11). Ex tkyaqilju in bʼant tuʼn kyiʼj xjal, in xi tbʼinchaʼn tuʼnju kʼujlaʼn qe tuʼn ex in ximen kyiʼj (Salmo 72:12-14).

3.  3. Aqeju ley. Tzʼaqli qe tley Tkawbʼil Dios ex in che tzalaj xjal aj in xi kybʼiʼn (Salmo 19:7, 8).

    ¿Tiquʼn nim toklen jlu? Kwest qe ley in kubʼ kyqʼoʼn xjal ex kwest tuʼn tjapun quʼn, axpe ikx, kwest tuʼn tjapun kyuʼn gobierno. Tuʼn jlu in chʼiy mas sbʼubʼil. Atzun qe tley Dios, puro tbʼanel qe ex in che onin qiʼj (Isaías 48:17, 18). Aqeju ley lu, nya oʼkx at kyoklen tukʼilju in bʼant kyuʼn xjal, sino at toklen tukʼilju tiquʼn in xi kybʼinchaʼn (Mateo 22:37, 39). Ojtzqiʼn tuʼn Dios tiʼ tkuʼx toj kyanmi xjal, tuʼntzunju, in tzaj qʼaqʼin tkʼuʼj kyiʼj aj tok tilil kyuʼn tuʼn t-xi kybʼiʼn qe tley (Jeremías 17:10).

 In qo txokine tiʼja tuʼn tok tojtzqiʼna aju in tzaj tqʼamaʼn Tyol Dios tiʼjju aj tok Txʼotxʼ te tbʼanel jatumel ya mlay ten sbʼubʼil.

•   Tuʼn tel tnikʼa tiʼj oxe tiquʼn qʼuqli qkʼuʼj tiʼj qa mlay ten sbʼubʼil toj Tkawbʼil Dios, bʼaʼn tuʼn tjaw tuʼjina xnaqʼtzbʼil tok tbʼi: «Aju Tkawbʼil Dios Jun kawbʼil mintiʼ sbʼubʼil toj».

•   Tuʼn tel mas tnikʼa tiʼj Tkawbʼil Dios ex tiʼjju kbʼantel tuʼn tzalu twitz Txʼotxʼ, qʼonka twitza tiʼj video «¿Tiʼ aju Tkawbʼil Dios?».

•  Ojtzqinka tzeʼn in xi qqʼoʼne xnaqʼtzbʼil tiʼj Tyol Dios ex ojtzqinka tzeʼn jaku che onin ttziybʼil Dios tiʼja.