¿Atpe ttxolil qa ma kubʼ qximen qa kxel sipen aju at tajb’en kye xjal toj tumel toj ambʼil tzul?
Twitz tkyaqil Txʼotxʼ, in che etz xjal protestaril kyoj bʼe tuʼnju in kubʼ kyximen qa ateʼ xjal at nim kypwaq ex junjuntl mintiʼ. Mas ma tzaj kyqʼoj xjal tuʼn pandemia COVID-19. Ax ikx tuʼnju ya mintiʼ xi qʼoʼn ambʼil kye tuʼn kyetz kyja, tuʼnju mintiʼxix kypwaq ex tuʼnju mintiʼxix qʼanbʼil kyuʼn aj kawil, tuʼn jlu mas o tzʼel toj qʼanchaʼl qa junxitl kychwinqlal qʼinun kywitz qeju mintiʼxix at kye.
¿Kpolpe jun qʼij jatumel kbʼel naj mebʼayil, aju in tzaj tiʼn nya bʼaʼn toj tkyaqil lugar? Kpol. In tzaj tqʼamaʼn Biblia tiʼ kbʼantel tuʼn Dios tuʼn tkyaj nya bʼaʼn lu toj ttxolil.
Aqeju nya bʼaʼn in tzaj tuʼn pwaq, kjel toj ttxolil tuʼn Dios
Aju nya bʼaʼn: Mintiʼ o kanet jun ttxolil kyuʼn xjal tuʼn t-xi sipet toj tumel aju at tajbʼen kye kykyaqil.
Aju kbʼantel: Kʼelel tiʼn Dios kygobierno xjal ex a te tgobierno kjel tqʼoʼn te kyxel, aju tok tbʼi te Tkawbʼil Dios. Kkawil tgobierno Dios lu tzmax toj kyaʼj tibʼaj tkyaqil twitz Txʼotxʼ (Daniel 2:44; Mateo 6:10).
Aju tbʼanel tzul: Tuʼnju kykyawil tgobierno Dios tibʼaj tkyaqil Txʼotxʼ, kxel tbʼinchaʼn kyiʼj tiʼchaq toj tumel. Tuʼn jlu, ya mlay tzajtl mebʼayil moqa prowil kyiʼj xjal ex ya mlay tzaj bʼaj kykʼuʼj tiʼj jatumel kytzajel kypwaq (Salmo 9:7-9, 18). Junxitl kbʼajel tjaqʼ kawbʼil lu, ok che tzalajel xjal tiʼj kyaqʼun, tiʼj kyanqʼibʼil ex che tzalajel kyukʼil toj kyja. In tzaj tziyen jlu toj Biblia: «Kyjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz. Ok tjaw tbʼinchaʼn jun xjal jun ja, mlay bʼant tuʼn tpon junxitl najal tuj, ex ok tkuʼx tawal xjal, mlay bʼant junxitl tuʼn twaʼn tiʼj» (Isaías 65:21, 22).
Aju nya bʼaʼn: Mlay bʼant tuʼn tel kyiʼn xjal junjun nya bʼaʼn in che ok weʼ twitz aju in tzaj tiʼn yajbʼil kyiʼj ex mintiʼ in nonin tuʼn kyanqʼin toj tzalajbʼil.
Aju kbʼantel: Kʼajbʼel Tkawbʼil Dios tuʼn tuʼn tel tiʼn tkyaqil aju in che tzaj xobʼ xjal tuʼn ex aju mintiʼ in tzaj tqʼoʼn qʼuqbʼil kykʼuʼj.
Aju tbʼanel tzul: Ya mlay txi tqʼoʼn Dios ambʼil tuʼn kytzaj nya bʼaʼn ex iktzun tten ktel aju at tajbʼen kye xjal ex kye toj kyja tuʼn kyanqʼin. Jun techel, ya miʼn ten qʼoj, ya miʼn ten weʼyaj ex yabʼil (Salmo 46:9; 72:16; Isaías 33:24). In tzaj tqʼamaʼn Dios jlu: «Qe xjal etzan tuʼn Dios che tel tuj txubʼtxaj, ex che najal kyuj qe ja segurxix te ojlabʼl» (Isaías 32:18).
Aju nya bʼaʼn: Chʼixme tkyaqil maj, aʼyeju xjal oʼkx in che ximen kyiʼjx ex kyaj tuʼn tten nim tiʼchaq kye in che sbʼun kyiʼj txqantl.
Aju kbʼantel: Aʼyeju che anqʼil tjaqʼ Tkawbʼil Dios ok che ximel kyiʼj txqantl ex nya oʼkx kyiʼjx (Mateo 22:37-39).
Aju tbʼanel tzul: Aj tkawin Tkawbʼil Dios twitz Txʼotxʼ, kykyaqil kʼelel kykanoʼn tiʼj Dios tuʼnju «mya noq oʼkx tiʼjx tok tkʼuʼj» (1 Corintios 13:4, 5). In tzaj tqʼamaʼn Tyol Dios jlu: «Tuj tkyaqil twi witz xjan aju etzan tuʼn Qman [Jehová] a, mintiʼ jun kbʼinchal jun mya bʼaʼn tiʼj juntl, porke ik tzaʼn aʼ in noj mar tuʼn, ax ikxtzun kykyaqil xjal twitz txʼotxʼ kʼelel kynikʼ tiʼj Qman.» (Isaías 11:9).
In tzaj tqʼamaʼn Biblia qa in qo anqʼin toj mankbʼil tqʼijlalil twitz Txʼotxʼ lu ex qa chʼix tpon ambʼil tuʼn tjapun twi ttziybʼil Dios tuʼn tkubʼ naj mebʼayil (Salmo 12:5). b Akux in pon ambʼil lu, aʼyeju nabʼil tkuʼx toj Biblia jaku che onin qiʼj tuʼn qex twitz mebʼayil toj ambʼil jaʼlo. Jun techel, qʼonka twitza kyiʼj xnaqʼtzbʼil, «¿Tzeʼn jaku qo anqʼin tukʼil nya nim tiʼchaq?» ex «Una opinión realista del dinero».
a In tzaj tqʼamaʼn Biblia qa Jehová tbʼi Dios (Salmo 83:18).
b Tuʼn tel tnikʼa tiʼj tiquʼn jaku tzʼok qeʼ qkʼuʼj tiʼj Biblia, jaku tzʼok tqʼoʼna twitza tiʼj xnaqʼtzbʼil «Tkuʼx axix tok toj Tyol Dios».
Bʼalo ax ikx tgana jlu
AJU XQʼUQIL
¿Tiʼ kbʼantel tuʼn Tkawbʼil Dios?
Ojtzqiʼntoq tuʼn Jesús qa oʼkx Tkawbʼil Dios kxel bʼinchante tiʼj tkyaqil nya bʼaʼn at twitz Txʼotxʼ. ¿Tiʼ o bʼant tuʼn Kawbʼil lu tuʼntzun tok qeʼ qkʼuʼj tiʼj?
