Nim xjal Twitz tkyaqil Txʼotxʼ in kubʼ kyximen tuʼn miʼn t-xi kychyoʼn kychibʼjal txkup.

•    «Aju kyximbʼetz ex kyxnaqʼtzbʼil xjal tiʼj tuʼn miʼn t-xi kychyoʼn kychibʼjal txkup, atz in yolin tiʼj tuʼn miʼn kykubʼ bʼyoʼn te chibʼj moqa te xbʼalun qa jaku bʼant ikju» (chi The Vegan Society).

 Ateʼ nim xjal mintiʼ in kubʼ kybʼyoʼn txkup nya oʼkx tuʼnju at kykʼujlabʼil kyiʼj, sino ax ikx tuʼnju kyaj tuʼn tok kyxqʼuqin twitz Txʼotxʼ, tuʼnju ik in tzaj tqʼamaʼn kyokslabʼil moqa tuʼnju nya kyaj tuʼn ttzaj kyyabʼ.

•    «Aju tuʼn miʼn t-xi kychyoʼn xjal kychibʼjal txkup, junxitl chʼin twitzju aj ttzaj qʼamaʼn tuʼn miʼn txi qwaʼn junjun wabʼj tuʼnju at toklen jlu tukʼil jun kyxnaqʼtzbʼil xjal, tukʼil tuʼn tkubʼ bʼinchet jun bʼaʼn ex tukʼil tuʼn tonin teyele junjun qe tuʼntzun tchʼixpet twitz Txʼotxʼ» (chi Britannica Academic).

 ¿Kʼonilpe aju in bʼant kyuʼn xjal tuʼn miʼn t-xi kychyoʼn tchibʼjil txkup tuʼn tok twitz Txʼotxʼ te mas tbʼanel? ¿Tiʼ in tzaj tqʼamaʼn Tyol Dios tiʼj jlu?

 In tzaj tqʼamaʼn Biblia qa e kubʼ tbʼinchaʼn Qman Jehová qe xjal mas nim kyoklen kywitz txkup. a Ax ikx in tzaj qʼamaʼn qa tej tkubʼ bʼinchaʼn tnejel xjal xi qʼoʼn toklen tuʼn tkawin kyibʼaj txkup (Génesis 1:27, 28). Tej tbʼet ambʼil, xi tqʼoʼn Dios ambʼil kye xjal tuʼn t-xi kychyoʼn kychibʼjal txkup (Génesis 9:3). Pero nya a t-xilen jlu qa jaku tzʼok qbʼinchaʼn nya bʼaʼn kyiʼj txkup (Proverbios 12:10).

 In tzaj tyekʼin Biblia qa teyele te junjun kbʼel t-ximen qa kxel tchyoʼn chibʼj moqa miʼn. b Nya tuʼnju qa ma txi qchyoʼn chibʼj moqa mintiʼ, qo okel te mas tbʼanel xjal toj twitz Dios (1 Corintios 8:8). Qa ma kubʼ kyximen txqantl tuʼn t-xi kychyoʼn kychibʼjal txkup moqa miʼn, mintiʼ tuʼn qyolin nya bʼaʼn kyiʼj (Romanos 14:3).

 In tzaj t-xnaqʼtzaʼn Tyol Dios qa mlay chʼixpet twitz Txʼotxʼ noq oʼkx tuʼn jun tten kyanqʼibʼil xjal. Chʼixmi tkyaqil nya bʼaʼn at tuʼnju nya bʼaʼn tten kykawbʼil xjal, tuʼnju nya bʼaʼn tten kyanqʼibʼil, tuʼnju mintiʼxix kypwaq moqa kymedi ex mi aʼlx jun xjal jaku chʼexpunte tkyaqil jlu. In tzaj tqʼamaʼn Biblia jlu:

•    «Aju ẍoʼk tiʼj, mlay bʼant tjiqumanjtz tiʼj» (Eclesiastés 1:15).

 Oʼkx te aju Bʼinchal tkyaqil, jaku t-xi tbʼinchaʼn tiʼj tkyaqil nya bʼaʼn. Aj tyolin Biblia tiʼj alkye tten kbʼantel chʼixpubʼil lu tuʼn Dios, in najbʼen junjun techel tuʼn.

•    «Tbʼajlenxi jlu o wile jun akʼaj kyaʼj ex jun akʼaj txʼotxʼ; porke aju tnejel kyaʼj ex ju tnejel txʼotxʼ otoq che kubʼ naj, ex mintiʼtl mar» (Apocalipsis 21:1).

 Kbʼel tchʼixpuʼn Dios «aju tnejel kyaʼj», toj juntl yol, aju kykawbʼil xjal, ex kbʼel tqʼoʼn «jun akʼaj kyaʼj», toj juntl yol, kbʼel tqʼoʼn Tkawbʼil at toj kyaʼj. Aju kawbʼil lu, kbʼel tnajsaʼn aju «tnejel txʼotxʼ», toj juntl yol, aqe nya bʼaʼn xjal. Ex kkawil tibʼaj «jun akʼaj txʼotxʼ», toj juntl yol, kkawil kyibʼaj qe xjal kʼokex kyqʼon kyibʼ tjaqʼ Tkawbʼil.

 Oʼkx ktel tbʼanel qxol kyukʼil txkup ex ktel tbʼanel twitz Txʼotxʼ tzmaxi aj ttzaj Tkawbʼil Dios (Isaías 11:6-9).