Toj lunes 10 te octubre te 2022 te prim, kuʼtz kyxoʼn soldad te Rusia qe bomba tibʼaj junjun tnam te Ucrania. Bʼaj jlu tuʼnju otoq tzikʼ kabʼe qʼij tel-len poqʼchaj jun bomba kyuʼn soldad te Ucrania toj jun puente at kyxol tnam Crimea ex Rusia.

•   Toj 6 te octubre te 2022 tqʼama Joe Biden jlu, presidente te Estados Unidos: «Kubʼ kyximen xjal qa kxeltoq tzyet Armagedón tej kykyaj qʼoʼn bomba toj tnam Cuba ex toj tqʼijlalil John Kennedy, jun presidente te Estados Unidos. Pero mas nqayin taʼ toj ambʼil jaʼlo. Qa ma che ajbʼen bomba nuclear, segur kxel tzyet Armagedón».

•   Etz tqʼamaʼn BBC News toj 8 te octubre te 2022, qa xi qanin te presidente te Ucrania Volodímir Zelenski tiʼtoq t-ximbʼetz tiʼjju jaku bʼaj kyuʼn bomba nuclear ex xi ttzaqʼweʼn jlu: «Ax nximbʼetze tiʼj qa atzun Armagedón jlu, tuʼnju jaku kubʼ xitj tkyaqil twitz Txʼotxʼ».

 Mlay. Oʼkx jun maj in kanet yol «Armagedón» quʼn toj Biblia ex atz tkuʼx toj Apocalipsis 16:16. Ex mintiʼ in yolin texto lu tiʼj qʼoj in nok kyxol tnam, sino atz in yolin tiʼj qʼoj kʼokel tuʼn Dios ex qe «rey tuj tkyaqil twitz txʼotxʼ» (Apocalipsis 16:14). Ax ikx, kbʼel tnajsaʼn Dios kykyaqil kykawbʼil xjal toj Armagedón (Daniel 2:44).

 Qa taja tuʼn tel mas tnikʼa tiʼjju kbʼajel tiʼj Txʼotxʼ toj Armagedón, qʼonka twitza tiʼj xnaqʼtzbʼil «¿Tiʼ aju Armagedón?»

 Mlay. Jakulo che ajbʼen bomba nuclear kyuʼn xjal toj ambʼil tzul, pero mlay txi tqʼoʼn Dios ambʼil tuʼn tkubʼ xitj Txʼotxʼ. In tzaj tqʼamaʼn Tyol Dios jlu:

•   «Atzunte txʼotxʼ mintiʼ in chʼexpaj» (Eclesiastés 1:4).

•   «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).

 Noqtzun tuʼnj, aju in bʼaj toj ambʼil jaʼlo ex aju in tzaj kyqʼamaʼn profecía tkuʼx toj Biblia, in tzaj tyekʼin qe qa in qo anqʼin toj jun ambʼil nimxix toklen (Mateo 24:3-7; 2 Timoteo 3:1-5). Ojtzqiʼnka tiʼ in tzaj tqʼamaʼn Tyol Dios tiʼj ambʼil tzul aj t-xnaqʼtzana tiʼj Tyol Dios qukʼile noq kukx.