¡KUKX QO XQʼUQIN!
In jax kywiʼ qe tiʼchaq tuʼn qʼoj in nok Ucrania
Toj 19 te mayo te 2022, toj jun chmabʼil ok tuʼn Consejo de Seguridad te ONU, jatumel e ten mas te 75 oficial nim kyoklen, tzaj qʼamaʼn qa mas mintiʼ wabʼj ktel twitz tkyaqil Txʼotxʼ tuʼnju in nok qʼoj toj tnam Ucrania. Noqtzun tuʼnj, ya otoq tzaj tzyet waʼyij tuʼn tpaj COVID-19 ex tuʼnju in chʼexpaj clima. Tej tikʼ chʼintl ambʼil, etz qʼamaʼn toj revista The Economist qa ya ma cheʼx tiʼchaq toj il tuʼn qʼoj in nok toj tnam Ucrania ex qa tuʼn jlu tzul mas waʼyij. Kyaj tqʼamaʼn Tyol Dios qa tuʼn ttzaj waʼyij toj ambʼil jaʼlo, pero ax ikx in tzaj tqʼoʼn junjun consej qe ex in tzaj tqʼoʼn jun qʼuqbʼil qkʼuʼj tiʼj ambʼil tzul.
Kyaj tqʼamaʼn Tyol Dios qa tuʼn ttzaj waʼyij
Kyaj tqʼamaʼn Jesús jlu: «Qe xjal tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam; ex noq jachaq tzul [...] weʼyaj» (Mateo 24:7).
In yolin uʼj te Apocalipsis kyiʼj kyaje xjal kyjax kyibʼaj chej. Jun kyxol qe jlu, in kubʼ techlaʼn qʼoj, atzun juntl, in kubʼ techlaʼn waʼyij. In yolin profecía lu tiʼj jun ambʼil jatumel mlay kanin wabʼj ex tuʼn tjax kywiʼ qe tiʼchaq. In tzaj tqʼamaʼn Apocalipsis 6:5 ex 6 jlu: «Ex o wile, lu jun chej qʼeq tiʼj. Ex aju tjax tibʼaj chej, tzyuʼn jun balans tuʼn. Ex xi nbʼiʼne jun tqʼajqʼajel kyxol qe kyaje querubín in tmaʼn: Kabʼ libr triw tuʼn jun denari pwaq, ex qaq libr sebad tuʼn jun denari pwaq».
In japun kywiʼ profecía lu toj ambʼil jaʼlo ex in nok tqʼoʼn Tyol Dios tbʼi te «mankbʼil tqʼijlalil» (2 Timoteo 3:1). Qa taja tuʼn tel mas tnikʼa kyiʼj mankbʼil tqʼijlalil moqa bʼajsbʼil tqʼijlalil ex kyiʼj xjal kyjax kybʼaj chej in yolin Apocalipsis tiʼj, jaku tzʼok tkeʼyina video Chʼexpaj tkyaqil toj abʼqʼi 1914. Ax ikx, jaku jaw tuʼjina xnaqʼtzbʼil tok tbʼi «Alkyeqe kyaje xjal in che chejin».
¿Tzeʼn in nonin Tyol Dios qiʼj?
In nonin Tyol Dios qiʼj tuʼn qex kywitz ambʼil kwest ex in tzaj tqʼoʼn consej qe tiʼjju jaku bʼant quʼn, ik tzeʼn aj tjax kywiʼ qe tiʼchaq ex qa mintiʼxix wabʼj. Jaku jaw tuʼjina junjun toj xnaqʼtzbʼil «¿Tzeʼn jaku qo anqʼin tukʼil nya nim tiʼchaq?».
Ax ikx in tzaj tqʼoʼn Tyol Dios qʼuqbʼil qkʼuʼj aj ttzaj tqʼamaʼn qa mas tbʼanel che okel tiʼchaq toj ambʼil tzul. In tzaj ttziyen Dios qa kpol ambʼil jatumel ktel «nim triw» moqa wabʼj twitz Txʼotxʼ (Salmo 72:16). Tuʼn tel mas tnikʼa kyiʼj tbʼanel ttziybʼil Dios ex tiquʼn jaku tzʼok qeʼ tkʼuʼja kyiʼj, jaku jaw tuʼjina xnaqʼtzbʼil «La esperanza real de un mañana mejor».