Aju pwaq moqa medi kubʼaj tuʼn tok qʼoj kyxol tnam toj 2022, japun te 2,24 billón dólar te Estados Unidos. Ex mas aju pwaq bʼaj tiʼj qʼoj in nok toj Ucrania tuʼn Rusia, chi jun tqanil toj 2023 aju etz tuʼn jun instituto SIPRI techel toj kastiy (Stockholm International Peace Research Institute [Institución tuʼn Estocolmo kyoj nim tnam tuʼn t-xnaqʼtzet tzeʼn tuʼn tten Mujbʼabʼil]). Ex tqʼama jlu tiʼj abʼqʼi 2022:

•   Kukx in xi qʼoʼn dólar tuʼn tkubʼ gastarin tiʼj qʼoj atz Europa, «pero toj abʼqʼi lu, xi qʼoʼn mas dólar tuʼnju xi qʼoʼntl 13 dólar tiʼj jun syent twitzju in xi qʼoʼn junjuntl maj. Mas nim pwaq kubʼaj toj abʼqʼi lu twitz tkyaqil pwaq kubʼaj tej tok qʼoj Guerra Fría tbʼi».

•   «Atzunte Rusia... chitzun qa japun tajlal pwaq xi tqʼoʼn tuʼn tok qʼoj te 9,2 [dólar] tiʼj jun syent. Atztoq taʼ toj tjweʼyin lugar kyxol qeju tnam mas in xi kyqʼoʼn pwaq, pero jaʼlo ya o kyaj toj toxin lugar».

•   Kyxol qeju aj kawil mas in xi kyqʼoʼn pwaq tiʼj qʼoj twitz tkyaqil Txʼotxʼ, kukx a Estados Unidos at toj tnejel lugar tuʼnju «in xi tqʼoʼn 39 [dólar] tiʼj jun syent».

 «Mas jaku tzaj nya bʼaʼn qiʼj jaʼlo tuʼnju mas nim pwaq in xi qʼoʼn tiʼj qʼoj toj ambʼil jaʼlo», chi doctor Nan Tian tbʼi, aju onin tuʼn tetz tqanil tuʼn SIPRI.

 Kyaj tqʼamaʼn Tyol Dios qa mastoq kʼokel qʼoj toj ambʼil jaʼlo kyxol nimaq aj kawil twitz tkyaqil Txʼotxʼ, pero ax ikx in tzaj tqʼamaʼn alkye tzul qʼinte axix tok mujbʼabʼil kyxol tnam.

•   In tzaj tqʼamaʼn Tyol Dios qa in qo anqʼin toj «bʼajsbʼil tqʼijlalil» (Daniel 8:19).

•   Kyaj qʼamaʼn toj uʼj te Daniel qa toj ambʼil lu ok che qʼojil nimaq kawbʼil. Qa «kʼokel tzoqpaj» jun tiʼj juntl tuʼntzun tkambʼet aju in che qʼojin tiʼj. Ex qa ax ikx kbʼel bʼaj «nimku qʼinumabʼl» tiʼj qʼoj, toj juntl yol, kʼokel qʼoʼn nim pwaq tiʼj (Daniel 11:40, 42, 43).

 Qa taja tuʼn tel chʼintl tnikʼa tiʼj profecía lu, jaku tzʼok tqʼoʼna twitza tiʼj video In japun twi profecía in tzaj qʼamaʼn toj Daniel 11.

•   In tzaj tqʼamaʼn Tyol Dios qa kʼelel tiʼn Dios kykawbʼil xjal ex qa «kbʼel tqʼoʼn jun kawbʼil mlay naj ex mlay kubʼ tiʼj tuʼn juntl nasyon, noq oʼkx che bʼel bʼaj kykyaqil txqantl kawbʼil tuʼn, atzunte kukx ktel te jumajx» (Daniel 2:44).

•   Mintiʼ in bʼant tuʼn ttzaj kyiʼn xjal mujbʼabʼil kyxolx tuʼn kykawbʼil ex qatzun in tzaj kyiʼn, noq toj chʼin ambʼil in ten. Atzunte Jehová, a tzul tiʼn mujbʼabʼil kyxol xjal ex te jumajx. ¿Alkye tten kbʼantel tuʼn Qman Jehová? Kʼajbʼel Tkawbʼil moqa T-gobierno tuʼn, aju at toj kyaʼj, tuʼntzun tkubʼ tnajsaʼn ky-arma xjal ex tuʼntzun tel tiʼn bʼiybʼil (Salmo 46:8,9).

 Qa taja tuʼn tel chʼintl tnikʼa tiʼj tiʼ mastl kbʼantel tuʼn T-gobierno Dios, jyonxa xnaqʼtzbʼil «Ktel axix tok mujbʼabʼil tuʼn Tkawbʼil Dios».