In tzaj kyqʼamaʼn nim xjal qa ya mintiʼ kyajbʼen nabʼil tkuʼx toj Tyol Dios tiʼj yaẍbʼil ex tiʼj mejebʼleʼn, axpe ikx qeju in tzaj kyqʼamaʼn qa okslal qe. Tuʼnju in chʼexpaj ambʼil, o bʼaj kychʼexpuʼn iglesia junjun xnaqʼtzbʼil ex ya mintiʼ in xi kyyekʼin kye xjal alkye bʼaʼn ex alkye nya bʼaʼn ik tzeʼn in bʼanttoq kyuʼn ojtxe. Aj tok qkeʼyin jlu, ¿jakupe kubʼ qximen qa ya mintiʼ kyajbʼen nabʼil tkuʼx toj Biblia? Mlay. Qo xnaqʼtzan tiʼj tiquʼn kukx at kyajbʼen.

 Tuʼn tel qnikʼ tiʼj alkye bʼaʼn ex alkye nya bʼaʼn, nim toklen tuʼn ttzaj tyekʼin Dios qbʼe. Nim toklen jlu tuʼnju in tzaj tqʼamaʼn Biblia jlu: «Mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (Jeremías 10:23). Tzaj tqʼoʼn Jehová ambʼil qe tuʼn tkubʼ qximen tiʼ qaj tuʼn tbʼant quʼn, pero mintiʼ tzaj tqʼoʼn qoklen nix qipumal tuʼn tkubʼ qximen alkye bʼaʼn ex alkye nya bʼaʼn. a Tuʼntzunju, taj Dios tuʼn tok qeʼ qkʼuʼj tiʼj (Proverbios 3:5).

 Atz in che kanet tkawbʼil Dios quʼn toj Biblia. Qo xnaqʼtzan tiʼj kabʼe tiquʼn nim kyoklen:

•   A Dios kubʼ bʼinchante qe (Salmo 100:3). Ojtzqiʼn tuʼn tiʼ jaku tzʼonin qiʼj tuʼn qtzalaj ex tuʼn miʼn ttzaj yabʼil tiʼj qxmilal, tiʼj qximbʼetz ex tiʼj qnabʼil. Ex ojtzqiʼn tuʼn tiʼ jaku bʼaj qiʼj qa mintiʼ ma txi qbʼiʼn tyol (Gálatas 6:7). Nya taj Jehová tuʼn ttzaj qbʼis. Tuʼntzunju in tzaj tqʼamaʼn Biblia jlu: «Aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne» (Isaías 48:17).

•   Jaku qo kubʼ sbʼuʼn tuʼn qanmi. In kubʼ kyximen nim xjal qa jaku tzʼel kynikʼ tiʼj alkye bʼaʼn ex alkye nya bʼaʼn qa ma che ok lepeʼ tiʼjju in tzaj tqʼamaʼn kyanmi. Pero in tzaj tqʼamaʼn Tyol Dios qa «puro sbʼul kyanmi xjal twitz tkyaqil tiʼxti ex jumajx mya bʼaʼn» (Jeremías 17:9). Qa ma qo ok lepeʼ tiʼjju in tzaj tqʼamaʼn qanmi, jaku kubʼ qbʼinchaʼn jun tiʼ ex jaku tzaj qbʼis tuʼn yajxitl (Proverbios 28:26; Eclesiastés 10:2).

 In tzaj tqʼamaʼn Biblia alkye axix tok tiʼj Dios ex tiʼ tuʼn tbʼant quʼn (1 Corintios 6:9-11; Gálatas 5:19-23). Ex taj Dios tuʼn tel kynikʼ xjal tiʼjju axix tok (1 Timoteo 2:3, 4). Tuʼntzunju, il tiʼj tuʼn kyok lepeʼ okslal tiʼjju in tzaj tqʼamaʼn Biblia (Tito 1:7-9).

 Ateʼ nim xjal nya kyaj tuʼn kyok lepeʼ tiʼjju in tzaj tqʼamaʼn Biblia, tuʼntzunju in xi kyjyoʼn jun okslabʼil jatumel in tzaj qʼoʼn «xnaqʼtzal kye ik tzaʼnx ju kyex kyajbʼil» (2 Timoteo 4:3). Pero in tzaj tqʼamaʼn Biblia jlu: «Ay bʼekʼbʼil kywitze aqeye xjal nnoʼk kyqʼoʼne te bʼaʼn aju mya bʼaʼn, ex nnoʼk kyqʼoʼne te mya bʼaʼn aju bʼaʼn» (Isaías 5:20). Kxel kyqʼoʼn nejenel kye okslabʼil tajlal te Dios qa mintiʼ in che onin kyiʼj xjal tuʼn tel kynikʼ tiʼj alkye bʼaʼn ex alkye nya bʼaʼn.

 Miʼn. Kykyaqil qeju kyaj tuʼn t-xi kybʼinchaʼn tajbʼil Dios, in che ok lepeʼ tiʼj Jesús ex tiʼjju kyaj t-xnaqʼtzaʼn. Ex xi tyekʼin Jesús kye t-xnaqʼtzbʼen tuʼn miʼn kyyolin nya bʼaʼn kyiʼj txqantl, tuʼn kyrespetarin kye ex tuʼn tok kykʼujlaʼn (Mateo 5:43, 44; 7:1).

 Iltoq tiʼj tuʼn t-xi kybʼiʼn t-xnaqʼtzbʼen Jesús qe tkawbʼil Dios toj tkyaqil tten kyanqʼibʼil. Noqtzun tuʼnj, ax ikx iltoq tiʼj tuʼn t-xi kyqʼoʼn ambʼil kye txqantl tuʼn tjaw kyjyoʼn alkye mas bʼaʼn toj kywitz (Mateo 10:14). Mintiʼ xi tqʼamaʼn Jesús kye tuʼn tajbʼen política moqa juntl tiʼ kyuʼn tuʼntzun kyok lepeʼ xjal kyiʼj tkawbʼil Dios (Juan 17:14, 16; 18:36).

 Qa ma txi qbʼiʼn qe consej tkuʼx toj Tyol Dios, in nonin qiʼj toj tkyaqil ambʼil (Salmo 19:8, 11). Kyxol qeju kʼiwlabʼil in tzaj qkʼamoʼn, ateʼ jlu:

•   Mas in qo tzalaj (Proverbios 29:6).

•   In ten jun tbʼanel qamiwbʼil tukʼil Dios (Proverbios 3:32).

•   In nonin Dios qiʼj toj ambʼil kwest (Proverbios 11:8).

•   At qʼuqbʼil qkʼuʼj tuʼn qanqʼin te jumajx (Salmo 37:29).