Ya chʼix tkubʼ naj qe tbʼanel kymod xjal. Ateʼ junjun xjal in che ok ten ilil kyiʼj aj qʼanil maske yabʼ qe. Aʼyeju xjal nya bʼaʼn kymod in che pon wal toj restaurante in che ok ten ilil kyiʼj qe qʼol wabʼj. Ateʼ junjun xjal in che viajarin mibʼan che bʼin, in che ok ten qʼojil kyiʼj qeju in che aqʼunan toj avión. Aʼyeqe kʼwal in kubʼ kybʼinchaʼn nim nya bʼaʼn, in che ok ten xmayil, in che ok ten yasil ex in nok kykʼixbʼisaʼn kyiʼj aj xnaqʼtzal. Ex ateʼ junjun político in nokx kyqʼon kyibʼ toj qʼoj, pero ateʼ junjuntl in nok tilil kyuʼn tuʼn t-xi kyyekʼin kye txqantl qa at tbʼanel kymod.

 In tzaj tqʼoʼn Biblia onbʼil tuʼn tel qnikʼ tiʼj tiʼxix t-xilen tuʼn tten tbʼanel qmod. Ax ikx, in tzaj tqʼamaʼn tiquʼn ya mintiʼxix in kubʼ kyyekʼin xjal tbʼanel kymod toj ambʼil jaʼlo.

 Ya chʼix kykubʼ naj qe tbʼanel kymod xjal tuʼnju ya mintiʼ in kubʼ kybʼinchaʼn aju bʼaʼn, aju tzʼaqlixix ex aju toj tumel ex qʼanchaʼlxix jlu twitz tkyaqil Txʼotxʼ.

•   Toj jun tqanil tzma etz tuʼn Gallup, tqʼama qa aʼyeju xjal najli toj Estados Unidos o tzʼel kynikʼ tiʼj qa mintiʼxix in nok kyqʼoʼn xjal kywiʼ tiʼj alkye bʼaʼn ex alkye nya bʼaʼn ex qa mas o txiʼ jlu toj il toj ambʼil jaʼlo twitz qeju 22 abʼqʼi o che ex.

•   Chi juntl tqanil qa tej t-xi qanin kye 32.000 xjal te 28 junxichaq tnam, junlo 65  por ciento tzaj kyqʼamaʼn qa mas o tzʼok kyqʼoʼn kywitz tiʼj qa ya mintiʼ in kubʼ kyyekʼin xjal tbʼanel kymod.

 In tzaj tqʼamaʼn Biblia qa ik kymod xjal in nok qkeʼyin toj ambʼil jaʼlo.

•    «Tuj mankbʼil tqʼijlalil tzul nim yajbʼil. Ok che ul xjal oʼkx tok kykʼuʼj kyiʼjx, ex oʼkx tok kykʼuʼj tiʼj pwaq, ex in jaw kyniman kyibʼ, ex jawni qe, ex yasul qe, ex mibʼan che niman tyol kyman, ex mintiʼ in kyqʼoʼn chjonte tiʼj ju in kykʼmoʼn [...] mintiʼ kykʼujlalil, ex mintiʼ chʼin kylastmi kyiʼj xjal» (2 Timoteo 3:1-3).

 Qa taja mas tqanil tiʼj alkye tten in che japun qe profecía kyaj tqʼamaʼn Biblia, jaku jaw tuʼjina xnaqʼtzbʼil «¿Kyajpe tqʼamaʼn Tyol Dios tzeʼn kymod xjal tuʼn tten toj ambʼil jaʼlo?»

 Maske in qo anqʼin twitz jun Txʼotxʼ jatumel ya mintiʼ in kubʼ kyyekʼin xjal tbʼanel kymod, nim qe o kanet onbʼil kyuʼn toj Biblia tzeʼn tuʼn kyok te jun tbʼanel xjal. Aqeju nabʼil in tzaj tqʼoʼn jaku tzʼok qeʼ qkʼuʼj kyiʼj, «tuʼnju kukx che tel te jumajx tuj tkyaqil tabʼqʼiyil» (Salmo 111:8). Qkeʼyink junjun techel:

•    Aju in tzaj tqʼamaʼn Tyol Dios: «Tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (Mateo 7:12).

   Aju t-xilen: Qyekʼinx qkʼujlabʼil ex qo nimen kye txqantl ik tzeʼn qajbʼil tuʼn tkubʼ bʼinchaʼn qukʼil.

•    Aju in tzaj tqʼamaʼn Tyol Dios: «Kyqʼonkje aju nikʼaj yol; che yoline axix tok kyukʼil txqantl» (Efesios 4:25).

   Aju t-xilen: Miʼn qo sbʼun aj t-xi qqʼamaʼn jun tiʼ ex aj tkubʼ qbʼinchaʼn.

 Qa taja mas tqanil tiʼjju xnaqʼtzbʼil lu, jaku jaw tuʼjina:

•   Aju uʼj Aju Xqʼuqil tok tbʼi: «Tuʼn qbʼinchante aju bʼaʼn —¿Alkye jaku tzʼonin qiʼj?»

•   Aju xnaqʼtzbʼil «¿Jakupe tzʼonin Tyol Dios qiʼj tuʼn q-respetarin kye txqantl?»