Twitz tkyaqil Txʼotxʼ, ateʼ nim xjal in tzaj kyqʼamaʼn qa in che ok lepeʼ tiʼj Jesucristo pero in nokx kyqʼon kyibʼ toj política. Ateʼ junjun in che onin kyiʼj qeju kyaj tuʼn kyok te aj kawil ex kyiʼj junjun partido político tuʼntzun ttzaj qʼoʼn onbʼil tiʼj kyokslabʼil. Atzun kye partido político ax ikx in bʼant junjun tiʼchaq kyuʼn tuʼntzun kyonin okslabʼil kyiʼj. Ex ateʼ junjuntl nejenel kye okslabʼil in nokx kyqʼon kyibʼ toj política tuʼntzun ttzaj qʼoʼn jun kyoklen tuʼn kyok te aj kawil. Axpe ikx, toj junjun tnam in tzaj qʼamaʼn qa at jun okslabʼil ok tzʼok qʼoʼn toklen kyuʼn aj kawil tuʼnju in tzaj kyqʼamaʼn qa in che ok lepeʼ tiʼj Jesús.

 Yajtzun teya, ¿tiʼ t-xima tiʼj jlu? ¿Bʼaʼnpe tuʼn tokx kyqʼon kyibʼ xjal in che ok lepeʼ tiʼj Jesús toj política? ¿Tiʼ bʼant tuʼn Jesús? Tqʼama jlu: «Porke ma txi nyekʼune kyeye, ik tzaʼn ma nbʼinchaye kyeye, ikxtzun kyeye tuʼn kybʼinchanteye» (Juan 13:15). Qo xnaqʼtzan tiʼj alkye techel kyaj tqʼoʼn Jesús tiʼjju at toklen tukʼil política.

 Mintiʼ. Mintiʼ okx tqʼoʼn tibʼ Jesús toj política.

 Mintiʼ jyon Jesús tiʼj toklen toj política. Tej t-xi tqʼamaʼn Tajaw il te Jesús tuʼn tkawin kyibʼaj «kykyaqil tnam ateʼ twitz txʼotxʼ», el tikʼun Jesús jlu (Mateo 4:8-10). a Toj juntl maj, ax ikx el kynikʼ xjal tiʼj qa jaku tzʼok Jesús te jun tbʼanel aj kawil ex xi kyqʼamaʼn te tuʼn tokx tqʼon tibʼ toj política. «Tejtzun tel tnikʼ Jesús tiʼj otoq kubʼ kyximan tuʼn kytzaj qʼilte te tuʼntzun tok te kyrey, el tpaʼn juntl maj tibʼ kyiʼj xjal, xiʼ twi witz junx te» (Juan 6:15). Mintiʼ kubʼ tbʼinchaʼn Jesús aju kyajtoq xjal; mintiʼ okx tqʼon tibʼ toj política.

 Mintiʼ xi tbʼinchaʼn Jesús aju at toklen tukʼil política. Jun techel, toj ambʼil tej tten Jesús, nyatoq kyaj judiy tuʼn t-xi kychjoʼn impuesto kye aj kawil te Roma. Nya oʼkxju, ax ikx kubʼ kyximen qa nya toj tumel jlu. Tej t-xi kyqʼamaʼn te Jesús tuʼn tonin tiʼj jlu, mintiʼ bʼant tuʼn, oʼkx xi tqʼamaʼn jlu kye: «Kyqʼonxe te gobierni aju te gobierni, ex kyqʼonxe te Dios aju te Dios» (Marcos 12:13-17). Kubʼ tyekʼin Jesús qa mintiʼ onin tiʼjju at toklen tukʼil política. Pero ax ikx xi tqʼamaʼn qa il tiʼj tuʼn t-xi chjet impuesto in tzaj kyqanin aj kawil te Roma, aʼyeju in che ok te t-xel César. Noqtzun tuʼnj, nya toj tkyaqil ambʼil jakutoq t-xi kynimen xjal qe aj kawil. Mlaytoq che kʼulin kywitz tuʼnju oʼkx te Jehová at toklen tiʼj jlu (Mateo 4:10; 22:37, 38).

 Onin Jesús tiʼj Tkawbʼil Dios at toj kyaʼj (Lucas 4:43). Mintiʼ okx tqʼon tibʼ toj política, tuʼnju ojtzqiʼn tuʼn qa mlay che onin xjal tuʼn tjapun twi t-ximbʼetz Jehová, sino oʼkx Tkawbʼil kbʼantel jlu tuʼn (Mateo 6:10). Ax ikx, ojtzqiʼntoq tuʼn Jesús qa mlay che ajbʼen xjal tuʼn Dios tuʼn kykawin sino a Tkawbʼil Dios kykawil te kyxel (Daniel 2:44).

 Mintiʼ. Xi kybʼiʼn t-xnaqʼtzbʼen Jesús kawbʼil tuʼn miʼn tokx kyqʼon kyibʼ toj kybʼinchbʼen xjal (Juan 15:19). El kykanoʼn tiʼj techel kyaj tqʼoʼn Jesús kywitz ex mintiʼ okx kyqʼon kyibʼ toj política (Juan 17:16; 18:36). Aju bʼant kyuʼn, ok tilil kyuʼn tuʼn t-xi kybʼinchaʼn aju otoq txi tqʼamaʼn Jesús kye: tuʼn kypakbʼan ex tuʼn t-xi kyqʼoʼn xnaqʼtzbʼil tiʼj Tkawbʼil Dios (Mateo 28:18-20; Hechos 10:42).

 Aju mas nim toklen toj kywitz okslal, aju tuʼn kynimen te Dios. Noqtzun tuʼnj, ax ikx ojtzqintoq kyuʼn qa nim toklen tuʼn kyrespetarin kye aj kawil (Hechos 5:29; 1 Pedro 2:13, 17). Tuʼntzunju, xi kybʼiʼn ley ex xi kychjoʼn impuesto (Romanos 13:1, 7). Maske mintiʼ okx kyqʼon kyibʼ toj política, pero xqʼuqin ley kyiʼj ex onin kyiʼj aju bʼant kyuʼn gobierno (Hechos 25:10, 11; Filipenses 1:7).

 In tzaj tqʼamaʼn Biblia qa mintiʼ okx tqʼon tibʼ Jesús toj política nix qeju tnejel okslal. Tuʼntzunju, twitz tkyaqil Txʼotxʼ, mintiʼ in nokx kyqʼon kyibʼ testigos de Jehová toj política. Ik tzeʼn bʼant kyuʼn tnejel okslal, in nok tilil kyuʼn tuʼn t-xi kybʼiʼn kawbʼil kyaj tqʼamaʼn Jesús tuʼn t-xi kypakbʼaʼn «tqanil bʼaʼn lu tiʼj tkawbʼil Dios» (Mateo 24:14).