¡KUKX QO XQʼUQIN!
¿Chʼix tul jun qʼoj twitz tkyaqil Txʼotxʼ? | ¿Tiʼ in tzaj tqʼamaʼn Biblia tiʼj jlu?
Ateʼ nim xjal in kubʼ qximan qa nyaxix nim qʼoj o tzʼok kyxol tnam kyoj qeju 30 abʼqʼi ma che ikʼ ex qa mas at tbʼanel kyxol tnam lu. Pero qa ma tzʼok qqʼoʼn qwitz tiʼjju in nikʼ toj ambʼil jaʼlo, nyaxixlo ik tten jlu.
«In kubʼ kyximen xjal qa jaku tzaj nya bʼaʼn kyoj junjuntl tnam tuʼnju in nok qʼoj tuʼn Israel tukʼil tnam Gaza ex mas jaʼlo, tuʼnju in nok qʼoj tuʼn tnam Israel kyukʼil xjal ateʼ toj jun grupo Hezbolá tbʼi atz toj tfrontera tnam Líbano» (chi Reuters, 6 te enero te 2024).
«Ateʼ junjun grupo in kawin Irán kyibʼaj ex in che ok tzoqpaj kyoj nimku lugar. Ex o tzʼok ten Irán bʼinchal junjun bomba nuclear juntl maj. Ax ikx tuʼnju o tzʼok tmojbʼaʼn tibʼ Rusia ex China tukʼil Irán, jakulo che ok tzoqpaj kyiʼj tnam ateʼ toj plaj Txʼotxʼ te Occidente» (chi The New York Times, 7 te enero te 2024).
«Kukx in tzaj nim nya bʼaʼn tuʼn qʼoj in nok tuʼn Rusia toj tkyaqil tnam Ucrania» (chi UN News, 11 te enero te 2024).
«Jun rat naj jaku tzaj jun qʼoj tuʼnju ma chmet tqʼinumabʼil tnam China ex tuʼnju ateʼ nim t-soldad ex nim tkʼuxbʼil te qʼojbʼil, tuʼnju in jaw tnimsaʼnxix tibʼ tnam Taiwán ex tuʼnju nyaxix bʼaʼn kyten tnam China tukʼil Estados Unidos» (chi The Japan Times, 9 te enero te 2024).
¿Tiʼ in tzaj tqʼamaʼn Biblia tiʼj tkyaqilju in bʼaj? ¿Tzulpe jun qʼoj tuʼn jlu?
Aju kyaj qʼamaʼn toj Biblia
Mintiʼ kyaj qʼamaʼn toj Biblia jatumel kʼokelxix qʼoj, pero kyaj tqʼamaʼn qa ok che okel nim qʼoj toj ambʼil jaʼlo ex qa tuʼn jlu mlaytoq che ten xjal (Apocalipsis 6:4).
Kyaj qʼamaʼn toj uʼj te Daniel qa toj mankbʼil tqʼijlalil, kʼokel tilil kyuʼn nimaq kawbʼil twitz tkyaqil Txʼotxʼ tuʼn kykawin. Ex at toklen jlu tukʼil tuʼn tkubʼ kyyekʼin alkye jun kyxol at mas tsoldad ex alkye mas ateʼqe tqʼaqʼ tuʼn tbʼiyen, nya oʼkxju, ax ikx kʼokel kyqʼoʼn nim pwaq moqa medi tiʼj (Daniel 11:40, 42, 43).
At jun qʼoj tzul
In tzaj tqʼamaʼn Biblia qa tnejel mas kxeʼl nya bʼaʼn toj il ex yajxitl, tzul aju bʼaʼn. Kyaj tqʼamaʼn Jesús jlu: «Tzul jun kʼixbʼisabʼl maʼxix, bʼajx tzaj jun maj ikju atxix tej tbʼant twitz txʼotxʼ» (Mateo 24:21). Aj tkubʼaj nimxix kʼixbʼisabʼil lu, kxel tzyet jun qʼoj tok tbʼi Armagedón, aju in nok qʼoʼn te tqʼoj «Dios tuj jun qʼij maʼ toklen, aju Dios at tipumal tuʼn tbʼant tkyaqil tuʼn» (Apocalipsis 16:14, 16).
Pero aj tok qʼoj Armagedón, mlay kubʼ najsaʼn kyyajil xjal, sino che kletel xjal toj. O tzaj nim qʼoj tuʼn kykawbʼil xjal ex o tzaj nim nya bʼaʼn tuʼn. Pero toj qʼoj Armagedón, kbʼel tnajsaʼn Dios kykawbʼil xjal. Qa taja tuʼn tel mastl tnikʼa tiʼj alkye tten kʼelel tiʼn Armagedón tkyaqil qʼoj twitz Txʼotxʼ ex alkye tten che tel xjal toj bʼaʼn tuʼn, jyonxa qe xnaqʼtzbʼil: