Toj viernes 24 te febrero te 2023 tzʼel jun abʼqʼi tuʼn qʼoj toj tnam Ucrania. In tzaj kyqʼamaʼn junjun tqanil qa o che kyim junlo 300 mil soldad te Ucrania ex te Rusia moqa o che kʼixbʼi, ex qa o che kyim junlo 30 mil xjal tuʼn qʼoj lu. Pero maslo nim kyajlal xjal o tzaj nya bʼaʼn kyiʼj twitzju in tzaj qʼamaʼn tzalu.

 Bʼisbʼajil, pero mintiʼ jun yekʼbʼil tiʼj qa ya chʼix tkubʼaj qʼoj lu.

•   «Ma tzikʼ chʼixmi jun abʼqʼi jaʼlo tej kyokx Soldad te Rusia qʼojil toj Ucrania, pero mintiʼ jun yekʼbʼil tiʼj qa ya chʼix tkubʼaj qʼoj lu. Ax ikx kykabʼil tnam in tzaj nya bʼaʼn kyiʼj tuʼn qʼoj lu ex mintiʼ in mojeʼ kyyol tuʼn tkyaj nya bʼaʼn toj ttxolil kyuʼn» (Chi NPR [aju radio toj tnam te Estados Unidos], 19 te febrero te 2023).

 Tuʼntzunju, ateʼ nim xjal in che bʼisun ex in tzaj bʼaj kykʼuʼj aj kyximen tiʼj kʼixkʼoj ex yajbʼil in tzaj kyiʼj tbʼanel xjal twitz tkyaqil Txʼotxʼ. ¿Tiʼ qʼuqbʼil qkʼuʼj in tzaj tqʼoʼn Biblia tiʼj jlu? ¿Kpolpe jun qʼij jatumel ya miʼn tentl qʼoj?

 In yolin Biblia tiʼj jun qʼoj kʼokel toj ambʼil tzul aju che kletel xjal tuʼn. In nok qʼoʼn tbʼi qʼoj lu te Armagedón ex in tzaj tqʼamaʼn uʼj te Apocalipsis jlu tiʼj: «Tuʼntzun kyqʼojin tiʼj Dios tuj jun qʼij maʼ toklen, aju Dios at tipumal tuʼn tbʼant tkyaqil tuʼn» (Apocalipsis 16:14, 16). O che tzaj nim xitbʼil tuʼn qʼoj in che tzaj tuʼn kykawbʼil xjal, pero kʼajbʼel qʼoj Armagedón tuʼn Dios tuʼn kykubʼ najset kykyaqil kykawbʼil xjal. Tuʼn tel tnikʼa tiʼj tzeʼn che kbʼel naj qʼoj tuʼn Armagedón ex tzeʼn tzul tiʼn mujbʼabʼil twitz Txʼotxʼ, jaku che jaw tuʼjina xnaqʼtzbʼil lu:

•   «¿Tiʼ aju Armagedón?»

•   «Jun tbʼanel tqanil qa tzul Armagedón»